1 ङा जेजूँनी बनै धामा ङादोज़्‍याव ब सैंच्‍यो। खाली जेलाई वाज़ माःक, जे मिताव ङामादैसिताव लाउदिकिया सहरलावर स़ोनो छुत छुत नाखारलावराए जूँनी ब ङादोज़्‍या। 2 ङा जेस ङापैंज़्‍याव भरी आव ज़ — जे जेल खैद जेयुँर झेंःव ओताक, स़ोनो परमेस्‍वरए कप्‍सिउ ओपाँए ओअर्थ भरी तीद नो पाँत यायुँर झन ज़ उहुप्‍नाक है ङालिज़्‍या। नो पाँए ओअर्थ भरी ओल ख्रीस ज़। 3 परमेस्‍वरए उबुद्धी स़ोनो ओग्‍यान भरी ख्रीसए ओक्‍याँत ज़ दैसिज़्या। 4 है जैद फसङ्गैन्‍या पाँर जती मोहोन्‍यालो उलिदी ब जे सु ज़ नो पाँरानी ताझुकिच्‍यो लिद ङा है ङादाचिज़्या। 5 ङा आव ङाक्‍याँ जेस ओमालिदी ब ङायुँ ते जेस ज़ लिज़्‍या। है जैद ख्रीसए ओपाँत मुइलिउर थ॰रिउर जेलिज़्‍याव थैद ङायुँ रेंव ज़ लिज़्‍या।

6 है जैद किताव ख्रीस येसुलाई प्रभु ज़ लिद जेभैंःव हिताव ज़ दोनाच्‍यो। 7 स़ोनो नो जेपैसिउ पाँत जेयुँ थ·रैद ख्रीसए ओक्‍याँत पाथ परिद जेयुँ झन ज़ सुहुप्‍नाद धन्‍याबाद चरैःव ज़ नैच्‍यो।

8 जेलाई सुवाराए फसङ्गैन्‍या बुद्धीनिकाव पाँर यासथैचिकिन ननी ताझुकिच्‍यो। नो अऩाकलाव पाँर मिँराए याथितीनी ससैसिउर वाज़ लिज़्‍यार। नो पाँ ख्रीसए उजूँनी माःक, अइज़ सिर्जैसिउ पाँर वाज़ लिज़्‍यार। 9 परमेस्‍वरए साचो ओगे भरी मिँ मिन्‍सिउ ख्रीसए ओक्‍याँत ज़ लिज़्‍या। 10 नो ख्रीस प़ाइँ सक्तीर स़ोनो घेप्‍पाराए याङ़ैताव लिज़्‍या। होस तोबो ताद वाज़ जे मनी यो·वर ताद जेले।

11 जे मिँए उकुइनी क्‍याल्‍न्‍या सरेस जैसिउर माःक, ख्रीसनी जैसिउर ची। नो ख्रीसनिकाव सरेसनी ते पाप दाव परींज़्याव ङ़ादाकिनकाव जेक्‍याँनी फुर्सुल तावर जेलिज़्या। 12 ख्रीसए उमिनत जेसछैंसिक नो ङ़ादाङाव जेक्‍याँलाई खादरल जेझाःके। ख्रीसलाई सिउनी सोचोइज़्‍यावए जेलाई मनी जेयुँ जेसुहुबोए साःरोल रैचिक्‍यो। 13 जे ङ़ादा क्‍याल्‍न्‍या सरेस माजैसिज़्याव, मादान्‍या य़ेनर दोज़्याव छुत जातलाव मिँर जेतावए परमेस्‍वरनी सिउल गनिसिउर जेल्‍यो। हैदी ब ख्रीसस साःरो जुनील रैचिक्‍यो। परमेस्‍वरए गे प़ाइँए गेपाप क्‍याल्‍द्याद, 14 नो ङ़ादाङाव मादान्‍या गेदोव गेङ़ैताव रिन भरी ख्रीसस क्रुसत तङ्गैद फो·द्यासिक्‍यो। 15 नो क्रुसत ज़ सैतानलाई ओचाकर्‍यारास हारैद यासक्ती भरी हाइद्याद प़ाइँए रँःन्‍यात यापाहा झाःद याएक्‍यो।

16 है जैद जेलाई ज़्‍यान्‍या ओन्‍याराए जूँनी स़ोनो बारिन्‍या बारर मानिन्‍या पर्बराए जूँनी जे जेखार्ल सुए सुलाई ज़ कर लैसिन्‍या ताताक। 17 नो भाःकिनकाव चलनर हुन्‍या पाँए ओसाँए जूँनी वाज़ उलिज़्‍याव। नो साँए साचो ओक्‍याँ ख्रीस ज़। 18 तँनिकाव यापाँरानी सुए ज़ जेलाई ख्रीसनिकाव जेदैव बाजीलाई चुकैव तादैरक। नोराए यापाँ आव ज़ — मुइलिउ मिताव जैसिन्‍या, नमताव चाकर्‍याराए यातपस दान्‍या स़ोनो झजल्‍किद कातार रँःन्‍या। ननी ज़ या ब सघ्योःसिद, 19 प़ाइँराए ङ़ैताव ख्रीसलाई ऱास्‍ज़्‍यार। गे ओक्‍याँत लिज़्‍यावर ते ओल ख्रीसस जोरैसिद गेर्सा गेमिन भरी ननी ज़ ताद परमेस्‍वरए ओपैंज़्याव मिताव यादा ज़ गेतानाज़्‍या।

20 जे भाःकिनकाव थालिसिउ पाँर ऱास्‍द ख्रीसस सिप ज़ जेसिउ ताकिन कै जैद नो मानुवाताव मितावर ताद नो ऱास्‍सिउ चलनदा फरी बान्‍या? 21 नलाव पाँर ते जम्‍मा ‘ताज़्‍युच्‍यो, ताछुच्‍यो, ताचलैच्‍यो’ है लिन्‍यार वाज़ लिज़्‍यार। 22 नोर अइज़ चिद खेम्‍न्‍यार वाज़ लिज़्‍यार। भाःकिनकाव मिँराए यादोहुव चलन वाज़ लिज़्‍या। 23 नो चलनर मानिज़्यावर धर्म-कर्म दाव ज़ लिज़्‍यार, मुइलिउ मिताव जैसिउ ज़ लिज़्‍यार स़ोनो याक्‍याँलाई दुख याव ज़ लिज़्‍यार। रँःक ते नो मिँर यागहक ल्‍यो स्‍यासोर ज़ रैंःज़्यार। खाली निताव चलनराए ते यायुँए ओपैंज़्याव माचाव पाँलाई मावैंधुवर।