Anweehd Me Nyaahn Pihlihbi 2

Jeacuu Beehda Ngaa Me Cwihnye Puol Kedea Ngo Teeg

1 Dhe yoohn kuowo gihru naa agwiir Ngad Boadh nyoge ge beehdu kii ngo awaahn ni tee acube yihru, kedea nhyaahro gihre naa ayuge yihru wu buu weehge diero keehdo. Koohmu amor Wahy Juoge ubeehdu beer ke keewu. 2 Ke nying giih nu e nyingu akwaya kejea meehgu cwihnya mihno keter bang gihn yihru ne par acielo, kedea yihru ne nhyaaro maa yihru ne beehdo ke cwihny acielo. 3 Giih lahj cwihny keá yugu, kedea gihr nyepiny keá yugu ke nying nhyaam. Beehdu ke dhe yoohn puol cwihny, nahg dhaane ree piny udoohnge wa nyoge mooge ge ne beeye yihre. 4 Dhiilu ngo ke ngahyo kejea dhaano tiihyo kaa nying ngaa moogo, abea ngo be tiihyo kaa ke nying mar ngude keede.

5 Gihn tiihyu dhiile roomo keehd kwaad kaa atiihy Jeacuu Kriihjte.

6 Jeacuu e yihre ne cahdo gihr Juog ni,

naa adoohng ne dhaano,

e ngo kea tero kejea wiihe rome romo ke Juog.

7 Abea gihn ayuge beehda yiiho e naa ayiihe ngo ke kar wiihe e keede

udoohnge ne dhaano utaahngo uduoge ree piny ne baahng yihr nyoge.

8 Ree abeehne ne yugo ne ngaa me tee tooro yihre

kedea uyiihe thoo keehd thoo me raaj wa thoo rih yaadh maa ariihw.

9 Ke nying gihn ayiihe kwaad beehd nu, e wiihe abeehn Juoge ne tihng maalo ucube tee yihr ngo kedea ucube ngo yi ruohdh.

10 Noono e lihng nying Jeacuu

e kwaad jo ne Paar Maalo kedea yaa wiih piny maa yaa athow cang cung gen rung gene ke piny nyume.

11 Noono thiow e kwaad dhaano cang rob ngo kea

Ngad Boadh nyoge beehda Ruohdh.

Ne rob wa maano, beehda leej e ne yug gene yihr Juog Wuur.

Wu Neehn Daahr Ciehro Ge Meeny Piny

12 Wu ge jo'a maa anhyaara wa kwaad kaa anaa awuoru leeba maano e a poohd ne bangu, kea noono baru maalo ke wuor leeba, keehd me toora kiinu. Kedea baru maalo ke tiihyu, maano e wu tud ke rih Juog cog, beere dhe yoohn tiihy boadh wahy baaru ke maalo. 13 Baaru ngo bang gihn ke nying nihn e Juog beehde ne kiinu ne cub tee yihru kedea cwihnyu loge logo ne meehg wun yug gihre ge daahde yihru.

14 Wu keá peehmo kedea wu keá duohr ke nying giih me reje ke kiinu udoohnge wa gihn yugu ngo padh athiir. 15 Noono e wu ubeehdo ne nyethen Juog me awuohj tooro rogu keehd me beedu wiih piny me yea apahng ke giih me reje kedea yea apahng ke nyoge maa yaa adhemuohme. Beehdu ke beehdo me beer ne yug rogu kiin gen neehn ciehr ge meeny piny yihr nyoge ni. 16 Wa kwaad kaa apuohnyu Ciig Beer ge rubo ke nying kuowo yihr nyoge, e kwaad puohny gihru noono wiiha utihngu maalo cahng uduu Ngad Boadh nyoge, bang gihn ka beehdu kii ngo kedea dhe yoohn tiihyu e nuu unyoadh ngo kejea gihn atiihya kuu anahg gihn me gihr nyinge tooro. 17 Ka moogo e remo gihra uwoj piny wa gihn maa anahg piny yihr Juog beere yiiho gihru nieng piny. Nea e naa gihn uyug ree noono e cwihnya med kedea unywaaga mihn cwihny gihn nu ke wun tiehd. 18 Kedea thiow cwihnyu udhiil mihno bang gihn uyug ree ge umeehg cwihnya mihno keehd wu tiehd.

Poal Arubo Ke Timodhy Kedea Epabrodiitoj

19 Jeacuu Ruohdh gaahna gaahno kejea dhe yooh ucube yihra ne oohr Timodhy bangu piow piow beere cwihnya naa yum ke nying lum ulihnga ke nyingu. 20 Bang gihn Timodhy e naa ngaa me cwihnye ngahya kedea e naa ngaa me daahd ukonye wun ne cohg. 21 Kwaad dhaano cang par mar ngude e keede ne maany ka konye ree kii ngo abea padh me tiihye ke nying Jeacuu Kriihjto. 22 Keehd wu keedu e ngo ngahyu kaa arome cuungo yihdh nyepinye kii ngo. Kedea ngo ngahyu kaa atiihye ke an. Ngo atiihyo wa mar nyedhoohg me tiihyo ke wahn. Wa atiihyo keehde tiehd keraahyo ne puohny Ciig Beer. 23 Noono e ngo acuba yi cwihnya uoohra ngo bangu ka me cahng nea lug gihra ayug. Ka moogo e a ulony oogo wale a buu ulony oogo yi thijin. 24 Abea Jeacuu gaahna gaahno kejea a urom beehn bangu ka me cahng.

25 Ngo apara kejea ngweehn uoohra ngadu ge cuohn ne Epabrodiitoj bangu. Ngo beehda ngad wuohdo gihru maa anaa aoohru banga kedea ngo acuungo ke an yihdh giih me teeg ne kony an yi tiihy Ciig Beer. 26 Cwihnye ayuohd ne liew wun, kedea udiero kea yihdhu abaadh ke nying atwaany gihre naa alihngu. 27 Anahg atwaany me yea atooro wahy. Abea gihn me beer keter ngo abeehn Juoge ne yugo yihre, kedea padh yihre keede abea keehd an thiow e Juog lan cwihny me duohng ayuge utoore. 28 Cwihnya amada yi lum oohr ngo bangu beere cwihnyu umihno keehdo ge niidu ngo kedea beere lan aduuna doo piny. 29 Loru ngo ke med cwihny ke nying Jeacuu, bang gihn ngo beehda ngaa maa ayiih lum Jeacuu. Kwaad nyoge me wa en wuoru gen wuoro. 30 Wahye ge anaa agwaaye yi thoo adhaahr wonge anaa acej rwaahnyo bang gwiihdo yihr Ngad Boadh nyoge ke dhe yoohn kony an. A akonye ke dhe yoohn ne konyu an keehde.

2:2 2:2 Jon 13:34; 1Kor 1:10-11; Gal 6:10; Epi 5:2; 1Jon 4:12

2:3 2:3 Rom 12:10; Gal 5:26

2:4 2:4 1Kor 10:24

2:5 2:5 Jon 13:15; Rom 13:14; 15:5

2:6 2:6 Jon 1:1-2; 17:5; Judea 1:3

2:7 2:7 Jon 1:14; Rom 8:3; 2Kor 8:9; Judea 2:14, 17

2:8 2:8 Jon 10:17; Judea 5:8; 12:2

2:9 2:9 Tiihy 2:33; Epi 1:21; Judea 1:4

2:10 2:10-11 Jon 5:23; Rom 10:9; Any 5:13

2:13 2:13 1:6; Jon 15:5; Rom 7:18; 15:18; 1Kor 12:6; 15:10; 2Kor 3:5

2:15 2:15-16 1:10; Mat 5:14; 10:16; 1Kor 1:31; 2Kor 1:14; Gal 2:1-2; Epi 5:8; 1Th 2:19

2:17 2:17 Rom 15:16; 2Tim 4:6; 1Jon 3:16

2:18 2:18 3:1; 4:4

2:19 2:19 1:1

2:20 2:20 Tiihy 16:2

2:21 2:21 2Tim 4:10

2:25 2:25 4:18

2:29 2:29 1Kor 16:16, 18