1 Pǝ lɑpɑ pɩɩsɩ nɑɑnʋwɑ nɑ liɣiti ɩlɛnɑ mɑ́ mǝlɩ Yosɑlɛm, nɑ Pɑnɑpɑɑsɩ sɩɩ-m, nɑ mɑ́ kpɛnnɑ Titʋ tɔtɔ. 2 Pǝ tɑɣɑ pʋlʋ tɔɔ kɛ́ mɑ polɑ Yosɑlɛm, Ɩsɔ hʋlǝnɑ-m sɩ pǝ wɛɛ sɩ tǝlɑsɩ mɑ́ polo kɛ́. Mɑ nɑ tǝnɑ nyʋɣʋ nyǝ́mɑ tǝ kotɑ tɑ́ tike, ɩlɛnɑ mɑ́ kpɑɣɑ Lɑɑpɑɑlɩ Kʋpɑŋ wei mɑ lɑkɩ mpɑ pɑ tɑ kɛ Yutɑ nyǝ́mɑ tɔ ɩ tɔm nɑ mɑ́ kɛɛsɩ-wɛ tǝcɛɩcɛɩ. Mɑ luɣu tɑɑ fɛɩ sɩ mpi mɑ tɛmɑ lɑpʋ nɑ mpi mɑ tɔŋnɑ lɑpʋ tɔ pǝ́ pǝsɩ yem. 3 Nɑ Titʋ wei ɩ tǝŋɑ-m mpʋ nɑ ɩ́ kɛ́ Kǝlɛɛkɩ tʋ tɔ pɑ tɑ cɑɑlɩ-ɩ sɩ ɩ́ pɛlɩ. 4 Amɑ ɑcɛsɑɑcɛsɑɑ nyǝ́mɑ mpɑ pɑ sitɑ tɑ́ hɛkʋ tɔ pɛlɛ pɑ lʋpǝnɑ sɩ ɩ́ pɛlɩ. Acɛsɑɑcɛsɑɑ nyǝ́mɑ mpɛ, pɑ lɔɔlɑɑ kɛ́ tǝkɛʋ nɑ pɑ́ sʋʋ tɑ́ hɛkʋ, sɩ pɑ feŋiɣi nɑ pɑ́ nɑ́ tɑ́ nɑ Yesu Kilisiti tǝ kpɛntɑɑ nɑ tǝ wɛ kɑsɑɣɑmpiitu nti tǝ tɑɑ tɔ. Pɑ cɑɑkɑɣɑ kɛ́ sɩ pɑ́ pǝsɩ-tʋɣʋ yomɑɑ. 5 Amɑ tɑ́ tɑ́ hɑ-wɛɣɛ pǝ mpɑɑʋ kɛ pɑɑ pǝcɔ mɑɣɑmɑɣɑ. Tɑ́ sɔɔlɑɑ kɛ́ sɩ mǝ tɔɔ ɩlɛ tǝ́ tɔkɩ Lɑɑpɑɑlɩ Kʋpɑŋ tɑmpɑnɑ tǝkpɑŋkpɑŋkpɑ.

6 Mpɑ mɑ tɔŋ sɩ nyʋɣʋ nyǝ́mɑ kɛ mpʋ tɔ, tɔʋ, mɑ tɑ nyɩ sɩ tɑmpɑnɑ mpɛɣɛlɛ nyʋɣʋ nyǝ́mɑ yɑɑ we tɔ. Ɩlɛ pɑɑ pɑ tɩɩ kɛ́ mpɑ te, pǝ kʋlʋm. Ɩsɔ ɩlɛ ɩɩ nyǝnǝɣɩ tɔɔ tɔ se. Mpɛ ɩnɩ pɑ tɑɑ nɔɣɔlʋ tɑ tɑsɑ-m tɔm kʋfɑtʋ nɑtǝlǝɣɩ sɔɔsʋɣʋ sɩ mɑ́ lɑ. 7 Amɑ pɑ nɑwɑɣɑ tǝkelekele sɩ Ɩsɔ tʋ-m tǝmlɛ sɩ mɑ́ heeli Lɑɑpɑɑlɩ Kʋpɑŋ kɛ mpɑ pɑ tɑ kɛ Yutɑ nyǝ́mɑ tɔɣɔ teitei ɩsɩɩ ɩ tʋ Piyɛɛ ɩlɛ sɩ ɩ́ heeli Lɑɑpɑɑlɩ Kʋpɑŋ kɛ Yutɑ nyǝ́mɑ tɔ. 8 Ɩsɩɩ Ɩsɔ kpɑʋ Piyɛɛ kɛ tillu sɩ ɩ́ pɑɑsǝnɑ Yutɑ nyǝ́mɑ tɔ mpʋ tɔtɔɣɔ ɩ kpɑ mɑɣɑ tillu sɩ mɑ́ pɑɑsǝnɑ mpɑ pɑ tɑ kɛ Yutɑ nyǝ́mɑ tɔ. 9 Sɑɑkɩ nɑ Piyɛɛ nɑ Yohɑɑnɩ, mpɑ mpɛ pɑ nyǝnǝɣɩ mpʋ sɩ pɑ nyʋɣʋ nyǝ́mɑ tɔ, pɛlɛ pɑ nɑwɑ sɩ Ɩsɔ pɑɑsɑɑ kɛ́ nɑ ɩ́ tʋ tǝmlɛ ntɛɣɛ mɑ niŋ tɑɑ nɑ tǝ mpɑɑ. Ɩlɛnɑ pɑ́ kpɑ mɑ́ nɑ Pɑnɑpɑɑsɩ tɑ́ niŋ tɑɑ nɑ pɑ́ ciɣiti. Tǝ lɑpɑ nɔɣɔ kʋlʋmɑɣɑ kɛ mpʋ, ɩlɛnɑ tɑ́ tǝnɑ tǝ́ yɔɣɔtɩ nɑ tǝ́ tisi tǝmɑ sɩ tɑ́ɑ́ mǝlǝnɑ mpɑ pɑ tɑ kɛ Yutɑ nyǝ́mɑ tɔ pɑ kiŋ nɑ mpɛ pɑ́ polo Yutɑ nyǝ́mɑ kiŋ. 10 Amɑ nti pɑ wiinɑ-tʋ tɔɣɔlɛ sɩ, tǝ́ tɔɔsɩ pɑ kʋnyɔntʋnɑɑ mpɛ pɑ tɔɔ, nɑ mɑ lɑpɑ teu kɛ nti pɑ yɔɣɔtɑ mpʋ sɩ tǝ́ lɑ tɔ.

11 Wɑɑtʋ wei Piyɛɛ kɔmɑ Antiyɔkɑ tɔ mɑ yoonɑ-ɩ yǝlɑɑ tɑɑ kɛ́ ɩ toolɑ mpɑɑʋ tɔ pǝ tɔɔ. 12 Nti tǝ tɑɑ ɩ toolɑɑ tɔɣɔlɛ sɩ, Sɑɑkɩ kɑ tilɑ nɑpǝlɩ, nɑ wɑɑtʋ wei pɛlɛ pɑ tɑ tɑtɑ tɔ, Piyɛɛ nɑ tɑ́ tɑɑpɑlɑɑ mpɑ pɑ tɑ kɛ Yutɑ nyǝ́mɑ tɔ pɑ tɔkɑɣɑnɑ. Amɑ pɛlɛ pɑ kɔmɑ nɑ pɑ́ tɑlɑ, ɩlɛnɑ ɩ́ se mpɑ pɑ tɑ kɛ Yutɑ nyǝ́mɑ tɔ pɑ cɔlɔɣɔ tɔɣɔʋ. Pǝ tɑɣɑ pʋlʋ, ɩ nyɑŋɑɣɑnɑ mpɑ pɑ sɔɔlɑ pɛlʋɣʋ tɔm tɔ. 13 Tɑ́ tɑɑpɑlɑɑ Yutɑ nyǝ́mɑ mpɑ pǝ kɑɑsɑɑ tɔ pɛlɛ pɑ tǝŋɑ Piyɛɛ ɩkpɑtɛ tɔtɔ, hɑlǝnɑ pǝ́ kpɛŋnɑ Pɑnɑpɑɑsɩ nɑ pɑ́ tɛlǝsɩ ɩlɛɣɛ pɑ ɩcɑntʋ ntɩ. 14 Sɑɑ wei mɑ nɑwɑ sɩ pɑ tɔntɛ tɑ mɑɣɑ nɑ pɑ tɑ tǝŋ Lɑɑpɑɑlɩ Kʋpɑŋ tɑmpɑnɑ kɛ teitei tɔ, mɑ tɔmɑ Piyɛɛ kɛ yǝlɑɑ tǝnɑ ɩsɛntɑɑ sɩ: N kɛ́ Yutɑ tʋ pǝyele n lɑpɑ cǝnɛɣɛ ɩsɩɩ wei ɩ tɑ kɛ Yutɑ tʋ tɔ, n tɑ lɑ ɩsɩɩ Yutɑ tʋ kɑ lɑ tɔ. Ɩlɛ ɩsǝnɑɣɑ n nyǝmɑ́ sɩ nɔɔnɔɔ n kɑ́ lɑ nɑ ń cɑɑlɩ mpɑ pɑ tɑ kɛ Yutɑ nyǝ́mɑ tɔ sɩ pɑ́ lɑ ɩsɩɩ Yutɑ nyǝ́mɑ?

15 Tɑ́ mɑɣɑmɑɣɑ tǝ kɛ́ Yutɑ nyǝ́mɑ kɛ́ tǝsiɣisiɣi, tǝ tɑ kɛ ɑsɑɣɑɑ ɩsɩɩ piitim lɛmpɩ nyǝ́mɑ. 16 Pɑɑ nɑ mpʋ tǝ nyǝmɑ́ sɩ pǝ tɑɣɑ ɩsɩɩ yʋlʋ tǝŋʋɣʋ kʋsǝsɩɩtʋ tɔɣɔ Ɩsɔ nyǝnǝɣɩ-ɩ yʋlʋpɑŋ. Amɑ ɩ tɛŋʋɣʋ ɩ tɑɑ nɑ Yesu Kilisiti tɔɣɔ. Tɑ́ mɑɣɑmɑɣɑ ɩsǝntɔ, tɑ́ tɛmnɑ Yesu Kilisiti ɩnǝɣɩ tɑ́ tɑɑ kɛnɑ Ɩsɔ nyǝnǝɣɩ-tʋɣʋ yʋlʋpɑmɑ. Tǝ tɛmɑ tɑ́ tɑɑ nɑ Yesu Kilisiti tɔɣɔ yoo, pǝ tɑɣɑ kʋsǝsɩɩɩtʋ tǝŋʋɣʋ tɔɔ. Pǝ tɑɣɑ pʋlʋ, Ɩsɔ kɑɑ nyǝnɩ nɔɣɔlʋɣʋ yʋlʋpɑŋ kɛ ɩ kʋsǝsɩɩtʋ tǝŋʋɣʋ tɔɔ. 17 Ye tǝ lʋkɩ sɩ Kilisiti tɔɔ pɑ nyǝnǝɣɩ-tʋɣʋ yʋlʋpɑmɑ tɔɣɔ pǝ nɑɑ sɩ tǝ kɛ́ ɑsɑɣɑɑ ɩsɩɩ mpɑ pɑ tɑ kɛ Yutɑ nyǝ́mɑ tɔ, ɩlɛ pǝ wɛɛ sɩ Kilisiti kɛlɛ ɩsɑɣɑtʋ cɑɑ yɑɑ ɩsǝnɑ? Aɑɩ, pǝ tɑɣɑ ḿpʋ́ɣʋ́ pɑɑ pǝcɔ. 18 Ye mɑ kʋlɑɑ nɑ mɑ́ tɑɣɑnǝɣɩ ŋmɑʋ kɛ mpi mɑ tɛmɑ yɔkʋɣʋ tɔ, pǝlɛ pǝ hʋ́lǝ́ɣɩ́ kɛ́ sɩ mɑ tɑ kɛ kʋsǝsɩɩtʋ tǝŋlʋ nɔɣɔlʋ. 19 Ye kʋsǝsɩɩtʋ tɔm tɑɑ, mɑ sǝpɑɣɑ tǝnɑŋnɑŋ, nɑ kʋsǝsɩɩtʋ ntɩ tǝ mɑɣɑmɑɣɑ tǝ kʋnɑ-m mpʋ. Nɑ pǝ lɑpɑ-m ḿpʋ́ɣʋ́ sɩ mɑ́ wɛɛ Ɩsɔ tike tɔɔ. Pɑ kʋ mɑ́ nɑ Kilisiti kɛ sǝm tesikɑ tɔɔ. 20 Nɑ mɑ wɛʋ ɩsǝntɔɣɔ kɑɣɑnɑ tɔ pǝ tɑɣɑ mɑ mɑɣɑmɑɣɑ mɑ wɛnnɑ. Amɑ Kilisiti wɛnnɑ mɑ tɑɑ. Weesuɣu ŋku mɑ wɛnɑ sɑŋɑ tɑɑ ɩsǝntɔ tɔ mɑ tɛŋ mɑ tɑɑ nɑ Ɩsɔ Pǝyɑlʋ tɔɣɔ mɑ wɛnɑ-kʋ. Ɩsɔ Pǝyɑlʋ ɩnɩ ɩ sɔɔlǝnɑ-m nɑ ɩ́ sɩ mɑ sǝm. 21 Mɑɑ kpɑlǝɣɩ Ɩsɔ kʋcɔɔʋ se. Ye kʋsǝsɩɩtʋ kɑ yekɑɣɑnɑ nɑ yʋlʋ pǝsǝɣɩ kʋpɑŋ kɛ Ɩsɔ ɩsɛntɑɑ, ɩlɛ pǝ wɛ ɩsɩɩ Kilisiti sǝpɑ yem kɛlɛ.