1 Sakon si James un mansimbi kan Apudyus ya Apu Jesu Kristu. Allaya suɏatku kan chikayuʼn Judio un mamati un lawatawatak si ili-ili. Bibiɏu kayu otyan losan.

2 Susulud, lu mapaligatan kayu si mangkangkalasiʼn ligat, ibilangyu un gumalasanyu, 3 ti ammuyu un lu maalusanyu ligat gapu si pammatiyu, ked hachi pumigsaan chi kilaattomyu.* 1:3 Itullongyu Romans 5:3-4 ya 1 Peter 1:6-9 4 Ked masapuɏʼn alu-alusanyu cha ligat, ta maot-otnganyu ya bibiɏu mambibiyegyu un mangwa kan cha losan un pion Apudyus.

5 Lu awed kan chikayu mangkuɏang si laing, masapuɏʼn malluwalu kan Apudyus ot maatod kan siya, ti lalaay si Apudyus kan cha losan un taguʼn manchawat kan siya. 6 Ngim lu malluwalu kayu, masapuɏʼn patiyonyu un idchon Apudyus chi chawatonyu ya achi kayu manchuwa-chuwa. Ti ha taguʼn manchuwa-chuwa, isun chi challuyun si byeybyey un iyulli-ullin chi bidbid. 7-8 Ha katchiʼn tagu un manchuwa-chuwa ya mangkossa-kossa si losan un koola, achipunla lamlamaon un awed idchon Apudyus kan siya ti lappun idchola kan cha kamatchi.

9 Chikayuʼn kakapus un mamati, masapuɏn magalasan kayu ti ipotpotog Apudyus chikayu. 10 Ya chikayuʼn byabyaklang un mamati, magalasan kayu otyan ulay lu ipacheɏan Apudyus chikayu ti ha byaklang ya kilabyaklangla ked mampatingga un isun chi sabsabung un sin-akitan ked lappun. 11 Lu umilit si amod, makyaw cha muɏa ked mantok-eg chi sabungcha ked lakaan chi kilabiɏula. Katchi bo makwa si byaklang un matoy si mangasikasuwala si kilabyaklangla.† 1:11 Isaiah 40:6-7

12 Pian chi tagu un miyattomla ligat, ti lu misikedla pammatila magunggulaan siya si biyeg ing-inggala un siya ingkarin Apudyus kan cha mangay-ayat kan siya.

13 Ngim lu masubsub chi tagu, achipun makwa un kalala si Apudyus chi lalubsub kan siya. Ti achipun masubsub si Apudyus si lawwik ya achipun bo mansubsub. 14 Ti masubsub chi tagu un makabyasuy lu maawis si lawwing un pipion chi long-egla. 15 Ked lu ig-iggalan koon chi lawwing un pipion chi long-egla, hachi makabyasuɏala. Ked lu ig-iggalaʼn mangwa si byasuɏ, siya misilaala kan Apudyus si ing-inggala.‡ 1:15 Otoy - mallalayun un misilaan kan Apudyus.

16 Ked susulud un ay-ayatok, lu masubsub kayu, achiyu pabyasuɏon si Apudyus si lawwing un pin-ayu koon. 17 Ti losan un bibiɏu ya ustu un maatod kan chitaku ked lampeɏpu kan Apudyus un awed ud langit. Siya langwa kan cha silaw ud langit. Ngim ulay lu mambyalibyaliw cha killingwala, achipun pulus mambyaliw si Apudyus. 18 Gapu si simsimmokla, lambyalilola chitaku aalakla gapu si lamatiyan taku si ugudlaʼn katuttuwaan ked chitakuʼn aalakla chi kapotogen kan cha losan un killingwala.

19 Susuludkuʼn ay-ayatok, ammanyu somsomkon cha alla: Masapuɏn lakasagala takuʼn manchongeɏ, ngim amman taku allechen un man-ugud ya achi mallasu sumangaan taku. 20 Ti lu sumanga chi tagu ked achipun makakopya si bibiɏuwon Apudyus. 21 Siya kaalonyu cha losan un lawwing un somsomok ya cha losan un lawwing un angwat. Ked ipakumbyabyayu long-egyu ya patiyonyu ugudla un limuɏa si somsomokyu, ked hachi malagu kan chikayu.

22 Achiyu allilawon chi long-egyu un manchongeɏ lawa si ugud Apudyus, ngim masapuɏn koonyu cha imbyegala. 23 Ti ha taguʼn manchongeɏ lawa si ugud Apudyus ya achipunla tuttuwaon, isun chi taguʼn mallagechawan. 24 Itutullongla long-egla ked lu lumawa, kakmala laliwatan chi paɏangla. 25 Ngim ha taguʼn ammala ipapatiʼn man-acheɏ si ustu-ustuʼn lintog Apudyus un siya manwayawaya si tagu ya ipapuutla manchongeɏ ya achipunla liwatan cha chingngeɏla ngim koola ibyegala, binchisyulan Apudyus siya si losan un koola.

26 Ha tagu un mangibyegaʼn mangapudyus ngim achipunla miyattom chi tupokla, ked eɏ-eɏlugela long-egla ya lappun simbin chi mangapudyusala. 27 Ti ha taguʼn ibilang Ama takuʼn Apudyus un gettok un mamati ked: tuɏunganta cha laulila ya cha labyaɏu si cha malligatancha ya achipunta mikama si lawwing un kokòon cha tagu si allaʼn lubung.