Ɨkalaata ɨlya kwanda ɨlya
Peeteli
Ʉwandɨlo
UPeeteli áamɨle musundikwa wa Yeesu Kilisiti, ábhasimbiiye ɨkalaata ili aBhakilisiti abha mʉ nsɨ ye mu nsiku izi bhakʉtɨ uTuluuki. Ásimbile ɨkalaata ili kʉbhagomwa, kʉnongwa ye bhakhayɨmbaga mu Wukilisiti waabho. Akʉbhakʉmbʉsya kʉtɨ uYeesu Kilisiti áyimbile, khabhɨlɨ áyimbile nhaani mʉ wɨɨkhalo waakwe ʉwa mʉ nsɨ, pe aBhakilisiti bhoope bhatɨyɨmbaje. Poope ɨnga bhakʉyɨmba nhaani, amayɨmba ganaago gatɨɨbhape amakha. ɄMʉlʉngʉ atɨbhasaye mʉ mayɨmba ganaago. UPeeteli akʉbhagomwa aBhakilisiti kʉjendeelela kʉbha nɨ njendo ɨya bhantʉ bha Mʉlʉngʉ.
| Zye zɨlɨ mu shitaabu ishi | Ʉmʉlyango |
| UPeeteli akʉbhalamʉkha aBhakilisiti | 1:1-2 |
| Akumusalifwa ʉMʉlʉngʉ ku wuposhi waabho | 1:3-12 |
| Akʉbhagomwa kʉbha bhafinjile kʉnongwa ye bhasabhuliilwe kʉbha bhantʉ bha Mʉlʉngʉ | 1:13-2:10 |
| She bhakwanzɨwa kʉbhabhombela abhalongozi, na bhe bhegiine | 2:11-3:7 |
| Kʉyɨmba kʉnongwa ɨya kʉmʉlandata uKilisiti | 3:8-4:19 |
| Kushidiima ɨshɨbhanza | 5:1-14 |
1
Ɨndamʉkho
1 Ɨne ne Siimoni Peeteli, umusundikwa wa Yeesu Kilisiti. Inkubhasimbila ɨmwe mwe musabhuliilwe nʉ Mʉlʉngʉ na kʉsaata mʉ nsɨ ɨya wujeni, mʉ Ponto, mu Galatiya, mu Kapadokiya, mu Asiya na mu Bisiniya. 2 Ɨmwe mwabha mwe bhantʉ bha Mʉlʉngʉ anza she átalile kʉbhamanya kufuma ɨmaandɨ, na kubhazelufwa kwɨ dala ɨlya Mupepu waakwe. Ziniizi zyábhombeshile ɨnga mumutinikhaje uYeesu Kilisiti, khabhɨlɨ ɨnga ʉweene abhitiilizye ɨbhanda lyakwe.* 1:2 Khabhɨlɨ ɨnga ʉweene abhitiilizye ɨbhanda lyakwe Mu shitaabu ɨsha Kufuma 24:3-8 aBhaisilaeli bhakhitilizyaga ɨbhanda lyɨ ngʼombe kʉlolesya kʉtɨ bhatitinishe ulufingo lwabho nʉ Mʉlʉngʉ. UPeeteli akʉtɨ ɨbhanda lya Yeesu shɨlolesyo sha lufingo ulupwa ʉlwa Mʉlʉngʉ na bhantʉ bhaakwe. Bhaazya Bhaebulaniya 9:18-21. ɄMʉlʉngʉ abhonjeelezye uwiila nu wutengaanu ku winji.
Ʉlʉsʉʉbhɨlo ʉlwa wuumi
3 Tʉmʉpaalaje ʉMʉlʉngʉ ʉTaata wa Mwene wɨɨtʉ uYeesu Kilisiti! Ku shisa shaakwe ɨshɨpɨtɨ akhatʉbhɨɨkha kʉtɨ tʉpaapwe akha wʉbhɨlɨ, kʉnongwa ye ámuzyusiizye uYeesu Kilisiti kufuma kʉ bhafwe. Ábhombile shɨnɨɨsho ɨnga tʉbhe nʉ lʉsʉʉbhɨlo ʉlwa wuumi, kʉtɨ 4 tʉkhaposheele ɨnsayo zye ʉMʉlʉngʉ abhabhɨshɨɨye abhantʉ bhaakwe kʉmwanya kwe naakhamu khatakʉnanjɨkha, poope kʉbhola awe kʉlala. 5 Ɨnsayo zɨnɨɨzyo zyinyu ɨmwe mwe kwɨ dala ɨlya lwɨtɨkho, mʉkʉlɨndɨɨlɨlwa na makha ga Mʉlʉngʉ. Mʉtɨlɨndɨɨlɨlwe kufishila pe mʉkhayɨwaaga uwuposhi we wʉkhayɨlolekha pi siku ɨlya kʉmpeleela.
6 Ishi seshelaji kʉ nsayo zɨnɨɨzyo zye ʉMʉlʉngʉ abhasɨbhɨlɨɨye, she poope akhabhalɨlo ɨkha yɨkʉtɨ mʉtɨbhe nu wuswimiilizu kʉ khabhalɨlo kʉnongwa yɨ ndɨngo ɨzya vɨkholo nɨɨvwo nɨɨvwo. 7 Kujimbiilila mʉ ndɨngo ziniizi kʉkʉlolesya kʉtɨ, ʉlwɨtɨkho lwinyu lwa nalyoli. Lʉkʉlɨngwa anza she bhakʉyɨlɨnga izahaabu kwɨ dala ɨlya kʉpembwa nʉ mwoto. Kʉmwɨtɨkha ʉMʉlʉngʉ kwinza nhaani kʉshɨla izahaabu, kʉnongwa ye izahaabu yɨkʉnanjɨkha. Pe shɨnɨɨsho, uYeesu Kilisiti akhayɨɨbhapa ɨmpaalo, uwumwamu nu lushindikho akhabhalɨlo khe akhayɨnza na kʉyɨlolesya apazelu. 8 Ʉweene mumuganile, she poope mutamulolile, khabhɨlɨ mumwitishile she poope mʉtakʉmʉlola. Shɨnɨɨsho mʉkʉseshela nhaani ʉlʉseshelo ʉlwa wumwamu, lwe lʉtakʉlonjekha, 9 kʉnongwa ye mʉkʉposheela uwuposhi ʉwa mooyo giinyu. Uwuposhi wʉnʉʉwo we nsɨɨbho ya lwɨtɨkho lwinyu.
10 Kʉ zya wuposhi wiinyu wʉnʉʉwo, abhakuwi bhényeleziizye nhaani ɨnga bhawaaganye. Bhákuwiilwe kʉ zya wiila wa Mʉlʉngʉ we ásɨbhɨlɨɨye kʉʉbhapa ɨmwe. 11 UMupepu wa Kilisiti we áamɨle mukaasi yaabho, ákuwiilwe kʉtɨ uKilisiti akhayɨyɨmba, pɨlongolela akhayɨbha nu wumwamu. Abhakuwi bhanaabho bhánzile nhaani kʉtɨ bhamanye ɨnongwa ziniizi zɨkhayɨbha liino na zɨkhayɨmwaga wu naanu. 12 ɄMʉlʉngʉ akhabhamanyɨsya abhakuwi bhanaabho kʉtɨ ɨnongwa zye bhakhakʉwaaga zɨtakhabhavwaga abheene, lyoli ɨmwe. Ziila zye bhálonjile zye bhábhamanyisiizye ɨmwe. Zɨnɨɨzyo zye mwálumbiliilwe na bhaala bhe bhábhalʉmbɨlɨɨye iNtumi iNyinza kʉ zya Yeesu Kilisiti. Bhoope bhábhalʉmbɨlɨɨye kʉ makha ga Mupepu uMufinjile we ʉMʉlʉngʉ ámusonteleziizye kufuma kʉmwanya. Ɨnongwa zɨnɨɨzyo zye bhoope abhakhabhɨzya bhakʉyɨgana nhaani kʉzɨmanya.
Mʉbhe nɨ njendo zye zɨtalɨ nu wubhiibhi
13 Pe shɨnɨɨsho, mʉyɨlɨnganyaaje na kʉyɨjela, mʉbhɨɨkhaje ʉlʉsʉʉbhɨlo lwinyu mu wiila we mʉkhayɨposheela akhabhalɨlo khe uYeesu Kilisiti akhayɨlolekha. 14 Mʉbhe mwe bhaana bha Mʉlʉngʉ abha lutinikho. Mʉtakhɨɨtɨshe winza kʉlandata ɨnsʉngʉkho zyinyu imbiibhi zye mwámɨle nazyo we mwáshɨɨlɨ kʉwʉmanya uwanalyoli wa Mʉlʉngʉ. 15 Lyoli anza she ʉMʉlʉngʉ we abhabhɨlɨshɨɨye mufinjile, nɨɨmwe mʉbhe mwe bhafinjile ku lyolyonti lye mʉkʉbhomba. 16 Kʉnongwa ye mu Wusimbe uWufinjile ʉMʉlʉngʉ akʉtɨ, “Mʉbhe mwe bhafinjile, kʉnongwa ye ɨne ne mufinjile.”† 1:16 Bhaazya Bhalaawi 11:44-45; 19:2; 20:7.
17 ɄMʉlʉngʉ we mʉkʉtɨ, “we Taata,” mu mpuuto zyinyu, we akʉlonga abhantʉ bhonti kʉlandatana nɨ mbombo zyabho sita wʉgabhʉlanyo. Pe shɨnɨɨsho, mumutinikhaje nhaani kʉ khabhalɨlo ɨkha khe mʉkwɨkhala mʉ nsɨ umu anza bhajeni. 18 Ɨnkʉlonga shɨnɨɨsho kʉnongwa ye mumanyile kʉtɨ ʉMʉlʉngʉ ábhatuulile ɨnga mʉtabhe nɨ njendo zye zɨtakhondeeye zye mwáposheleeye kʉ bhamaama bhiinyu. Pe atábhatuulile ku vintu vwe vɨkʉnanjɨkha anzɨ nhela ni zahaabu, 19 lyoli ábhombeeye ɨbhanda ɨlya wumwamu ɨlya Kilisiti. Ʉweene áamɨle ngatɨ nyaana yɨ ngoole ye yɨtalɨ nu wubhiibhi awe uwubhune. 20 UKilisiti wʉnʉʉyo ʉMʉlʉngʉ ámʉsabhʉʉye kʉlandatana nʉ lʉbhaatɨkho lwakwe we ɨnsɨ yɨshɨɨlɨ kʉpelwa. Ɨleelo akhagʉʉlɨla kufishila akhabhalɨlo ɨkha akha kʉmpeleela, pe akhamʉleeta na kʉmʉlolesya apazelu kʉ bhantʉ bhonti mʉ nsɨ. Ziniizi ábhombile kʉnongwa yiinyu. 21 Áyinzile kʉtɨ abhalongole mʉmwɨtɨshe ʉMʉlʉngʉ we ámuzyusiizye uYeesu na kuumupa uwumwamu, ɨnga mʉmwɨtɨshe na kʉmʉsʉʉbhɨla ʉMʉlʉngʉ.
22 Kʉnongwa ye mʉkwɨkhala kʉlandatana nɨ manyɨzyo ɨzya nalyoli kʉ zya Yeesu Kilisiti, amooyo giinyu gazelupile ɨnga mʉkhole kʉbhagana abhanholo bhiinyu mʉ lwɨtɨkho mu wanalyoli. Ishi mʉgananaje kʉ mwoyo wonti, 23 kʉnongwa ye mupapiilwe akha wʉbhɨlɨ. Kʉpaapwa kunuuku te ku bhapaafi abha mʉbhɨlɨ, kʉnongwa ye ʉwɨɨkhalo ʉwa mʉbhɨlɨ, kʉwʉmalɨlɨshɨlo wufwe. Lyoli mupapiilwe ɨnga mʉbhe nu wuumi ʉwa wiila na wiila we wukufumilana ni zwi lya Mʉlʉngʉ. Izwi lɨnɨɨlyo lɨlɨ nu wuumi, khabhɨlɨ lya wiila na wiila. 24 UWusimbe uWufinjile wʉkʉtɨ,
“Abhantʉ bhonti bhalɨ anza malaala,
nu winza waabho wʉlɨ anza meezya aga mwɨ laala.
Amalaala na meezya gakwʉma,
25 ɨleelo izwi lya Mwene lya nalyoli wiila na wiila.”‡ 1:24-25 Bhaazya Yeesaya 40:6-8.
Izwi lɨnɨɨlyo lye Ntumi iNyinza zye mwálumbiliilwe kʉ zya Yeesu Kilisiti.
*1:2 1:2 Khabhɨlɨ ɨnga ʉweene abhitiilizye ɨbhanda lyakwe Mu shitaabu ɨsha Kufuma 24:3-8 aBhaisilaeli bhakhitilizyaga ɨbhanda lyɨ ngʼombe kʉlolesya kʉtɨ bhatitinishe ulufingo lwabho nʉ Mʉlʉngʉ. UPeeteli akʉtɨ ɨbhanda lya Yeesu shɨlolesyo sha lufingo ulupwa ʉlwa Mʉlʉngʉ na bhantʉ bhaakwe. Bhaazya Bhaebulaniya 9:18-21.
†1:16 1:16 Bhaazya Bhalaawi 11:44-45; 19:2; 20:7.
‡1:25 1:24-25 Bhaazya Yeesaya 40:6-8.