1 Yesu ahokela tho nnsinakokani. Ahokhala wonwo ntthu oonririya ntata. 2 Vano ale yaananhottela wiira amoone ammoonihaka nihuku no ntivela wiira ankasari. 3 Yesu ahonhimerya ntthu arina ntata noonririya: Wunwe ni uwe iriyari ila va. 4 Wahoolo ahaakoha: Inoleveliya, nihuku no Ntivela, upanka itthu yooreera atthuna itthu yoonanara, woopola ukumi atthuna uhiya uharipwyaka? Ale yahomaalaca. 5 Vano, awehaka ni urusiya, ni ummweryaka nrima nlattu woturumala mirima caya, ahomwiirela ntthu: Wookole ntata. Ahookola ntata ni nna nahovona. 6 Wakhumilyaya, mafarisi yahothukumana na aHerotiyano wiira avaanele mamwiivelo.

7 Yesu ahorwaa untthiyani na owiitthuca awe, atthariyaka ni mphwinko muulupale wakhuma uKalileya, ni Yutteya, 8 uYerusalemu, uItumeya, ukhopela Yorttani, ni nceresere Tiro ni Sittoniya. Ahophwanyinya ni mphwinko muulupale, wewiilyaya itthu yaapankawe. 9 Ahaahimerya owiitthuca awe, anlokihere ikalawa yaankani, wiira hiphunyererihiye ni mphwinko uyo. 10 Woona ahaavoniha atthu enci, ni nlattu weetthu ila, ale yanawaaninya ni ikwerere wiira ankwanye. 11 Minepa coonanara, wamoonaya, caanankhoromela wamiithoni wawe ni caanakhuwa: We uri Mwana a Nluku. 12 Ule nanso anawaateliha wiira ahicuwelihe.

13 Wahoolo ahowela mmwaakoni, ni aheehana ale yatthunyawe, na ale yahomwaattamerya. 14 Ahaathanla khumi na eeli phwaavahaka ncina na amitthenka wiira yakhaleke ni Uyo, ni aarume, wiitthuciha, 15 ni yaphwanyeke ikuru yo woomola minepa coonanara. 16 Ahaathanla khumi na eeli ala: Simoni, ammahilyawe ncina na Peturu, 17 Yakopu, mwanawe Sepetteu, ni Yohani nhimaawe Yakopu, ammahilyawe ncina Powanerce, manaaya asaana utari; 18 Anteree, Filipe, Partimeu, Mateu, Tomee, Yakopu mwanawe Alfeu, Tateu, Simoni Selote, 19 ni Yutta Iskariyoti, anthumihile Yesu.

20 Waphilyaya uwaani, mphwinko wa atthu wahothukumana tho, mpaka wahinoryaya ulya. 21 Ni amawaawe, wiiwawaya itthu ila, yahokhuma wiira ammare, nlattu yeeriya: Hoolociya. 22 Ni mayowantikha, yakhuruwenle o Yerusalemu yahohimya: Hovariya ni Peelsepu. Ni thotho. Nawoomola minepa coonanara ni ikuru ca mwene a minepa coonanara. 23 Vano Yesu aheehana ni wahimerya mmalikaniheroni: Noorya cani, Sotwani umoomola Sotwani? 24 Omwene wakawaniyaka, omwene ule khunoorya ukhala. 25 ni inupa yakawanihiyaka, inupa ile khinoorya ukhala. 26 Phimaana, akhalaka Sotwani eecanihaka ikhotto mwaneene eekawanihaka, ni khanoorya ukhala tho, homala. 27 Khaawo noorya ukela inupa ya ntthu ookhomaala ni unhukhela mihakhu cawe woohipaca ummara phooryaka unhukhela wahoolo. 28 Khweeli kinawuhimeryani: Itaampi cothene ni ikufuru cothene cinkhala coromoliya na atthu, cothene cimmoleveleliya, 29 nanso, ntthu nohala ukufuru Nnepa Nttakattifu khammwa uleveleliyaka akhalakaru; nowookhala ni itaampi awe mahuku othene. 30 Ahaahimerya itthu ila nlattu yahimenrye: Ule navariya ni nnepa woonanara.

31 Vano yahophiya anumwane na asihimaawe, ni anemenle utaa, yahaaruma atthu umwihana. 32 Mphwinko wa atthu wahoonkoma ntotho wawe, atthu yahonhimerya: Ahaawo vate anumwana na asihimaa, anawuphavela. 33 Ahaakhula: Amanyi ni asihimaaka phapani? 34 Ni athetulaka miitho mwaatthu ale yanrukurenrye, aheera: Ala pha manyi na asihimaaka. 35 Ntthu nopanka utthuna wawe Nluku, ule phi nhimaaka, mwanrokoraka ni amanyi.