5
Ishitaabu nɨ Nyaana yɨ Ngoole
1 Pe ɨnhalola ishitaabu kʉ nyoobhe ɨya kʉndɨɨlo ɨya wʉʉla we áyɨkhaaye pɨ tengo ɨlya shɨmwene, she shisimbiilwe mukaasi na munzi, shititizye na manhuuli saba. 2 Ɨnhalola ʉkhabhɨzya ʉwa makha, akʉbhʉzɨɨlɨzya kwi zi ɨlya kʉdandɨzya akʉtɨ, “Wu naanu we akhondeeye kʉbazʉla amanhuuli ganaago na kugubula ishitaabu?” 3 Atálɨɨpo umuntu ngaweeka, kʉmwanya awe paasɨ awe kwɨlongo, we ákhondeeye kugubula ishitaabu shɨnɨɨsho awe kʉsheenya mukaasi.
4 Pe ɨne ɨnhanda kʉlɨla nhaani, kʉnongwa ye shɨtakhalolekha ɨshɨpelwa shoshonti she shɨkhondeeye kushigubula ishitaabu awe kʉsheenya mukaasi. 5 Pe ʉmo mʉ bhasongo bhaala akhambʉʉzya akhatɨ, “Pʉʉma ʉtalɨlaje! Yeenya, ɨNsama ɨya shɨkholo sha Yʉʉda, mʉ shɨkholo sha mwene uDaudi, we atolile ibho.* 5:5 Bhaazya Yeesaya 11:1, 10. Ʉweene we akhondeeye kʉbazʉla ganaago amanhuuli saba, na kugubula ishitaabu shɨnɨɨsho.”
6 Pe ɨnhalola ɨNyaana yɨ Ngoole† 5:6 ƗNyaana yɨ Ngoole Bhaazya mu Wilulanyo ʉwa mazwi amajeni. ye yáamɨle ngatɨ mboole. Yɨmɨlɨɨye pakaasi pɨ tengo ɨlya shɨmwene nɨ vɨpelwa viila vini, peeka na bhasongo bhaala. Yáamɨle nɨ mpembe saba na miiso saba,‡ 5:6 Ɨmpembe saba na miiso saba Ɨmpembe saba shɨlolesyo kʉtɨ ʉMʉlʉngʉ mugolosu kʉ makha gaakwe. Amiiso saba kwe kʉtɨ ʉMʉlʉngʉ atakudindwa na khantʉ khokhonti kʉlola. zye Mpepu saba ɨzya Mʉlʉngʉ§ 5:6 Bhaazya Wukuwi wa Yookhani 1:4. zye azisonteleziizye mʉ nsɨ yonti. 7 Yɨkhabhala kwega ishitaabu shiila kʉ nyoobhe ɨya kʉndɨɨlo ɨya wʉʉla we áyɨkhaaye mwɨ tengo ɨlya shɨmwene. 8 We yeega ishitaabu shɨnɨɨsho, ɨvɨpelwa viila vini peeka na bhasongo bhaala amashumi gabhɨlɨ na bhani bhakhagwa shikupama pɨlongolela pa Nyaana yɨ Ngoole. Bhonti bháamɨle nɨ vɨnanda ɨvɨpɨtɨ ni mbakuuli izyi zahaabu zye zyizuuye ɨvwa kusuushizya vwe vikununshiilila. Ɨvwa kusuushizya vɨnɨɨvwo zye mpuuto zya bhafinjile.* 5:8 Abhafinjile Bhaazya mu Wilulanyo ʉwa mazwi amajeni.
9 Pe bhakhɨmba ʉlwɨmbo ulupwa bhakhatɨ,
“Ʉkhondeeye ɨwe kwega ishitaabu shɨnɨɨsho
na kʉbazʉla amanhuuli gaakwe.
Kʉnongwa ye wábholiilwe,
na kwɨ bhanda lyakho ʉkhamʉkalɨla ʉMʉlʉngʉ,
abhantʉ kufuma mʉ vɨkholo vwonti
na mʉ ndongo zyonti,
mu nyumba zyonti
na mʉ nsɨ zyonti.
10 Ɨwe we ubhabhiishile kʉbha wʉmwene
na kʉbhabhɨɨkha bhabhe bhapuutili,
ɨnga bhamʉbhombelaje ʉMʉlʉngʉ,
bhoope bhatɨtabhaale mʉ nsɨ.”
11 Pe ɨnheenya, ɨnhɨmvwa amazi aga bhakhabhɨzya abhinji nhaani bhe ʉtangabhaazya, bhalɨzyʉngʉlʉʉye ɨtengo ɨlya shɨmwene nɨ vɨpelwa viila na bhasongo bhaala. Uwinji ʉwa bhakhabhɨzya bhanaabho wáamɨle amaelufu na maelufu bhe ʉtangakhola kʉbhaazya. 12 Bhakhɨmba kwi zi ɨlya kʉdandɨzya bhakhatɨ,
“ƗNyaana yɨ Ngoole ye mboole yɨkhondeeye kʉposheela
amakha, uwudumbwe, ɨnjeele, kʉtabhaala,
ulushindikho, uwumwamu nɨ mpaalo!”
13 Pe ɨnhɨmvwa ɨvɨpelwa vwonti kʉmwanya, paasɨ, vwe vɨlɨ kwɨlongo, na mwa sʉmbɨ vɨkhɨmbaga, vɨkhatɨnjɨ,
“Ʉweene we ayɨkhaaye mwɨ tengo ɨlya shɨmwene,
nɨ Nyaana yɨ Ngoole,
bhakhondeeye kʉposheela ɨmpaalo
nu lushindikho nu wumwamu na makha gonti
wiila na wiila.”
14 Ɨvɨpelwa viila vini vɨkhɨɨtɨkha, vɨkhatɨ, “Zɨbhe shɨnɨɨsho!” Bhoope abhasongo bhaala amashumi gabhɨlɨ na bhani bhakhagwa shikupama na kupuuta.
*5:5 5:5 Bhaazya Yeesaya 11:1, 10.
†5:6 5:6 ƗNyaana yɨ Ngoole Bhaazya mu Wilulanyo ʉwa mazwi amajeni.
‡5:6 5:6 Ɨmpembe saba na miiso saba Ɨmpembe saba shɨlolesyo kʉtɨ ʉMʉlʉngʉ mugolosu kʉ makha gaakwe. Amiiso saba kwe kʉtɨ ʉMʉlʉngʉ atakudindwa na khantʉ khokhonti kʉlola.
§5:6 5:6 Bhaazya Wukuwi wa Yookhani 1:4.
*5:8 5:8 Abhafinjile Bhaazya mu Wilulanyo ʉwa mazwi amajeni.