1 है जैद गे परमेस्‍वरए उयुँ ओगराँवनी निताव य़ेन दान्‍यार गेतावए जो मितावराल तादी ब गेयुँ माकेःद ज़ गेदोज़्‍या। 2 गे म़ोंसी म़ोंसी दान्‍या लाज हुव य़ेनर गेऱास्‍के। परमेस्‍वरए ओपाँ गेरासथैक गेयाःत रग रग जैद ससैसिउ पाँर बरे·द गेमारासथैए। बुरू परमेस्‍वरए ओपाँ किताव उलिज़्‍याव, हितावनी ज़ सथैद परमेस्‍वरए ओङ़ाक ज़ गेदोज़्‍यावए प़ाइँ मिँराए साचो पाँ ज़ ओल्‍यो लिद यायुँल याज़ थ·रैधुज़्यार। 3 गे गेरासथैज़्‍याव पाँ ख्वारालाई कप्‍सिउ मिताव उलिकिन, नो पाँ नर्गलाव येमदा बाज़्‍यावरालाई वाज़ निताव ताज़्‍या। 4 आव मानुवा चलैज़्‍याव सैतानए परमेस्‍वरए ओपाँ माभैंःज़्‍यावरालाई मुन्‍दुक्‍यासोर याजैज़्‍याव। है जैद ज़ नोर ख्रीसए ओक्‍याँताव परमेस्‍वरए ओगेर सरैंःद्याज़्‍याव ज़गै मगैव परमेस्‍वरए ओपाँ थैन्‍या ब माथैधुर, रँःन्‍या ब मारँःधुर। 5 नो गेरासथैज़्‍याव पाँ गे सघ्योःसिन्‍याए जूँनी माःक। येसु ख्रीस ज़ गेप्रभु लिद गेरासथैज़्‍या। होए उमिननी जेय़ेन दान्‍यार जैसिद गेले। 6 किताव स्रिस्‍तील परमेस्‍वरए चुम चुमोलाई पलाँ जैक्‍यो, हिताव ज़ गे गेयुँलाई पाला पलाँ जैद ओल ओपाँनी ज़ सैंव परींसिज़्‍याव। ननी ज़ गे ख्रीसए ओक्‍याँताव सरैंःसिउ परमेस्‍वरए ओज़गैर ओगेर गेथ·रैज़्‍या। 4:6 उत १:३

7 ख्रीसए ओपाँ गेक्‍याँत ओतावए बनै ओएः ल्‍यो गदान्‍त गमे जाल झाःसिउ मिताव लिज़्‍या। है जैद परमेस्‍वरए अचम्‍बलाव ओय़ेनर ओसक्तीर इताव गमे गेक्‍याँत यारँःक, “आव ते यानी माःक, परमेस्‍वरनी ज़ ओताज़्‍याव ची ओल्‍यो,” लिद प़ाइँए थ·रैधुज़्‍यार। 8 गे काता दुखरानी गेधलिदी ब तैं मिताव ते गेमाताए, काताए आस माल्‍यो मितावर गेतादी ब गेयुँर ब गेमासतेए, 9 मिँर गेखिरी पसिद यासोसिदी ब परमेस्‍वर गेस ज़ लिज़्‍या लिद काता स्‍यासो ज़ गेमाङम्‍सिए, पछारिसिउ मितावर गेतादी ब खदम ते गेमाताए। 10 येसु सिउनी ओसोव ओसक्ती गेक्‍याँत छर्लङ्ग ज़ ओरैंःक लिद येसु उसिज़्‍याकाव ओदैव दुखर गे गेक्‍याँत ब एकम्‍न्‍या ताव ज़ लिज़्‍या। 11 गे येसुए ओय़ेनत आव गेक्‍याँत ज़ गेखिरी पसिद दिनकाव ज़ सैःना यालाँसिज़्‍याव मितावर गेलिदी ब झन ननी ज़ आव सिन्‍या म़ान्‍याल गनिसिउ गेक्‍याँत येसुनी ताज़्‍याव खर्क ज़ मासिन्‍या जुनी सतैंसिउ लिज़्‍या। 12 है जैद गे परमेस्‍वरए ओपाँ सथैज़्‍यावर नो सिन्‍या मितावल गेपरिदी ब नो जेजूँनी ज़ ताज़्‍या। ननी ज़ जे अजम्‍बरी जुनी जेदैज़्‍या। 13 किताव नो धर्मसास्‍त्रलाव तोबोए, “ङायुँ उहुबोए ज़ ङापाँज़्‍या,” है उलिज़्‍याव मिताव गे मनी गेयुँ उहुबोए ज़ गेपाँज़्‍या। 4:13 भज ११६:१० 14 गेप्रभु येसुलाई सिउनी सोचोइज़्‍याव परमेस्‍वरए ज़ जे स़ोनो गेलाई मनी तछा सोचोइद येसुस सिप ज़ ओङ़ाक जैसिरिज़्‍याव लिन्‍या गेसैंज़्या। 15 नो गेक्‍याँताव ताज़्‍याव भरी प़ाइँ जेजूँनी ज़। ननी ज़ परमेस्‍वरए उयुँ ओगराँज़्‍याव झन कुधुलाई ज़ ओतानावए परमेस्‍वरए उगुनर चेतैद उमिन ब ज़गै मगैव ज़ रैंःनाज़्‍या।

16 है जैद गे खर्क ज़ गेयुँर गेमासतेए। पाखाताव गेक्‍याँ उख्यूदी ब, गेजींलाव गेयुँ ते दिनकाव ज़ साःरो तानाज़्‍या। 17 काराव ल्‍यो ताकिन आव गेजिउत जाँवा पै गेक्‍याँत दुख उहुदी ब झन खर्क ज़ माखेम्‍न्‍या स्‍वर्गताव ज़गै मगैव पो दैन्‍याकावर गेताज़्‍या। 18 है जैद गे आव गेजिउत पाखाताव गेमीए गेरँःधुज़्‍यावदा गेयुँ थू गेमाजैए, नो भरी ते तछा यामिन ज़ म़ान्‍या ले। गेमीए गेमारँःधुज़्‍यावलाई गेयुँ हुप्‍द गेयुँ थू जैद गेनैज़्‍याव ते खर्क ज़ खेम्‍न्‍या माले।