1 Ɨwe ʉmanye akhinza kʉtɨ, mu nsiku ɨzya kʉmpeleela, kʉkhayɨbha amayɨmba amapɨtɨ. 2 Abhantʉ bhakhayɨyɨsajɨlaga bhɨɨbho bheene, bhakhayɨzɨgana ɨnhela, bhakhayɨyɨpaalaga na kʉyɨbaada, kumo bhakhayiligaga. Bhakhayɨlekha kubhatinikha abhapaafi bhaabho, bhakhayɨlekha kusalifwa, khabhɨlɨ te bhakhasajɨlaje ɨzya Mʉlʉngʉ. 3 Bhakhayɨbha sita lʉgano, na sita kʉkhobhoshelana, bhakhayɨbha na miibhi. Te bhakhayɨjelaje, bhakhayɨbha bhakhali, te bhakhaganzaje aminza, 4 bhakhayɨlonjelelanaga, te bhakhasajɨlaje, bhakhayɨyɨbaadaga nhaani. Bhakhayɨzɨgana nhaani ɨzya mʉbhɨlɨ, kʉshɨla kʉmʉgana ʉMʉlʉngʉ. 5 Poope she bhakhayɨlolekha ngatɨ bhantʉ bha Mʉlʉngʉ, ɨleelo mʉ wɨɨkhalo waabho bhakhayɨkhaanaga amakha gaakwe. Abhantʉ bhe bhalɨ anza bhanaabho, ʉtakhabhe nu wumanyani nabho.

6 Bhamu bhanaabho bhakʉbhala kʉbhendekha mu nyumba zya bhantʉ na kwinjila, kʉbhacheepa na kʉbhazyʉngʉʉla ɨnjeele abhantanda abhatambaalazu bhe bhalemiilwe ni mbiibhi. Khabhɨlɨ bhakʉtabhaalwa nɨ nsʉngʉkho imbiibhi ɨzya vɨkholo ivwinji. 7 Abhantanda bhanaabho, bhakʉmanyɨla ɨmanyɨzyo ɨzya vɨkholo nɨ vɨkholo, ɨleelo bhakʉpootwa kʉwaaganya uwanalyoli. 8 Abhantʉ bhanaabho bhe bhakʉbhacheepa abhantanda, bhakudindanjila uwanalyoli, anza she ʉYaane nʉ Yambʉle* 3:8 ɄYaane nʉ Yambʉle pamu bháamɨle bhalaguzi abha mʉ nsɨ ɨya Miisili mʉ khabhalɨlo khe ʉMoose akhabhefwaga aBhaisilaeli. Bhaazya Kufuma 7:11-12; 8:18-19. bhámudindanjiiye ʉMoose. Ɨnjeele zyabho zinanjishile, khabhɨlɨ bhatoliilwe kʉ zya lwɨtɨkho. 9 Ɨleelo bhatangafikha naapamu, kʉnongwa ye abhantʉ bhonti bhakhayɨyɨlolela ʉwʉlema waabho, anza she abhantʉ bháyɨloleeye ɨzya Yaane nʉ Yambʉle.

10 Ɨleelo ɨwe, ʉkhalandataga ɨmanyɨzyo zyanɨ. Umanyile akhinza shishiila she ɨne nʉneene ɨnkwɨkhala, peeka nɨ nsɨɨbho zyanɨ. Umanyile nɨ zya lwɨtɨkho lwanɨ, uwujimbiilizu waanɨ, ʉlʉgano lwanɨ, na kʉyɨgomwa kwanɨ. 11 Umanyile she nálabhile na kʉyɨmba, na zyonti zye zyánaajile kʉ nhaaya ɨya mu Antiokiya, mʉ ya Ikoniyo, na mʉ ya Lisitila she nájimbiliiye kʉyɨmba kʉʉkwo. Poope shɨnɨɨsho, ʉMwene akhantʉʉla mu zyonti. 12 Bhonti bhe bhakwanza kʉmʉsʉʉbhɨla na kumutinikha ʉMʉlʉngʉ kwɨ dala ɨlya Yeesu Kilisiti, bhoope bhatɨyɨmbaje. 13 Ɨleelo abhantʉ abhabhiibhi na bhe bhalɨ ni shisa ɨshɨ lenga, abheene bhatɨjendeelele kʉbha bhabhiibhi nhaani. Bhakhayɨkhopelaga, kumo bhoope bhakhayɨkhopelwaga.

14 Ɨleelo ɨwe amazwi ge wámanyɨɨye, ʉlɨ nu wusimishizyo kʉtɨ ga wanalyoli. Ɨwe ʉjendelelaje kwɨkhala mu mazwi ganaago, na kʉgɨɨtɨkha akhinza, kʉnongwa ye ɨwe ubhamanyile bhe bhakumanyiziizye. 15 Kufuma kʉ waana waakho, wámanyile akhinza uWusimbe uWufinjile we wungaakupa uwumanyi, ɨnga ufishile kʉwaaga uwuposhi kʉ lwɨtɨkho lwakho kwa Yeesu Kilisiti. 16 UWusimbe uWufinjile wonti wásimbiilwe ku wulongozi wa Mʉlʉngʉ. Wuyiiye kʉmanyɨzya abhantʉ, kʉbhasokha ku mbiibhi zyabho, kʉbhagolosya bhaleshe imbiibhi zyabho na kʉbhalanga zyonti zye zɨkhondeeye pamiiso ga Mʉlʉngʉ. 17 Shɨnɨɨsho pe umuntu wa Mʉlʉngʉ akʉbha na makha, khabhɨlɨ ayilinganyiinye kʉbhomba ɨmbombo zyonti inyinza.