1 अ गेनैं गेमेंर, फरी ब गेपाँ तोबो लिज़्‍या, गेजूँनी पोंखारिद्यासिच्‍यो। जेयुँ हुप्‍द जेयुँल जेरैव मिताव, प्रभुए ओपाँ प़ाइँदा चाँदो ज़ घरा·सिक, उमिन ब प़ाइँदा ओघ्योःनाक। 2 परमेस्‍वरकिन तँदाङावर स़ोनो ओपाँ सोज़्‍यावराए ल्‍योनी पाथस पुलुसो गेदैक। परमेस्‍वरए ओपाँत यायुँ माहुबोर कुधु ज़ लिज़्‍यार। 3 हितावत ब प्रभु युँ हुबो ज़ लिज़्या। है जैद जेलाई मनी प़ाइँत ज़ थ॰रिउ जैद माचाव भरिरानी जोगोइद पाथस नैचिरिज़्‍याव। 4 ‘है गेदाचिज़्याव भरी माऱास्‍द दाव ज़ जेनैज़्‍याखेहो’ लिद जेजूँनी गेप्रभुए ल्‍योदा गेयुँर हुबो ज़ लिज़्या। 5 परमेस्‍वरए जेयुँ ओल्‍योदा झन ज़ जैद ओयाचिउक, स़ोनो ख्रीस उथ॰रिउ मिताव जेलाई ब थ॰रिउर ओजैचिउक।

6 अ गेनैं गेमेंर, जेलाई गेप्रभु येसु ख्रीसए उमिननी गेअर्थैचिज़्‍या, आव गेपैचिज़्‍याव पाँर मातीज़्याव अल्सी जेनैंरानी जोगोइसिद अछतङ लिच्‍यो। 7 बुरू गे जेल्‍योङ गेलिकाव गेदोव मिताव य़ेन जे ब दोचिके। जे ज़ जेसैंज़्‍या, गे जेस गेलिज़्‍याक य़ेन दान्‍या अल्‍सैं गेमादोए। 8 सुए ल्‍योनी ब अइज़ गेमाज़्‍युए। बुरू सुलाई ज़ प़ेरैव तापरिक लिद बनै दुखस लाकनी रील य़ेन दाद गेजिउ गेङाके। 9 गेलाई चाहिज़्‍याव भरी जेल्‍योनी दैन्‍या हक ओमाल्‍योए ते माःक। खाली गे स्‍यासो घदोरक लिद गेदोव य़ेन भरी जेङ़ाक सतैंद गेयाचिके। 10 जेस गेलिज़्‍याक ब, ‘जोए य़ेन मादोव, होए ज़्‍यान्‍या ब ताज़्‍युवक,’ है दाव ज़ गेनैचिज़्‍याव। 11 हितावत ब जेनी ख्वा ख्वाराए य़ेनत यामी सैःद अइज़ च़ुसिद यानैंरालाई यारातोबोलैज़्‍यार दी लिन्‍या गेथैज़्‍या। 12 निताव मिँरालाई गेप्रभु येसु ख्रीसनी गेराअर्थैज़्‍या, याय़ेन सुरू सुरू दाद याभूँदी याज़ ओङारक। 13 जे भन्‍या गेनैं गेमेंर, चाव य़ेन दान्‍यात जेर्सा तासैःच्‍यो। 14 सुवाराए आव गेपरींज़्‍याव चिथीलाव पाँर यामाभैंःकिन जे नो मिँलाई सरेस्‍द ओय़ेनए ओल ज़ लाज मोर्नो घताक लिद ओलस खदेप तालिच्‍यो। 15 खाली नोलाई सुतुर स्‍यासो जैन्‍या ते माःक, बुरू क्‍याँए भाइ स्‍यासो जैद नोलाई सिङारो ताके।

16 अब प़ाइँ युँ होलाँ जैज़्‍याव गेप्रभुए जेलाई प़ाइँनी प़ाइँनी एकम्‍न्‍या जेयुँ होलाँ जैद ओयाचिउक। स़ोनो परमेस्‍वरए जेस ज़ बास ओदोवक।

17 ङा पावलए ङाचिथी भरित ङासही छाप ङाझाःज़्‍याव मिताव आव चिथीत ब ङासही छाप झाःद ङानै। ननी ज़ ‘ओल ज़ उपरींव ओल्‍यो’ लिन्‍या सैंन्‍या जेले।

18 जेल्‍योदा गेप्रभु येसु ख्रीसए उयुँ ओगराँक।