5
Ngandolo ni ávaikidile kudingula shidingo
1 Napanelo munkono wakunkanakono umwe aijá áikele pashiteng'u, ndyóna shidingo shavaandike nkati na panda vànamatidyenge dishelu saba. 2 Namomo ndímwona njelo wadimongo alaililila na lidi likumene aashidoni, “Nyani ávaikidile kudingula shidingo na kunamatulanga dishelu?” 3 Kanji hapagwíte ata munu jumo kuwa, mushilambo na pai wakuulula kudingula shidingo asho kulola shivé nkati mwake. 4 Napane nangu ngushindalila namene kwamwaa me kupatikananga munu ávaikidile kudingula kutwa kulola nkati mushidingo asho. 5 Kutwala jumo pakati pavanang'olo kungwaulila doni, “Haunalile! Lola, ntumi walikola limwe Yuda, ntipu umwe Daudi, nae anditema. Jojo jo, ankuulula kudingula shidingo sho na kunamatulanga dishelu dyake saba.”
6 Ling'oto ndímwona Ngandolo áshaaneka kenga andibyaigwa àimidile shing'ati shiteng'u vàntang'anadidye viumbi nsheshe na avalá vanang'olo. Jojo jo, andívanavo dimembe saba na mevo saba, alo ankwitika kuva dimumu saba dya Nnungu dyatumididye mushilambo uti. 7 Nae andyúka ndavandika kutwala shidingo ashilá shivéle munkono wakunkanakono umwe aijá áikele pashiteng'u. 8 Akapwashalele, avilá viumbi nsheshe pamo namu avalá vanang'olo ishilini na nsheshe vandíguguvalanga mpaka vyenye kundondya pai mushu mwa Ngandolo. Kula munu pakati pave andívanavo kanyembe na midamu vyashaabu vyakuumbala lubani, vyanavo ni kushwali kwavakwilimyanga. 9 Vanavo vashindaimba lwimu lwaambi vaashidoni,
“Wako ni úvaikidile kutwala shidingo
na kunamatulanga dishelu dyake
mwaa undibyaigwa na kwamyadi vyako uninshumila Nnungu
vanu vakula likola, inangodi, venentete na shilambo.
10 Undivatenda kuva utawala na vakulangalalela-shadaka kwa Nnungu wetu;
vanavo vandalangalalela mushilambo.”
11 Napanelo ndílola kutwala kwigwa lidi lyavanjelo voe, vipinga vyave vivele makumi manga vàtang'anadidye shiteng'u pamo na avilá viumbi, vanang'olo 12 vaimba pashanya po vaashidoni,
“Ávaikidile kupata dimongo na mali,
limanyilo na lyululilo,
ishima, lishangelo na litumbyangilidyo
ni Ngandolo ábyaigwe.”
13 Napanelo ndígwa kula shiumbi shivéle kuwa, mushilambo, pai, mwimanga na uti vipagwíte amo viishidoni,
“Kwake aijá áikele pashiteng'u na kumwe Ngandolo,
litumbyangilidyo na ishima,
lishangelo na utawala
vipagwe ngwengwe ngwengwe.”
14 Avilá viumbi nsheshe kushidoni, “Ame.” Bai vanang'olo avalá vandíguguvala kutwala kulipudya kwake.