15
Vyaushanga saba vyamwisho
1 Napanelo kuwa ko nindyóna shimanyikilo shinji shikumene na shakutikinikanga: vavele vanjelo saba vànyukete vyaushanga saba vyamwisho, muvyaushanga avyo ni pashiwikila popo shitundi shake Nnungu. 2 Nindyóna shinu mwaimanga yashilolo yanganikéne na moto, popo po vàimilenge avalá ve vantamíle lidimu, lishanamu lyake na inamba yalina lyake. Mmakono mwave vàkamulidile dikanyembe dyake Nnungu 3 akuno vaimba lwimu lumwe Musha ntumika wake Nnungu na lwa Ngandolo:
“Makango, vitendo vyako, vìkumene,
Umu Nnungu Wadimongo-uti.
Dindila dyaishaliya dyaumwiu,
dyàko, Umu wavenentete.
4 Da nyani ákakujopa wako Umu?
Na nyani ákaing'a lishangelo lina lyako?
Mwaa wako gweka ni wakwilimyanga,
venentete uti vandaida kwako ndalipudya,
vitendo vyako vyaishaliya vindililodya ngala.”
5 Napanelo vikapite avyo ndyóna kuwa ing'ande ya Nnungu ìshimwike yani yema yaushuda.* Yema yaushuda inkuvanavo mana kenga ni lyutu lyavashikondya malamulo kumi. 6 Mo nng'ande mo kuma vanjelo saba vávenavo vyaushanga saba. Vanavo vàgwalenge dinguvo dyakutakata dyakumalameta kutwala muvyuva vyave kulyunga mikanda vyalangi yashaabu. 7 Napanelo shiumbi shimo pakati pa avalá nsheshe andíjaula midamu saba vyashaabu kuvapa avalá vanjelo saba, midamu avyo vyùmbele shitundi shake Nnungu ánama ngwengwe ngwengwe. 8 Bai mwing'ande amulá lindyúmbala lyoi lyalishangelo lyake Nnungu pamo na dimongo dyake. Vikanava kuwikila popo avilá vyaushanga saba vyavanjelo saba, hapali áshuulula kwinjila nng'ande amo.