1 Palulanguru ngayulu Tjaanalu nyangu yaṉangu tjuṯalingku puḻi Tjayunala ngarala waṉinytjala. Tjiipi wiima ngururrpa tjanala ngarangu. Yaṉangu paluru tjana Katutjaku walytja tjuṯa ngarala waṉingi, waan antaṯan puutiyi puu tjawutjuna. Ngalyangka tjananya yini kutjarra wakara wantingutja yalatji ngarringi, “Yiitju Kurayitjanya anta, Katutjanya.” 2 Palunyatjanu ngayulu kuliṉu ilkaringuru kapi tiṉa nguwanpa raarrmanangi. Layitningingku tuutuuntja ngayulu kuliṉu. Kiitawu wangkatjingantja nguwanpaṯarra ngayulu kuliṉu. 3 Katutjaku walytja palunya tjananya ngayulu nyangu Katutjaku tjiiyingka ila ngaranytjala. Kuru tjuṯatjarra puupala paluru tjana, tjiḻpi tuuntiyi puupala paluru tjanaṯarra palula tjanala ila ngarangu. Katutjaku walytja paluru tjana ngaralaya tuḻku nyuwana warraṉingi. Tjana kutju tuḻku nintingku warralpayi. Palumpa walytja palunya tjananya kutju Katutjaku ilkari ngurrara tjuṯangku mantanguru katirra Katutjala ngaratjunu. Manta ngurrara kutjupa tjuṯa tjananya katiwiyangku wantingu. 4-5 Katutjaku walytja paluru tjana wiya miiṯa mantjira kanyilpayi, tjana tjiipi wiima palumpa kutu tjukarurru nyinapayi. Paluru tjana wiya yaṉangu kutjupa tjuṯangka ngunytji wangkapayi, wiya, tjana tjukarurru nyinapayi. Katutjaku ilkari ngurrara tjuṯangku tjananya mantangka mantjira Katutjaku ngurrakutu katirra ngaratjunu. Katutjalu tjiipi wiima paluruṯarra tjananya nyakula yunyparringangi. Ilkari ngurrara paluru tjana ngula kutjupa tjuṯa tjananya mantangka mantjira katiku Katutjaku ngurrakutu. Katutjalu tjiipi wiimangkuṯarra tjananya nyakula tjanampa yilta yunyparriku.

6 Palulanguru ngayulu Tjaanalu nyangu ilkari ngurrara kutjupa ilkariwana yananyingka. Paluru yanu wangka palya yaṉangu tjuṯangka tjakultjunkukitja, ngurra manta tjuṯawana nyinapayi tjuṯangka. 7 Paluru raapangku ngurra manta tjuṯawana tjakultjurinkupayi yalatji, “Katutjalu ilkari, manta, yuru, rakula tjuṯaṯarra palyaṉu. Paluru kuwarri maa yankula manta ngurrara tjuṯa nyurrangarrinya kuutamilara watjalku. Pupakatirra palunya kutjunyurra puḻkawaṉinytjaku.”

8 Ilkari ngurrara kutjupangku manta tjuṯawana tjakultjurinkupayi yalatji, “Yunyparriwaya! Tawunu yini Papilunanya Katutjalu yuḻpuṉu. Palunya ngurrara tjuṯangkuya yalatji kuya kutu palyara nyinapayi miiṯa kutjupa kutjupatjarraya ngarrirra yankupayi. Tjananya Katutjanya yunytjuwiya nyinarra pungu. Yaṉangu tjuṯa ngurra palulakutu yankula nyakupayi tjana kuya palyantjala. Nyakula tjana ngurra walytjakutu yankula kuya palunya nguwanpa palyalpayi, Papilunanya ngurrara tjuṯa nguwanpangku.”

9-11 Ilkari ngurrara kutjupa ilkariwana yanangi. Paluru raapangku manta tjuṯawana tjakultjurinkupayi yalatji, “Tjingurunyurra mara nampatjarrangku, ngalya nampatjarrangku tjikipaka yuru ngurrara palunya puḻkawaṉimalpa, watiyatjanu palyaṉutja yuru ngurrara palunya nguwanpaṯarra nyurrangarri puḻkawaṉimalpa. Yalatjinyurra puḻkapungkunytjala Katutjalu nyurrangarrinya kuutawutjungka payira wantirriyalku warukutu, palumpa ilkari ngurrara tjuṯangka kurungka, tjiipi wiima palula kurungkaṯarra. Waru palulanyurra kutu mikinpa tiṉatjarra nyinamalpa.”

12 Yunytjuwiya tjuṯangku nyurrangarrinya panypurangkula pungkunytjala kutunyurra tjukarurru Yiitjuku nyinanytjaku.

13 Palulanguruṉa Tjaanalu wangka kutjupa kuliṉu. Ilkaringuru yalatji wangkangu, “Wangka ngaatjanya wakala! Tjinguru Katutjaku walytja tjuṯangku tjikipaka yuru ngurrara palunya puḻkawaṉinytjawiyangka palumpa waarrkana tjuṯangku tjananya mirri pungku. Palunya tjananya Katutjalu kutu yaṉṯayaṉṯalku palumpa ngurrangka. Ngurra palula tjana yunypa nyinamalpa.”

14 Palulanguru ngayulu Tjaanalu nyangu yaṉanguku katja nguwanpa yutuwaringka nyinanytjala. Walyi kuultatjanu palyaṉutjatjarra paluru nyinangu. Marangku paluru kanyiṉingi tjuuḻa kaḻikaḻi yiritjarra, mangarri muṯulpayi. 15 Katutjaku tjaatji tiṉanguru ilkari ngurrara kutjupa pakara ngarangu. Paluru raapangku watjaṉu yutuwaringka nyinapayingku kulintjaku, “Tjuuḻa kaḻikaḻi yiritjarrangku mantawana muṯurinama!, mangarri yukiri nguwanpa kuwarri yuṉmirrirra ngaranytjala.” 16 Palulanguru yutuwaringka nyinapayingku mantakutu yankula mangarri yuṉmi nguwanpa muṯurinangi.

17 Palulanguru Katutjaku ngurrangka ilkari ngurrara kutjupa, tjaatji tiṉatjanu pakara ngarangu, tjuuḻa kaḻikaḻi yiritjarra. 18 Palulanguru tjaatji tiṉa palula ilkari ngurrara kutjupa pakara ngarangu. Paluru tiipula puyutjunkupayingka waarrkarringkupayi. Waruku mayutju paluru nyinangu. Pakara raapangku watjaṉu ilkari ngurrara tjuuḻa kaḻikaḻitjarra panyapakutu yalatji, “Tjuuḻa kaḻikaḻitjarrangku mantakutu yankula kiripitji muṯura mantjirinama!, kiripitji yuṉmi ngaranytjala.” 19 Palulanguru ilkari ngurrara paluru mantakutu yankula kiripitji muṯura mantjirinangi. Mantjirinkula kiripitji ngaṯi tiṉakutu waṉingu, puḻingka tjawara wantingutja. Kutjupa tjuṯangku ngaṯi palula kantura yuḻpulpayi tjuutja kutju yintilkitjangku. Kiripitji palunya kantura pilkira yuḻpura wiyantja nguwanpa, Katutjalu tjananya mulyarrarringkula pungkula wiyalku, kuya palyalpayi tjuṯa. 20 Tawunu palula yaatjayiṯi ngaṯi palula tjana kiripitji tjuṯa kantura yuḻpuṉu. Tjuutja palunya ngurrkarringkula kapi tiṉa nguwanpa raanarringangi karruwana. Karru palulawana waṉma raanarringangi, tjirri antaṯa kilamita, katulingku raanarringangi.