8
1 नो साऊलए मनी, ‘आवलाई सैःन्या ज़’ लिद नोरास तयुँ ज़ ओजैज़्याव।
साऊल मन्दलीए उखिरी उपसिउ
हो छ्यामकिन ज़ यरूसलेम सहरलाव मन्दलीए उखिरी बनै पसिनाकेर। हुनी ज़ नोर प़ाइँ यहूदिया स़ोनो सामरिया खन्दल धोंःद रा·सिनाकेर। येसुए ओसाचीर वाज़ यरूसलेमल रहिकेर। 2 हाः बेलाक फरी, धर्मी मिँराए स्तिफनसए ओमोरोलाई बनै घरे घरे लाँद गादैकेर। 3 साऊलए ते मन्दलीलावरालाई बनै ज़ हाप हाप ख्याद झ़िम झ़िमक बाद खेपा मेंमा प़ाइँलाई ज़ क्योःद स़ेले स़ेले लाँद झ्यालखानाल ओराझाःज़्याव।
येसुए ओपाँ सामरियाल ओथासो
4 नो यरूसलेमनी धोंःद बावर प़ाइँदा रा·सिद जोङ याकेस्दी ब येसुए ओपाँ यारासथैकेर। 5 फिलिपए सामरिया सहरल बाद परमेस्वरनी हुव ख्रीसए उजूँनी यासथैक्यो। 6 नलाव मिँराए नोए ओपाँर थैद अचम्बलाव ओदोव य़ेनर रँःद ओपाँ बनै चावस थैकेर। 7 माचाव पुरूसर कुधु मिँराए याक्याँतिन बनै चिर चिर क़िद पुलुस्द याबाज़्याव, स़ोनो याखँ याकुइ सिउर, दूँदार यागराँज़्याव। 8 है जैद नो सहरल मिँर बनै ज़ यारेंज़्याव।
सिमोन धामी
9 नो सहरल तोबो सिमोन यादोज़्याव बनै उमिन थासो धामी ब उलिज़्याव। नो बनै सघ्योःसिद ओमन्तर तन्तरए सामरियालाव मिँरालाई ङ़ादाकिन ज़ अचम्ब जैद ओरानैज़्याव। 10 घेप्पा ज़िम्ज़ा मिँराए नोलाई बनै घ्योःव थ·रैद, “आव ज़ ची ओल्यो, परमेस्वरए ओसक्ती ल्यो मिँ,” है यालिज़्याव। 11 है जैद कुधु बर्स पै ओमन्तर तन्तरए अचम्ब ओराजैवए, प़ाइँए ज़ यामानिज़्याव।
12 हाःत ज़ फिलिप यासहरल हुद येसु ख्रीसए उमिननी परमेस्वरए ओराज्यालाव चाव था ओरासथैक खेपा मेंमार कुधु ज़ ओपाँर भैंःद ऱील सछैंसिकेर। 13 ओल सिमोन धामी मनी परमेस्वरए ओपाँत उयुँ हुप्द सछैंसिके। ओसछैंसिउ छींनी फिलिपस आदा होदा सिप सिप लिद फिलिपए ओदोज़्याव अचम्बलाव सरेसर य़ेनर रँःद बनै ज़ अचम्ब ताद उलिज़्याव।
14 छींनी यरूसलेमल लिज़्याव येसुए ओसाचीराए ‘सामरियालाव मिँराए मनी परमेस्वरए ओपाँ भैंःद लेर दी’ लिन्या याथैवत पत्रुस स़ोनो यूहन्नानिलाई नदा यारापरींकेर। 15 नोनी नङ बाद नोरालाई छैंव पुरूस दैन्याए जूँनी परमेस्वरस पोंखारिद ऩिद याराएकिनी। 16 हाःपै छैंव पुरूस याक्याँत ओमाहुताव, नोर प्रभु येसुए उमिननी वाज़ सछैंसिद यालिज़्याव। 17 है जैद नोनी निकुइ याक्याँत नैद्याद निपोंखारिक छैंव पुरूस दैकेर।
18 नो सिमोन धामीए अइज़ निकुइ नैद निरायोनी ज़ नो पुरूस उहुज़्याव रँःद, होक ज़ ओपैसार हाइद, 19 “दे ङास़ेरनी, निताव सक्ती ङालाई ब याव ताके। ङा मनी मिँराए याक्याँत ङाकुइ नैद ङाराएक छैंव पुरूस ओदैरक,” है उलिक ते, 20 पत्रुसए, “नो नपैसा नँस ज़ ओम़ाक। नँ है नलिज़्याव मिताव परमेस्वरए ओअसिक ज़ खर्क पैसाए लँःद ओदैसिज़्याव? 21 नँ नयुँ परमेस्वरकिन तँदा ओतावए आव पाँत नजुँ काता ज़ दैन्या नमाले। 22 आव दोव नपैंज़्याव माचाव य़ेननी नयुँर त़ोद परमेस्वरलाई पोंखारिद माफी ऩिके, कसा नपाप क्याल्द माईंव। 23 माछैंव य़ेनत नयुँ मानैधुद पापल सुर्सिउ मिताव नलिज़्या,” है दोक्यो।
24 हाःत ज़ सिमोन बनै छे·द, “जिन ज़ परमेस्वरलाई पोंखारिद्याव ताके। आव है जिन्लिज़्याव मिताव काता ज़ ङाक्याँत ताताक,” है लिद बिन्ती दोक्यो।
25 नकिन पत्रुस स़ोनो यूहन्नानी नो सहरल परमेस्वरए ओपाँ बनै चावस थ·रैद पलास्द निरायोत, फरी नोनी ननी पुलुस्द सामरियालाव नाखार याल चाव था सथैए सथैए यरूसलेमदा ओल्द बाकिनी।
फिलिप इथियोपियालाव मन्त्रीस ओदैसिउ
26 हाःत ज़ परमेस्वरए ओचाकर्या फिलिपए ल्योक सरैंःसिद, “नँ आनी बाद नो दखिनलाव यरूसलेमनी झरिद नाङग्या पात्या बनलाव घ्याँ गाजा सहरदा बाज़्याव येमदा बान्के,” है ओदोव प़ाइँना ज़, 27 फिलिप च्याँःसिद बाके। नो येमत ओबाज़्याक नक तोबो इथियोपिया देसलाव सिङारू मिँ ब नदा ज़ ओबाज़्याव। नो मिँ इथियोपियालाव माहारानी कन्दाकीए ओपैसा चलैज़्याव मन्त्री ओल्यो। नो यरूसलेमल बाद ध्यान दाद, 28 उझ़िमदा ओल्द ओबाज़्याव। नो मिँ उगद्दील च़ुसिद यसैया अगमबक्ताए ओसरो पोस्तोको उप़रिज़्याव। 29 हाःत ज़ परमेस्वरए उपुरूसए फिलिपलाई, “नँ नो गद्दीलाई दैनाद नोस बान्के,” है ओदोक ते, 30 फिलिपए नोलाई धोंःनाद ओदैनाक नो मन्त्रीए यसैया अगमबक्ताए ओसरो पोस्तोको उप़रिज़्याव थैद, “नो नप़रिज़्यावए ओअर्थ नमाबुझिज़्या?” है ओदोक ते, 31 नो मन्त्रीए, “ङालाई पैन्या मिँ माल्यो। कै जैद ङाबुझिधुरिज़्याव?” है दाद, फिलिपलाई ओलस च़ुसिउ परींक्यो।
32 नो धर्मसास्त्रलाव उप़रिज़्याव खन्द आव ज़ ओल्यो,
“पल्ना यालाँज़्याव बेधा माँःती नोलाई ब लाँकेर।
याएन्ज़्याव पाथा ओमाक़िज़्याव मिताव
नो मनी घाइ ज़ मालिके।
33 बिनु न्याय ज़ बीज्यात जैकेर।
ओललाई ज़ यासफ्या·वए,
ओथोर कातानी ची यारैंःरिज़्याव?” 8:32-33 यसै ५३:७-८
34 नो मन्त्रीए फिलिपलाई, “ङालाई है दाँके, अगमबक्ताए आव पाँर ओल उजूँनी ओपाँव सैं छुतए उजूँनी ओपाँव?” है ओदोक ते, 35 फिलिपए, “आव भरी येसुए ओक्याँत ताव पाँर ज़,” लिद नो धर्मसास्त्रलाव खन्दनी ज़ येसुए उजूँनी चाव था पलास्दिक्यो।
36 येमत निबाज़्याक तोबो ऱी लिज़्याव पोक निहुवत नो मन्त्रीए, “दे आक ऱी लिज़्या, ङा नल सछैंसिन्या माताज़्या?” है ओदोक ते, 37 [फिलिपए, “नँ येसुए ओपाँत नयुँ उहुप्किन, ताए ज़,” है दोक्यो। हाःत ज़ नो मन्त्रीए, “येसु ख्रीस परमेस्वरए साचो ओज़ा ज़ लिद ङायुँ हुबो ज़ लिज़्या,” है दाद,] 38 नो गद्दी चलैज़्यावलाई अदैव परींद नोनी ऩेब्लो ऱील बाद फिलिपए मन्त्रीलाई होक ज़ सछैंक्यो। 39 नोनी ऱीनी निपुलुसो प़ाइँना परमेस्वरए उपुरूसए फिलिपलाई क्योःद छुतदा ज़ लाँक्यो। मन्त्री ते बनै रेंए रेंए उझ़िमदा बाद फिलिपस फरी मादैसिकिनी।
40 नकिन फिलिपए ओल ओक्याँलाई अस्दोद सहरल दैद नजीदाङाव नाखार नाखार भरिल बाद कैसरिया सहरक पै चाव था यासथैक्यो।