9
Nleehano na Nluku ni Nowee
1 Nluku ahonreeriha Nowee na asaanawe amwiirelaka coo: Nnyaranace, muncereryane ni ncarace mwiilaponi. 2 Inama cothene co mwiilaponi cinkowuttettemelani ciwoovakani nyu; inama co ntakhwani, asaanuni o wirimu, inama cineepurula vathi ni ihopa co mpahari, cothene nhovahiya mmatatani mwinyu.
3 Citthu cothene cirina ukumi ni ceettaka cinkokhala coolya cinyu; toko cuvahilyakani mataakhuru, nna vaa kinawuvahani citthu cothene. 4 Nanso nhikhure inama ni iphome aya, kontha iphome aya phiri ukumi. 5 Ntthu phi ntthu nohala umwarusa iphome, pooti ukhala ya ntthu atthuna yonama, kinkoonkohaca; wo khula ntthu kinkohukhumu nlattu wokumi wa nkhwawe.
6 Ntthu nohala umwarusa iphome ya nkhwamwe,
iphome awe inhala umwarusiya ciicammo ni ntthu,
kontha, ni ilatta ya Nluku,
phipankiyawe ntthu.
7 Nanso nyu, nkhale ooyaranaca ni muncereryane. Mmwaryeele mwiilaponi ni ncaranace mommo.
8 Vano Nluku ahomwiirela Nowe, na asaanawe: 9 Nkoonani, kinkopanka nleehano naka ni nyu wamoca ni ucuulu inyu wohoolo, 10 ni citthu cothene cirina ukumi ciri ni nyu; asaanuni, inama coohuwiya ni inama co ntakhwani, citthu cothene co mwiilaponi cirina ukumi. 11 Kinapanka nleehano naka ni nyu. Itthu phi itthu irina ukumi khinhala tho wiiviya ni maasi oocara mwiilaponi. Khaanhala tho ucara maasi mwiilaponi. 12 Nluku ahopwaherera wuulumaca eeraka: Ila phi ikanyero yo nleehano naka ninoopankelaakani, ukhuma nyu mpaka citthu cothene cirineenyu, cirina ukumi; mpaka maloko othene oohoolo. 13 Nikhwii naka kiheesa mmahutteni. Ninkookhala ikanyero yo waataana waka ni ilapo. 14 Ukati unkelaka uwaana mahutte mwiilaponi ni nawaaka nikhwii, 15 vano mi kinkowuupuwela nleehano naka ni nyu wamoca ni citthu cothene cirina ukumi co khula nnanna. Maasi khaanhala tho ucara mwiilaponi wiira yiivakace citthu cirina ukumi. 16 Ukati wothene unkelaya woonnyaa nikhwii mmahutteni, kinkooweha ni kinkowuupuwela nleehano noohimala na atthu ni citthu cothene coomumula co khula nnanna, cinkhala mwiilaponi. 17 Namalihileene wuulumaca, Nluku ahomwiirela Nowee coo: Ila phi ikanyero yo nleehano nipankilyaka mi ni citthu cothene cirina ukumi mwiilaponi.
Asaana a Nowee
18 Vano asaana a Nowee yakhumile nkalawani yaari: Seemu, Kani, ni Yafeti. Kani phiri athumwanaya Kanaa. 19 Ala phaari asaana araru a Nowee. Ukhuma mwa yaayo, ilapo yothene yahokhaliya na atthu. 20 Nowee aari mayoolima, phapacenre waala ivinya yoopacera. 21 Nowee ahowurya ivinyu, ahohapaliya, ni ahokhala pwitipwiti nheemani mwawe. 22 Kaamu, athumwanaya Kanaa, ahoona uhiwara waathumwane ni ahorwaa waahimyacera asunnawe eeli yaari vate. 23 Nanso Seemu ni Yafeti yahokusaca ikacako, yaheesaca wanikhatani ni, yeettaka nttuli nttuli wiira ahoonace athumwanaya anari pwitipwiti, yahaakhuneelaca.
24 Nowee, ukati wonwilyawe muuhapaliyani, ni oonenelaka yapankilyawe mwanawe omwankaani ule, 25 aheera coo:
Kanaa holaphiya!
Unkookhala ipottha copottha ca asunnaa.
26 Aheera tho coo:
Attittimihinye Mwaneene Nluku, Nluku a Seemu!
Ni Kanaa akhale ipottha awe.
27 Nluku uncerere ncoko wa Yafeti;
uyo akhale mmaheemani mwa Seemu,
ni Kanaa akhale ipottha awe.
28 Uvira waya ucara wo maasi mwiilaponi, Nowee ahokhala nkumi myakha iminya tthaaru wo hansiini (350). 29 Mahuku othene ookumi awe, yaari myakha iminya khentta wo hansiini (950) ni ahokhwa.