1 Yooyo ukati uyo Yusufu anawoolwana wiivithavitha nwo wamiithoni wa atthu othene, phimaana ahokhuwa eeraka: Mwakumihe ananrumeya ayo othene va. Co khaawo ahanle nenno nipuro nno, ukati ule Yusufu weecuwanehilyawe na asunnawe.

2 Vaavale ule ahanca wunla venci mpaka Annaciipitu wiiwa ni ihapari iyo yahophiya waFarawoo.

3 Vano aheerela Yusufu asunnawe ale: Mi Yusufu. Apaapa nannelo ahaawo akumi? Nanso asunnawe ale yahosankaca venci, mpaka woolwana umwaakhula. 4 Ni aheerelaca Yusufu asunnawe ale: Nciserace woono. Umwattameryaca waya, aheerelaca: Mi nhimeenyu Yusufu, yoole nyu munthumihileenyu arwaninyaka Wiciipitu. 5 Vano va nhicukulace ni nhiiriyelele mwanlattu nyu wookithumiha kiwaaninyaka uno, kontha Nluku aacenre wiira woopwe ukumi watthu enci, phimaana akiholihaka uno. 6 Nna nhina woomyakha miili niri nhina ntalani ilapo yothene, ni cinaahala myakha mithanu khacinhala waaliya ni hata wuruliya. 7 Nanso Nluku hokihooliha uno wiira kikhale ipyo yoomuci mwiilaponi mu ni kiwoopoleni ni wuukhikicerani venci. 8 Khannakhala thi nyu nkiwanne uno, nanso Nluku, ni hokipanka ukhala namanantthu a Farawoo ni nlamuli o uhano ni nlamuli o Wiciipitu wothene.

9 Nturuwele wowakuvyaa waapaapa ni mwaahimerye: Nohimya co mwaninyu Yusufu: Nluku mi hokipanka mwaneene ilapo yothene yo Wiciipitu. Mmwe woono, woohipica. 10 Nyu nnowokhala nttetthe wo Koseni, vakhiviru ni mi. Ukhuma nyu, asaanenyu ayo, ucuulu inyu uyo, ikhontwaa cinyu nnyo, imope cinyu nnyo ni ikaruma cinyu nnyo cothene mmwane. 11 Mi kinnowulihani kontha cinaahala tho va myakha mithano cotala. Mwahitthuneke nyu na amucinyu othene ni mihuwo cinyu cothene nnahala uhuva. 12 Cothene nnawoona ni miitho enyu, ni nhimaka Pencamii phi saahiti. Nawoona wiira khweeli thi mi kinoolumaca nnya citthu nnya. 13 Mwahimerye apaapa waneerihiyaka woolemelihiya mi Wiciipitu ni citthu cothene cinoonenyu. Ni mwaawihe apaapa woono wowaakuvyaa. 14 Vano ule ahonkapatta Pencamii nhimaawe oonlaka uno, ni Pencamii ciicammo ahonvara mmakhatani mmo ni uyo oonlaka uno. 15 Wahoolo ahaavaha alaahuma asunnawe ni othene yahoonlaca. Waculuru asunnawe ayo phoonryaya umuulumana.

16 Vano weewiiyaya uhano wiira asunnawe Yusufu ahowaca, Farawoo ni mahumu awe othene yahotteeliya. 17 Vano Farawoo ahomwiirela Yusufu: Waahimerye asunnaayo yapakhirihe mirintti nnyo asinama ayo, aturuwele ilapo yo Kanaa. 18 Ni yaturuwele woono, yaawihe athumwana na alokwaa othene. Mi kinnowavaha itthaya yomaana mWiciipitu mu ni nyu nnaahala ulawa nhakhu weelapo ila. 19 Waarume yakuse ampakhira o Wiciipitu wiira yaawiihe asaaraya, asaanaya na athumwaninyu. 20 Cihukukureheni citthu cinyu, kontha mapuro ooreera o Wiciipitu anhala ukhala awinyu.

21 Commo yahopanka asaana a Isirayeli. Yusufu ahaavaha asunnawe ampakhira ni iphika toko Farawoo calamunlyawe. 22 Wo khula ntthu ahonvaha nrintti wokuwo conaanano, nanso ni Pencamii ahomvaha makoopiri opheeta iminya ttharu ni mirintti mithanu cokuwo conaanano. 23 Athumwane ahaavelelihera inama coopakhira khumi, cinapakhinre citthu cootepa ooreera co Wiciipitu, ni inama khumi coopakhira cinakusile itiriku, mikatthe ni iphika cikina co munkwahani.

24 Wahoolo aholeehana na asunnawe, ni wakhumaya aheerelaca: Nhinyakulihane ni iphiro! 25 Yahohokolya Wiciipitu aturuwelaka wathumwanaya aneehaninya Yakoopi ilapo yo Kanaa, 26 ni yahottonkaca ihapari yiiraka: Yusufu ninlelo haawo nkumi! Khweeli yooyo phi nlamuli olapo yothene yo Wiciipitu. Vaavale nrima wa Yakopi wahomwattakyaa ni ahovittikhuwa. Ni khaalamuliya waakupali asaanawe ayo. 27 Nanso wahimeriyawe cothene calehenryawe Yusufu, ni Yakopi oonaka ampakhira yavelelihilyawe Yusufu wiira arweliye, nnepa awe wahokhala mmapuroni. 28 Isirayeli aheera: Paahi! Mwanaka Yusufu ninlelo haawo nkumi. Kinkomoona kihinakhwa.