2 Jon
Lovoang Sepsev Agepura At Ne Jon
Levelinga Loklox Axasep
Levenmaares 95–100 A.D.
Jon neni goxo lox axasep solo laasen teren keneng at nai lovoang neni ga malagan i. Ketla limixin akleklen at na levenaleng di doxoma i do ne Jon neni ga malagan i na levelinga. At lodoxoma atdi do, Jon ga doxoma solo lavamunepen. Kerepmo la neni goxo tong asuvos laasen teren. Keneng at levelinga ua neni ga suang na lovoang teren min neni ga lok, “latkin,” la “laxaalik mi laxamdak,” neni gam doma mu lotu la kerepmo la neni ga lipe levenasen atdi mi levelinga xerepmo. Nedik dixo xasep solo do neni ga malagan na levelinga ri limixin at lotu xopla ti lara latkin. Lentaba limixin digam doma i do ne Iesu ga vot ngan loroonan panga la goxopmen labantuxu ren. Ketla ne Jon ga malagan na lovoang kusu na sok tixirixes kepe mo lodoxoma. Neni ga tong i do ne Iesu ga vot mi labantuxu. La neni ga lok ngan bok laradi nunuan mene. Neni ne Moroa ruturun pam la laradi ruturun pam. Jon neni ga malagan i na levelinga ren mi levenanasa xerepmo.
Lengkot silok keneng at na lovoang
1:1-3 Levelinga mumu asu.
1:4-6 Labalamu ela.
1:7-11 Lempapaase aronga mumu luvuttadi loklox ase xaxarang.
1:12-13 Lavapaase abeese.
1
Lavapaase Axasep
1 * 1 Pi 5:1; 3 Jo 1:1Nenia lamgomgo at lotu. A malagan na levelinga ru, latkin soksoxolik at ne Moroa la ti laxaalik mi laxamdak taram. Nia a balamu ruturun nimi. Kopmen nenia xusuk mun, ketla nedi axap diklen levelinga ruturun at ne Moroa di balamu bok nimi, 2 mila levelinga ruturun at ne Moroa i nemen keneng at lorooro atdik la naba nemen amisik eburu midik.
3 Letaba nabalamu, lebelen tuntun, la lenmila rinedik boro at ne Temen dik, la ne Iesu Karisito, Nitna ne Moroa. La lorooro atdik naba lox asuusu levelinga ruturun la labalamu.
Levelinga Ruturun La Labalamu At Limixin Lotu
4 * 3 Jo 1:3Nenia a lok momo aleng mila nia aga ronga i do lentaba at laxamdak mi laxaalik taram di mumu asu levelinga at ne Moroa, kerekngan ne Temen dik ga tong taba dik min. 5 * 1 Jo 2:7; 3:11La monga a sing u, latkin orong, do dik tana ebalamu ela. Na xopmen leretere maxat a malagan i ru. Na leretere dik taga ronga ka i ap mo laaleng nedik taga lok ka lorooro maxat at ne Iesu Karisito. 6 * 1 Jo 5:3Lavasuun at na labalamu i lok keretna. At lorooro axap atdik ata ronga res at levelinga at ne Moroa. Mo leretere, nemi miga ronga i ap mo laaleng miga lok ka lorooro maxat i lok keretna. Lorooro atnimi na umsu mi labalamu.
7 * 1 Jo 4:1-3Buaang nedi luvuttadi sosolo arup diga vas epeseves su uto at na lavatbung menemen. Mo limixin kopmen na tong asu i dola Iesu Karisito ga vot ngan laradi ruturun. Luvuttadi xerepmo nedi lavaanat sosolo arup, la di munepen mi ne Karisito. 8 Mina lolos kusu mina lok tatao avukat luruptuvuk atnimi, la kopmen mi noxo ke aie mo lununu atnimi, la miba ruuna xobot luunun.
9 * 1 Jo 2:23Do tara ixo mumu asu levenanasa at ne Karisito, la i lox epasum i mi levenanasa vetpes, neni xopmen nat kis esogo mi ne Moroa. Ketla do tara i mumu asu levenanasa at ne Karisito, neni it kis esogo mi ne Temen dik la ne Nitna. 10 * Ep 5:11; 2 Ts 3:6Do tara i vot pasa nimi la i vaase asu levenanasa kopmen at ne Karisito, keket mita mulus ka i. La keket mita lok maraose min la mina seega rangarang i. 11 Do tara i mulus ka i, naba lok ngan dola neni i tu eburu min keneng at lempanga xakapmek teren.
Levempapaase Abeese
12 * 3 Jo 1:13-14A ruuna buaang lempapaase xusu ana tong i rinimi. Ketla axo vara i xusu ana malagan i at lovoang mi lavanga mamalagan. Kusuk mun a doxoma i do anaba vot pasa nimi, la ana epaase eburu minimi kusu nedik tanaba lok momo aleng.
13 Laxamdak mi laxaalik at netam orong di lox aonon lomomo rinimi.