1 Suludkuʼn Gaius un ay-ayatok:

Allaya suɏatku kan sika, sakon si John un pallakayonyuʼn mamati.

2 Biɏunkuʼn ay-ayatok, ilulluwaluk ta bibiɏu biyeglu ya mallin-awaka un isun chi kilapakchot chi pammatim. 3 Amod chi galasku si gummatngan cha uchum un susulud taku ked ilug-uggudcha un ipapatim un popotpotan chi katuttuwaan. Tuttuwa un suysuɏutom chi katuttuwaan. 4 Lappun uchum si mampagalas kan sakon lu achi abus chi mangngeɏak un suysuɏuton cha aalakku katuttuwaan.

5 Biɏunkuʼn ay-ayatok, patunged bibiɏu kachawiyam kan cha susulud takuʼn ummiyan utlat, ti ulay lu kailicha, bibiɏu lammamangilim kan chicha. 6 Ked ilug-uggudcha kan chikamiʼn mamati un pin-a manchetchetong utla mipanggop si man-aayatlu kan chicha. Ked bibiɏu lu pasiglu chicha tuɏungan si mambyaatancha ti siya lumbong un makaay-ayu kan Apudyus. 7 Ti lambyaatcha gapu ta mansimbicha kan Kristu. Achipuncha mangkochew si tuɏung cha taguʼn achipun mamati. 8 Ked chitakuʼn mamati, masapuɏ mangtod taku si kasapuɏan cha kamatchiʼn tagu taplu makakawachi taku kan chicha un mangipakaammu si katuttuwaan.

9 Illinggew chi insuɏatku kan chikayuʼn mamati un pin-a manchetchetong utlat, ngim achipun Diotrephes biligbig chi kalobbonganmi. Piola un siya abus chi mangipangpangu. 10 Ked lu umaliyak utlat, ibyegak cha lawwing un kokòola, un amod cha mallilikudla kan chikami. Achipun maplok si hachi, issala boʼn mangiliyon cha susulud takuʼn mamati. Ked ipalitla cha mammangili kan chicha, ya peɏyawola chicha si simbyaan!

11 Biɏunkuʼn ay-ayatok, achim tuɏachon cha lawwing, ngim siyad tuɏachom cha bibiɏuʼn kopya. Lu silu mangwa si bibiɏu, si Apudyus chi singkuwa kan siya. Ngim lu silu mangwa si lawwing, lappun ammula kan Apudyus.

12 Ngim si Demetrius, patunged bibiɏu cha ilug-uggud cha tagu mipanggop kan siya. Ha katuttuwaan chi mampaloklok kan siya. Ulay bo chikami, paloklokanmi un bibiɏu siya, ked ammum un tuttuwa ibyegbyegami.

13 Achu cha piok un ibyega kan sika, ngim achipunku pion un igili si allayaʼn suɏatku. 14 Ked lamlamaok un achipun mabyeyeg ked itullongku sika, ked hachi man-ug-ugguchenta.

15 Sapay otyan ta palin-awaon Apudyus chikayu. Pakumustaon chika kan cha losan un biɏunlu utla. Pakumustaom yan sin-ossaon cha biɏun taku utlat.

Hachi abus un ibyegak.