1 नकिन जाँवाक प्रभुए उसिसराकिन छुतर सत्तरी जनालाई खतैद ऩेबरें ऩेबरें जैद ओल ओबारिज़्‍याव पो पोङ ङ़ादा बान्‍या याजैक्‍यो। 2 नोरालाई दुप्‍द है यादोक्‍यो, “तामर चिकार यामींःनाव मिताव, परमेस्‍वरए ओराज्‍याल हुन्‍यार कुधु ज़ ताद लेर। खाली नोरालाई रैन्‍या बाहोर्‍यार ते छ्या ज़ ताकेर। है जैद नोरालाई रैन्‍या मिँर ओरापरींवक लिद परमेस्‍वरलाई पोंखारिच्‍यो। 3 जे फरी जोगोइसिद बाच्‍यो, जेलाई प़र मितावराए खार्ल बेधा पाथा मितावर जैद ङापरींचिज़्‍या। 4 जेबाक पैसा ब तालाँच्‍यो, झ़ैं ब तालाँच्‍यो, पोला ब तालाँच्‍यो। काङ्क ज़ ताँपै तोंपै मालिद ज़ बाच्‍यो।

5 “जो झ़िमक जेपसिज़्‍या, ङ़ादा ‘आव झ़िमलाई चाव ओताक’ है लिच्‍यो। 6 नल घच सहिन्‍या मिँर यालिकिन, नो जेरायो असिक नोराए याक्‍याँत ज़ रहिरिज़्‍या। फरी नलावर घच मासहिन्‍यार यालिकिन, जेअसिक याक्‍याँत रहिन्‍या माले। 7 फरी जो झ़िमक ल्‍यो याचिज़्‍यार, हो झ़िमकिन आदा होदा माबाद जो याचिज़्‍यार हो ज़ ज़्‍याद ओद लिच्‍यो। जो य़ेनत तादी ब य़ेन दाज़्‍यावए ओजेला दैव ज़।

8 “फरी जो नाखारल जेबादी ब जेलाई ल्‍यो यायाचिकिन, जो मिताव ज़्‍याव याचिज़्‍यार हो ज़ ज़्‍युच्‍यो। 9 नलाव याजोरो हुवर ब यारासगराँच्‍यो। नोरालाई ‘परमेस्‍वरए ओराज्‍या सो हुरिके’ है यारादोच्‍यो। 10 फरी जो नाखारल जेलाई ल्‍यो यामायाचिकिन, दोहाक बाद, 11 ‘जेनाखारलाव गेखँताव गालो धुइरो ब आल ज़ थरैद ख्‍यानैद गेयाचिज़्‍या। खाली आव ब सैंच्‍यो, परमेस्‍वरए ओराज्‍या सो हुरिके,’ है यारादोच्‍यो। 12 ङा जेलाई है ङादाचिज़्‍या, परमेस्‍वरए फाल्‍न्‍या छ्याम नो नाखारलाव मिँराकिन बुरू सदोमलावरालाई सहिधुन्‍या तारिज़्‍या,” है यादोक्‍यो। 10:12 उत १९:२४-२८

13 “हिताव ज़ जे खोराजीन स़ोनो बेथसेदालावरालाई थैए माँतकन ज़ लिज़्‍या। जे जेरँःव परमेस्‍वरए ओसक्तीलाव य़ेनर तुरोस स़ोनो सीदोनलावराए यारँःव ताकिन आः झरी यापापए जूँनी यायुँ माचाव दाद बर्ला सुर्सिद धुलील च़ुसिद यायुँ फर्कैद यापापर ऱास्‍धुखेरहो। 10:13 यसै २३:१-१८; इज २६:१–२८:२६; योए ३:४-८; आमो १:९-१०; जक ९:२-४ 14 है जैद परमेस्‍वरए फाल्‍न्‍या छ्याम जेकिन बुरू तुरोस स़ोनो सीदोनलावरालाई सहिधुन्‍या तारिज़्‍या। 15 हिताव ज़ फरी जे कफर्नहुमलाव मिँर, स्‍वर्गत केसो मितावर जेङम्सिज़्‍या, झन नर्गल ज़ बान्‍या जेले।” 10:15 यसै १४:१३-१५

16 नकिन येसुए उसिसरालाई, “जोए जेपाँ थैज़्‍याव होए ङा ङापाँ ब थैज़्‍याव। हिताव ज़ जोए जेलाई मासुम्चिउ, होए ङालाई ब मासुम्नाव। फरी जोए ङालाई मासुम्नाव, होए ङालाई परींज़्‍यावलाई ब मासुमो,” है लिद यापरींक्‍यो।

17 छींनी नो सत्तरी जना बाद ओल्‍द याहुवत येसुए ल्‍योक बनै रेंए रेंए बाद, “प्रभु, नँ नमिननी माचाव पुरूसर ब गेपाँ धूँल ज़ ताकेर,” है यादोक ते, 18 येसुए, “सैतानलाई बिजुली मिताव नमतिन ओतेहुज़्‍याव ङारँःके। 19 ङा सैतानए ओसक्ती भरी जेधूँल ज़ जैद नैद ङायाचिए। है जैद ज़ निताव घुल स्‍यासोर बिछी स्‍यासोर जेराछिल्‍क कै मै ज़ जेमाताके। 10:19 भज ९१:१३ 20 हैदी ब ननी जे तारेंच्‍यो, बुरू स्‍वर्गत जेमिन सर्द नैसिउ उलिज़्‍यावनी रेंच्‍यो,” है यादोक्‍यो।

21 नाःत ज़ येसु छैंव पुरूसनी बनै रेंद, “अ बाबु, नाम नमलावराए याङ़ैताव, नँलाई धन्‍याबाद ङाचरैःनिज़्‍या। नँ नपाँर सैंन्‍या जैसिज़्‍यावर, याबुद्धी ल्‍यो जैसिज़्‍यावरालाई सतैंद मायाद, भाउज़ा मितावरालाई सतैंद नराएके। हैज़ बाबु, नल्‍योदा बान्‍या येम नो ज़ चाव नथ·रैके,” है लिद पोंखारिक्‍यो।

22 नकिन येसुए, “ताव भरी ङाबाबुए ङाकुइत ज़ याद नैनाव। किताव परमेस्‍वरए वाज़ ओज़ालाई सरेस्‍ज़्‍याव, हिताव ज़ ओज़ाए वाज़ परमेस्‍वरलाई सरेस्‍ज़्‍याव। है जैद ङा छुतलाई सतैंद ङाएकिन वाज़ होए परमेस्‍वर ङाबाबुलाई सरेस्‍धुज़्‍याव,” है यादोक्‍यो।

23 नकिन येसुए उसिसरालाई अलगज़ा है यादोक्‍यो, “जे जेरँःव भरी रँःज़्‍यावर असिक दैवर ज़। 24 ङा जेलाई है ङादाचिज़्या, अगमबक्तार, घेप्‍पा राजाराए ब आव जे जेरँःव पाँर रँःन्‍याए जूँनी यायुँ थू जैद ब रँःव मादैकेर, थैन्‍या युँ दाद ब थैव मादैकेर।”

25 येसुलाई जाँचिन्‍याए जूँनी, तछा कानुनलाव तोबो यागुर्बा हुद, “अ गुर्बा, ङा अजम्‍बरी जुनी दैन्‍या किताव दान्‍या?” है ओदोक ते, 26 येसुए, “मोसाए ओकानुनल किताव सर्सिउ उलिज़्‍याव, नोए ओअर्थ किताव नथ·रैज़्‍याव?” है दोक्‍यो। 27 नो कानुनलाव यागुर्बाए फरी, “ ‘जेयुँलाई आदा होदा मादुलैद, जेर्सा माम़ोंद, जेप्रभु परमेस्वरए ल्‍योदा युँ थू जैद ओललाई वाज़ मया दान्‍या,’ स़ोनो, ‘जेक्‍याँलाई किताव जेसमारिज़्‍या, नैं मेंलाई ब हिताव ज़ समारिन्‍या,’ ” है दोक्‍यो। 10:27 लेबी १९:१८; ब्य ६:५ 28 येसुए, “थिक ज़ है नदाँके। आव भरी नदोकिन ननी ज़ अजम्‍बरी जुनी दैन्‍या नले,” है ओदोक ते, 10:28 लेबी १८:५ 29 नो कानुनलाव यागुर्बाए ओल थिक उलिज़्याव सतैंन्‍याए जूँनी, “ङानैं ङामेंर कितावर तार?” है दोक्‍यो।

30 है जैद येसुए अइ लिद घर्ती तोबो झाःदिक्‍यो, “तोबो मिँ यरूसलेमनी यरीहोदा ओबाज़्‍याक चोरराए फेला पारैद, प़ोद, ओक्‍वार हाइद लाँद, ओललाई येमक ज़ लल्‍यातोरो जैद ख्‍यानैकेर दी। 31 कातानी तोबो पुजारी नो येम हुद नो याप़ोव मिँलाई रँःद झन तँनिकाव घ्याँ बाके दी। 32 फरी तोबो लेबी* 10:32 लेबी है लिन्‍या ध्‍यान झ़िमल य़ेन दोज़्याव मिँ ज़। थरलाव मिँ हुद नोए पाला नोलाई रँःद तँनिकाव घ्याँ ज़ बाके दी। 33 बल्‍ल तोबो तादादा बाज़्‍याव सामरियालाव मिँ हुद, नो याप़ोवलाई रँःद, उयुँ नाद, 34 ओल्‍योदा बाद, ओघाइर छेद्याद, वासःर झाःद, क्‍वाराए पो·द्याद, गधाहा तर्त झाःद तोबो भत्तीक लाँद पाथस नैक्‍यो दी। 10:33-34 २ इति २८:१५ 35 हो पराःती नो भत्ती वालालाई, ‘आव मिँलाई पाथस नैयो,’ है दाद चाँदीए सिक्‍का ऩेब्‍लो याद, ‘आवकिन आगल्‍या ओलागिकिन फरी ङाहुक ङायाँ,’ है दाद ख्‍यानैक्‍यो दी।”

36 नकिन येसुए नो कानुनलाव यागुर्बालाई, “नो स़ोम्‍लोरानी नो चोरराए याप़ोवए ओनैं काताकाव ताया?” है ओदोक ते, 37 नो कानुनलाव यागुर्बाए, “नो उयुँ नाज़्‍याव ज़,” है दोक्‍यो। येसुए फरी, “नँ ब बाद हिताव ज़ दोयो,” है दोक्‍यो।

38 येसु उसिसरास यरूसलेमदा याबाज़्‍याक येमक तोबो नाखारल पसिकेर। नो नाखारल मार्था यादोज़्‍याव तोबो मेंमाए येसुलाई बनै मानस उझ़िमक लाँक्‍यो। 39 मार्थाए ओबैंनी मरियम ब नल ज़ उलिज़्‍याव। नो येसुए उखँक च़ुसिद ओपाँ बनै धिद ओथैज़्‍याव। 40 मार्थाए ते ज़्‍यावर काता कातार ओजैज़्‍यावए नो पाँ थैव मादैक्‍यो। है जैद मार्था येसुए ल्‍योक बाद, “प्रभु, ङाबैंनीए आव य़ेनत ओमासघैनाज़्‍याव नरँःज़्‍याखेहो। नोलाई नँ तखेप है दाद्याव ताके,” है ओदोक ते, 41 प्रभुए, “अ मार्था माँज़ा, नँ काताए जूँनी प़ाइँत व़ीनी फुइ नताज़्‍याव? 42 खास तोबोए ओचाहित वाज़ लिज़्‍या। नो ओचाहित ल्‍यो मरियमए रैद ओनैज़्‍याव पाँ ज़। है जैद नो रैद ओनैज़्‍याव नोनी सुए ज़ मालाँधुव।”