1 Ḿpʋ́ɣʋ́ wulɑʋ Aselusi hɑwɑ Ɩsǝtɛɛ kɛ Yutɑ nyǝ́mɑ kolontu Hɑmɑŋ tǝyɑɣɑ nɑ ɩ nyǝm tǝnɑ kɛ kʋyɑkʋ ŋkʋ. Ɩlɛnɑ Ɩsǝtɛɛ hʋlɩ wulɑʋ kɛ Mɑɑtosee sɩ ɩnɩ ɩ lʋlʋɣʋ tʋ kɛ-ɩ. Ntɛnɑ wulɑʋ nɑ́ɑ́ yɑɑ Mɑɑtosee 2 nɑ ɩ́ cɛlɛ-ɩ kukuule nte ɩ kɑ mʋ Hɑmɑŋ kiŋ tɔ, nɑ Ɩsǝtɛɛ sɩɩ-ɩ Hɑmɑŋ tǝyɑɣɑ pɑɑsǝnlʋ.

3 Ḿpʋ́ɣʋ́ Ɩsǝtɛɛ tɑsɑ wulɑʋ kɛ yɔɣɔtǝnɑʋ. Ɩ hotɑ ɩ nɔɔhɛɛ tɛɛ kɛ́ nɑ wulɑ nɑ ɩ́ wiinɑ-ɩ sɩ: Sǝŋsɩ ɩsɑɣɑtʋnɑɑ mpɑ Akɑkɩ tʋ Hɑmɑŋ kɑ tɑɣɑnɑ Yutɑ nyǝ́mɑ tɔɔ tɔ. 4 Ɩlɛnɑ wulɑʋ hʋlɩ Ɩsǝtɛɛ kɛ ɩ wʋlɑ kpɑ́tʋ́ɣʋ́ nɑ ɩ́ kʋlɩ nɑ ɩ́ sǝŋ ɩ ɩsɛntɑɑ. 5 Nɑ ɩ́ tɔ sɩ: Hɑɩ mɑ cɛ, mɑ cɑɑ sɩ ń yele nɑ pɑ́ ŋmɑɑ nɑ pɑ́ sǝŋsɩ tɔm nti Akɑkɩ tʋ Hɑmetɑtɑ pǝyɑlʋ Hɑmɑŋ ŋmɑɑwɑ sɩ, pɑ kʋ́ Yutɑ nyǝ́mɑ mpɑ pɑ wɛ nyɑ́ kɑwulɑɣɑ tɛtʋ tǝnɑ tɑɑ tɔ. 6 Mɑ kɑɑ pǝsɩ nɑ mɑ́ nyǝnǝɣɩ mɑ yǝlɑɑ sǝm kɛ mpʋ.

7 Ḿpʋ́ɣʋ́ Aselusi cɔ Ɩsǝtɛɛ nɑ Yutɑ tʋ Mɑɑtosee sɩ: Ɩɩ nɑɑ mɑ hɑ Ɩsǝtɛɛ kɛ Hɑmɑŋ tǝyɑɣɑ. Mɑ yelɑɑ nɑ pɑ́ pusɩ-ɩ nɑ tesikɑ kɛ timpi ɩ tʋ Yutɑ nyǝ́mɑ tɔɔ kɛ́ niŋ tɔ. 8 Mpʋ tɔ, mɑ kɑɑ pǝsɩ nɑ mɑ́ lɑɣɑsɩ tɔm nti pɑ sɩɩnɑ mɑ hǝtɛ nɑ pɑ́ tʋ mɑ kʋyʋsʋm tɔ. Ɩlɛ ɩ́ ŋmɑɑ lɛɛtǝlɩ kɛ ɩsǝnɑ ɩ́ cɑɑkɩ sɩ pɑ́ wɑɑsɩ Yutɑ nyǝ́mɑ tɔ. Ɩ́ ŋmɑɑ-ɩ nɑ mɑ hǝtɛ tɑɑ nɑ ɩ́ tʋ mɑ kʋyʋsʋm.

9 Ḿpʋ́ɣʋ́ Mɑɑtosee kotɑ wulɑʋ tɑkǝlɑsɩ ŋmɑɑlɑɑ kɛ kʋyɑkʋ ŋkʋ kʋ mɑɣɑmɑɣɑ. Pɩɩ kɛ́ pɑ ɩsɔtʋ tooso nyǝŋ Sifɑŋ kʋyɑkʋ hiu nɑ tooso nyǝŋkʋ wule kɛ́. Ɩlɛnɑ pɑ́ ŋmɑɑ tɑkǝlɑsɩ kɛ Yutɑ nyǝ́mɑ nɑ tɛtʋ feŋlɑɑ, nɑ tɛtʋ hɔɣɔlǝŋ nɩɩnʋwɑ nɑ hiu nɑ nɑɑtosompɔɣɔlɑɣɑ (127). Pǝ kpɑɣɑʋ hɑtoo Ɛntɩ hɑlǝnɑ Ɩtiyopii tɔ, pǝ kʋmɑtɑŋnɑɑ sɔsɑɑ nɑ nyʋɣʋ nyǝ́mɑ kɛ pɑ ŋmɑɑwɑ nɑ pɑ́ tɛlǝsǝnɑ pɑɑ piitim mpi pǝ tɑɑ. Nɑ Yutɑ nyǝ́mɑ tɔm tɑɑ tɔtɔ. 10 Wulɑʋ Aselusi hǝtɛ kɛ pɑ ŋmɑɑnɑɑ nɑ pɑ́ tʋ ɩ kʋyʋsʋm. Ɩlɛnɑ tillɑɑ cɑɣɑ ɩ kpɑɣɑnǝŋ sewɑ nyǝŋ nɑ pɑ́ ponɑ lɛɛtǝlǝnɑɑ mpɛɣɛ tɛtʋ tǝnɑ tɑɑ. 11 Lɛɛtǝlǝnɑɑ mpɛ pɑ tɑɑ tǝnɑɣɑ wulɑʋ hɑ nɔɣɔ kɛ tɛtʋ tǝnɑ tɑɑ Yutɑ nyǝ́mɑ sɩ: Ɩ́ kpeɣeli nɑ ɩ́ tɑŋ. Pɑɑ piitim mpi pǝ yǝlɑɑ ɩ́ kɔmɑ-mɛɣɛ yoonɑʋ ɩ́ kʋ-wɛ, nɑ ɩ́ kpɛŋnɑ pɑ ɑlɑɑ nɑ pɑ piyɑ nɑ ɩ́ kuu pɑ wɛnɑʋ. 12 Ɩsɔtʋ nɑɑnʋwɑ nɑ nɑɑlɛ nyǝŋ Atɑɑ kʋyɑkʋ nɑɑnʋwɑ nɑ tooso nyǝŋkʋ wule mɑɣɑmɑɣɑ kɛ ɩ́ kɑ́ lɑ mpʋ ɩnǝɣɩ tɛtʋ tǝnɑ tɑɑ. 13 Pɩɩ wɛɛ sɩ pɑ́ tɛlǝsɩ lɛɛtǝlǝnɑɑ mpɛ pɑ tɔm kɛ pɑɑ tɛtʋ hɔɣɔlʋɣʋ ŋku kʋ yǝlɑɑ kɛ́, nɑ pǝ́cɔ́ Yutɑ nyǝ́mɑ sɔɔlʋ pɩɩ nɑ pɑ́ lɛɛtɩ pɑ kolontunɑɑ kɛ kʋyɑkʋ ŋkʋ kʋ wule. 14 Tillɑɑ nɩɩ wulɑʋ tɔm ntǝɣɩ mpʋ ɩlɛnɑ pɑ́ kpɑ kɑwulɑɣɑ kpɑɣɑnǝŋ tɔɔ nɑ pɑ́ hɔkɔ nɑ pɑ́ tɛɛ. Ḿpʋ́ɣʋ́ pɑ heelɑ tɔm ntɩ tɔtɔɣɔ Susi ɩcɑtɛ tɑɑ.

15 Ḿpʋ́ɣʋ́ Mɑɑtosee lɩɩ wulɑʋ tɛ, nɑ ɩ́ suu kɑwulɑɣɑ wontu nɑ pɑ́ lii-tǝɣɩ ɑkpɑɑyɑlɑ nɑ tǝ hʋlʋmɑɑ, nɑ kpoŋkpontu toŋ nyǝntʋ cɑpɑ kʋsɛɛm nɑ ɩ́ temɑ wʋlɑ ntenuɣu. Ɩlɛnɑ Susi ɩcɑtɛ nyǝ́mɑ wiliti. 16 Ḿpʋ́ɣʋ́ pǝ hɛɛsɑ Yutɑ nyǝ́mɑ lɑŋɑ kɛ sɔsɔm nɑ pɑ́ nɩɩ leleŋ nɑ pǝ́ kʋsɩ pɑ nyʋɣʋ. 17 Ḿpʋ́ɣʋ́ wulɑʋ tɔm ntɩ tǝ tɑlɑ pɑɑ tɛtʋ hɔɣɔlʋɣʋ ŋku, nɑ pɑɑ ɩcɑtɛ nte tǝ tɑɑ. Ɩlɛnɑ Yutɑ nyǝ́mɑ lɑŋɑ hʋlʋmɩ kɑtɑtǝlɑɣɑ nɑ pɑ́ lɑ́ ɑcimɑ. Ḿpʋ́ɣʋ́ sɔɣɔntʋ kpɑ piitim lɛmpɩ nyǝ́mɑ nɑ pɑ tɑɑ pɑɣɑlɛ mʋ Yutɑɩtʋ.