Atham woPoththuruc 2
Atham ieꞌra ammakka oPoththuruc pokurrot
Lon lonothon
Pul pothothïlettat poIeccuo oPoththuruc pokurrinet ul ioccokothe lon loIeccuo kaꞌramacak engki akka kwinat itti kwaik pathokkuttat nomaꞌri motte. Kwokat pongothe itti kwakwarikiet ul ioccokothe lon loIeccuo itti okin thikkoik appinappin ngkathar ikapirie Kapik noka. Ikaꞌramacak engki engki kwaꞌretto nakin akin okorronno okorronno opaꞌrine lon loKapik cik ana loIeccuo ilakin thoccot naak ana napilingon ithikkot cik okin oIeccuo. Kwokwarikiethekin itti okin thaccot kït noul iangkene ngkarra iokat cik aukko noppan toKapik. Ul enni iangkene ngkarra wokat cik akkupo ul ioccokothe lon loMiccie aikkoik thikkoik tholon ilokithak appinappin ana anekket lon nomïkït itti oIeccuo pakorronno okkaprttako. Anaruk oPoththuruc piꞌre itti oMiccie paik pakkaprttako ana Kapik kakïtto aꞌrupu iaik inenni akopakket aꞌrek cik iie na lon ilokithak lella.
1
1 Lon elli naun oCcamaan oPoththuruc pul iporekinet oIeccuo oMiccie ana pul pothothïlettat poIeccuo, Laine okkwion ithoccokothe lon loKapik nomïkït nti ithiak thoKapik ana pul pothoꞌret thonnon oIeccuo oMiccie ammakka thonnon. 2 Athoporot thoKapik ana thomicco oka nanon attel nti ithina lon loKapik ana oIeccuo Ili wonnon.
Thupokkot ilon loKapik
3 Puꞌran pung ipaik prek pethet ton aꞌrupu appik iaron ikkoik ngngin thikkoik itha Kapik kongothe ngkathar ikaron thinak ngngin okkwi ipakkarot ton nthrïk thung ana thoporot thung. 4 Ngkathar engki, kwethet ton thonekket lon cik thung thella pangken cik othakka itti aron oka thulukku aththut ana opaꞌrine lon lolon ilokithak lonocapu ncik appik ilakïttoik. 5 Ana nti ilon elli nopoꞌrathan kiththik annarttot thoporot nothoccokot tholon lon loKapik nomïkït thon ana arttot thinaik nolon iloporot 6 ana arttot thoꞌrumo noka nothinaik ana arttot thoccokot cïkït ilon nothoꞌrumo noka ana arttot thoporot nothoccokot cïkït ilon, 7 ana arttot thongarot ana thoporot nothikkoik ammakka Kapik kongothe. 8 Ana amma onon thonu lon elli nomïkït mon ana alaik alarttakot nan, loppot lakorronno non annoka thinangka ana okkot lon loppot iloporot akka nthina Ili wonnon oIeccuo oMiccie. 9 Ana okkwi ipella lon elli kwiꞌrimathe ana kuret nan itti lon lung ilokithak loccïkakinthok nci maꞌrot. 10 Pangkingon noreko cannan annokene ka kon ana ul wꞌrek itti Kapik kakkarot non ana kocomot non itti annoka ul wung ana amma onon akkokkothe lon elli onon thakannurat cik. 11 Ittina Kapik kanyine non kathat ikanniꞌriko ngngin ngili ngothupuththuput ngoIli ana pul pothoꞌret ponnon oIeccuo oMiccie.
Theret lon latham nul wothernte lon loKapik
12 Ittina mpakwariket non lon elli appinappin ana antoka manna itti onon thina aꞌrupu wen ana aꞌrupu wen wupokkothe ilon ilaik ïcat ilanon thina inenni. 13 Loporot itti mpakorronno onon annokwarttikot cik inakka onon thaik ngkït thapat. 14 Akka mpina kicce itti mpaik pio accokkot ammakka Ili wonnon oIeccuo wokenerin, 15 ana ilen akka anorekine cannan othakka itti amma mpiot annokwarttikot aꞌrupu enni appik.
16 Onïn thakorronno occot kït nerung iokuꞌrettat akka onïn therenet non lon lopuꞌran pothao thoIli oIeccuo oMiccie, anaruk onïn thimmat lon ngkït kïn lothïrïk thung. 17 Onïn thokat cik ceneket akka kwothiakinet cik ana thoporot noKapik ikrïk akka poꞌre pokat apiꞌre itti, “Ukul win enni ia mpopirat noka nan.” 18 Onïn ngka kïn thoccïkothe poꞌre pen apao ntothiꞌrot akka onïn thokat ïnaththut nocoꞌrong icupupure. 19 Ana manna lon loul wothernte lon loKapik lokenet ton kicce, ana onon thonu itti nthaccot kït nolon len ammakka oron occot kït nokꞌran ikacco iꞌrïmak puccuk angorrot othakkakat akꞌran kocïngkï oppat nomïkït mon. 20 Onon thonu itti nthina nan itti lon lotheret atham nul wothernte lon loKapik nci maꞌrot lakorronnoka lerettat nti ica copul pothernte lon loKapik. 21 Akka ul ierentet lon loKapik wakannoka itti were lon ammakka pul iponyi anaruk okin there lon noKapik ammakka Kanang ikupupure okenekin.