1 Nganaṉatju piipa ngaatjanya wakara wantirriyaṉi, Yiitju Kurayitjanya Katutjaku wangka tjakultjunkupayinya watjalkitjangku. Paluru yaṉangu tjuṯa ngulytjura kana nyinatjunkupayi. Manta ngaranytjawiyangka, paluru kutu nyinangi. Paluru mantangkalpi nyinanytjala nganaṉatju palunya kurungku nyakula kuliṉingi. Marangkuṯarra nganaṉatju palunya yunypangku pampulpayi. 2 Yuwa, paluru nganaṉanya yaṉangu tjuṯa ngulytjura palumpa ngurrangka kana nyinatjunkuku. Paluru paapa Katutjala nyinarra ngalya yankula mantangka yutitjarringu. 3 Nganaṉatju ilta palunya nyakula palumpa wangka kulira nyurrangarrinya tjakultjunanyi nyurrangarriṯarra kulira palumpa walytjarrinytjaku. Yuwa, nganaṉa tjungu Katutjaku walytja tjuṯa nyinanytjaku, Yiitju Kurayitjakuṯarra. Paluru ilta Katutjaku katja nyinanyi. 4 Wangka nganaṉatju wakara nyurrangarrilakutu wantirriyaṉi, nyurrangarri kulira palumpa walytjarrinytjaku. Yalatjinyurra palumpa walytja nyinanytjala nganaṉa yunypa nyinaku.

5 Wangka ngaatjanyaya kulila! Yiitju paluru palumpa katjangku nganaṉala yalatji watjaṉu. Katutjanyakunyu kutu tjukarurru nyinanyi, wiya paluru kuya palyalpayi.

6 Tjinguru yaṉangungku watjaṉi, “Ngayulu Katutjaku walytja tjukarurru nyinanyi.” Yalatji paluru watjara tjinguru yankula kuya kutu palyanmalpa. Yalatji nyinarra wiya Katutjaku walytja tjukarurru nyinanyi, ngunytjinytju. Nganaṉa kuliṉi paluru ngunytji watjaṉi, “Ngayulu Katutjaku walytja tjukarurru nyinanyi.” 7 Yalatji nguwanpa nganaṉa wiya kuya kutu palyantjaku, Katutjaku nganaṉa tjukarurru kutu nyinanytjaku, Katutjanya kutu tjukarurru nyinanytja nguwanpa. Yalatji nyinarra nganaṉa palumpa walytja yunypa nyinaku. Nganaṉa tjinguru kuya palyantjala Yiitjulu nganampa kuya waṉiku. Paluru yurrunpa watiyangka waralyngarala ngurrka yintirra mirrirringu, nganampa kuya waṉinytjaku. 8 Tjinguru Yiitjuku walytjangku yalatji watjalku, “Ngayulu Katutjaku tjukarurru nyinanyi, wiyaṉa kuya palyaṉi.” Yalatji kulira nganaṉa kulilku walytjangku, “Paluru ngunytji watjaṉi. Nganaṉa nyinarra aṉangu winkingku kuya palyalpayi.” 9 Nganaṉa kuya palyara Katutjanya tjapintjaku, kuya nganampa waṉinytjaku. Nganaṉa yalatji tjapintjala paluru ilta kuyalampa waṉiku. Paluru kuya yuwankarra nganampa waṉiku. 10 Yirriṯi Katutjalu watjaṉu, “Yaṉangu winkingku kuya palyalpayi.” Tjinguru Yiitjuku walytjangku yalatji watjalku, “Ngayulu Katutjaku tjukarurru nyinanyi, wiyaṉa kuya palyaṉi.” Yalatji kulira nganaṉa kulilku, “Paluru ngunytji watjalpayi. Katutjalu ilta watjaṉu, nganaṉa winkingku nyinarra kuya palyalpayi, wiya Katutjalu wangka palunya ngunytji watjaṉu, wiya.”