1 Wumaleloni wo myakha miili, Farawoo ahaana nttora awe. Ule anoweemela nceresere mooloko Niilu. 2 Vano cahokhumaca mmoolokoni mmo imope saapa cooreera ni cooneneva, caalya nceresere mooloko. 3 Wahoolo cahokhuma mmoolokoni mmo imope tho saapa, coonanaraca ni cowoottaca, carweele utakaneela ni cikhunanaya nnye nceresere mooloko. 4 Vano imope coonanaraca nnyo ni cowoottaca nnyo cahokhura imope cooreeraca nnyo ni cooneneva nnyo. Vano Farawoo ahonwa. 5 Ahohokoleela tho urupa ni aholoha tho nttora nikina. Miphapa saapa, cuulupale ni comaana, coocara ni cooreera, cahothapuruwa ntathi mmoca. 6 Vano cahophuwela tho miphapa cikina saapa, cooyeevaca ni coowuuma mu ncasini mmo, caapahiye ni iphyoo yaakhuma wuuthakoni. 7 Miphapa cooyeevaca nnyo cahomirya miphapa saapa coocara ni comaana nnyo. Vano Farawoo ahonwa, ni ahoona wiira aari nttora. 8 Wicisuru, cinancanre cowuupuwela coonkukuryeeha, ahoruma wiihanaciya mayaahako ni mayoocuwelaca o Wiciipitu ni ahaattonkela mittora nnyo, nanso khaawo oonrye utaphulela.

9 Vano nhooleli o mahutumu ahomwiirela Farawoo: Ilelo phinoopuwelaka caaliyanlyaka. 10 Ikwaha imoca Farawoo wahorusiya na arumeyi aa eeli ni waholamula otthukiya mi ni nhooleli omayamikatthe owannyawe nhooleli omayoorontta. 11 Uhiyu mmoca, khula ntthu wa hi, aholoha nttora ni khula nttora wahaana mataphuleleliyo aya.

12 Wahoreera! Ahaawo ni hi mommo mmirawo mmoca Nheperewu, karumeya a nhooleli omayoorontta. Nahonttonkela cennye mittora cihu nnye ni ule ahotaphulela, anihimeryaka wo khula ntthu manaaya nttora awe. 13 Ni cothene cahokhumelela toko canihimenryawe. Mi kihoturuseliya nteko aka ni nkina uyo heeviya wootthukeleliya.

14 Farawoo ahoruma wiihaninya Yusufu eeraka: Awiihiye wowakuvyaa akhumihiyaka ukalapooso. Nametthileene irori nuuwara ikuwo cikina aheethoonyera wa Farawoo. 15 Farawoo ahomwiirela Yusufu: Kahaana nttora nimoca ni khaawo noorya utaphulela. Nanso kiheewa wiira we, weewaka nttora unawoorya utaphulela. 16 Yusufu ahomwaakhula: Iyo khinkhuma ni mi, nanso Nluku nawuvahani nyu ntaphulelo no nnema. 17 Vano Farawoo ahonttonkela nttora ule Yusufu: Kiholoha kineemenle nceresere mooloko Niilu. 18 Cahokhuma mmoolokoni mmo imope saapa cooreera ni cooneneva, caalya ni mooloko uyo. 19 Wahoolo cahokhuma cikina tho saapa coonanara ni cowootta. Akinoona imope coonanara mwiilaponi mothene. 20 Imope coonanara ni cowootta nnyo cahokhura imope saapa cooneneva nnyo cakhumelenle woopacera nnyo. 21 Hata cinakhuunreene, khacacuwannyaa wiira ciholya canvira cikhalaka yooyo nkhalelo uyo. Vano kahonwa. 22 Wahoolo kaholoha tho nttora nkina. Kahoona miphapa saapa, coocara ni cooreera, cathapuruwa ntathi mmoca. 23 Vano cahophuwela tho saapa coonyaala ni cooyevaca, cowumihinya ni iphyoo yooviha yakhuma muuthakoni. 24 Miphapa cooyevaca nnyo cahomirya miphapa saapa comaana nnyo. Kihaattonkela iyo acuweli, nanso khaawo oonrye utaphulela.

25 Farawoo, mwarina nttora mmoca, eera phi Yusufu. Nluku hoohimeryani Farawoo, itthu imphavelawe upanka. 26 Imope saapa cooreera nnyo, ciri myakha saapa ni miphapa saapa comaana nnyo, ciicammo ciri myakha saapa, va uri nttora mmocaru. 27 Imope saapa cowootta ni coonanara nnyo cakhumelenle uttuli waya cikina nnyo, ni miphapa saapa cohicara ni coomihiye ni iphyoo yooviha yakhuma muthakoni, ciri myakha saapa. Cinhala ukhala myakha saapa cotala. 28 Phi ciicammo toko cuuhimenryaka Farawoo, Nluku hoothoonyera itthu inhalawe upanka. 29 Myaakha saapa cooruweriya cihanle vakani uwa ilapo yo Wiciipitu. 30 Wahoolo cimmowa myakha saapa cotala. Vano ukati wothene wooruweriya ummooliyaliya, kontha itala eyo immohasara ilapo yothene. 31 Itala inhala uwa immokhala yootepa, woovikana ukati waruweriye khunhala wuupuweleliya tho mwiilaponi. 32 Nttora uhowela imaara piili Farawoo, kontha itthu ila iholakeliya ni Nluku ni immwa yakuvyaka. 33 We Farawoo umphavele nlopwana oocuwelaca ni unhele ulamulela ilapo yo Wiciipitu. 34 Farawoo waahele atthu oowehaweha, anhala utotokaniha mphantte woneethanu wo coolya co Wiciipitu nhina wo myakha saapa cooruweriya nnyo. 35 Ayo anlamuliya utotokaniha yoolya yootosa inhalaya wooryaniha ukati wooruweriya uyo, nuusunka itiriku, ni we Farawoo unlamuliya uwehawehaka ni usunkiha mmakhupini ummasittatti. 36 Yeeyo yoolya iyo inhala usunkiya eyo, phinhala ulaminya myakha cotala cinhala uwa mWiciipitu mu, wiira ilapo ihihasaryee ni itala.

37 Ala moopuwelo ala yahoncivela Farawoo na anamiruku awe othene. 38 Phimaana Farawoo ahaakoha: Nanso ninaahala umphwanya ntthu toko ula ookhalana Nnepa wa Nluku? 39 Farawoo ahomwiirela Yusufu: Toko ciinryawe wowuthonyera Nluku citthu nnya cothene, khaawo ntthu annkhili nuucuwelaca toko we. 40 We thi we unhala ulamulela inupa aka, ni uneethi aka wothene unhala wiiwelela nlamulo naa, nanso wahiceni, thi mi muulupale wowuupwaha we. 41 Ni Farawoo ahopwaherera: Kinawuuvaha nenna vaa ulamulela ilapo yo Wiciipitu yothene. 42 Wahoolo, Farawoo ahonrula nnikokhoni nneela antthittelawe nuummwariha Yusufu nnikokhoni mwawe. Aholamula uwarihiya ihaancu yoovevyaala, ni ahommwariha nkuhu wowooru nsiko. 43 Ni ahommweliha ikaaro awe yonayeeli yo omwene ni uhoolo wawe yahaawo anamakhuwela yeera: Nhule iphiro. Yusufu heesiya ulamulela ilapo yothene yo Wiciipitu. 44 Farawoo ahomwiirela tho Yusufu: Mi Farawoo, nanso wohinuulumo naa, khaawo nolamuliya upanka itthu phi itthu mWiciipitu mothene. 45 Farawoo ahommaha Yusufu ncina na Safenate-Paneya ni ahommaha nthiyana wiira akhale mwaarawe, Asenate, mwana a Potifera, nhooleli osataka yo Oni. Wahoolo Yusufu ahorwaa wonoona ilapo yothene yo Wiciipitu.

46 Yusufu aarina myakha talathini ceyarelo wapacenryawe unvarela nteko Farawoo, mwene o Wiciiputu. Uyo ahonhiya Farawoo ni ahorwaa woonoona ilapo yothene yo Wiciipitu. 47 Ukati wo myakha saapa cooruweriya, ilapo yothene yahaana yoolya yinci. 48 Yusufu ahototokaniha yoolya yalikeleliye usunkiya, yo myakha saapa cooruweriya Wiciipitu ni ahosunka mmakhupini ummaparasa khula iparasa ahototokaniha itiriku yo mmattani. 49 Commo, Yusufu ahosunka itiriku yinci, toko nhaava wompharyaa. Uyo ahohiya waalikela yoolya iyo kontha khaawo tho oorya uphima mwanlattu wowinciva.

50 Cihinaya uphiya myakha cotala, Asenate, mwana a Potifera, nhooleli osataka yo Oni, ahonnyarana Yusufu asaana eeli. 51 Oopacera uyo, Yusufu ahommaha ncina na Manasesi, eeraka: Nluku hokiliyaliha mahuviho aka othene ni inupa yothene ya apaapa. 52 Mwana onayeeli ahommaha ncina no Farayimi, eeraka: Nluku hokipanka ocayra ilapo yahuvaka.

53 Commo, cahophiya ummaleloni myakha cooruweriya Wiciipitu, 54 ni cahopacera myakha saapa cotala, toko Yusufu wahoolelihenryawe uhimya. Yahaawo itala ilapo cothene, nanso ilapo yo Wiciipitu yahaawo yoolya. 55 Wancenryaya uvola itala ilapo yothene yo Wiciipitu, uneethi wahanca unlepela Farawoo yoolya. Uyo ahaakhula atthu o Wiciipitu, eeraka: Nrwee wa Yusufu ni mpanke inhalaawe wuuhimeryani. 56 Wamwaryenlyaya itala ilapo cothene, Yusufu aholamula uhuliya makhupi ni ahopacera utumiha itiriku, aatumiheraka atthu o Wiciipitu, maana itala yahotepa. 57 Ni atthu ookhuma ilapo cothene, yammwa Wiciipitu wiira yathume itiriku wa Yusufu, kontha itala yaanvira itepaka ilapo cothene.