1 Lubə ulə kullə kinlé ji-ji-tɨ kɨ̀ takul koo kəmtondoo liə; gin-é kin ɓá jḛ jꞌadɨ né madɨ ɔr-né tɔ́gɨ-ji al. 2 Né-je kɨ́ ra kɨ̀ gidɨ ngə̰y kɨ́ to né-je kɨ́ tò rɔsɔl lé, jḛ jꞌmbatɨ; jḛ jꞌra né jꞌədɨ-né kəm dow al rəm, ɓá jꞌtəl dɔ ta lə Lubə nangɨ al rəm. Ngà ta kɨ́ tɔgrɔ-tɨ ɓá jꞌtɔjɨ ndaa-tɨ rəsɨ adɨ mḛḛ dow-je lay usɨ nangɨ pɔ̰́-pɔ̰́ dɔ-ji-tɨ nɔ̰̀ Lubə-tɨ. 3 Poyta kɨ́ Majɨ kɨ́ jꞌisɨ jꞌilə mbḛ-é kinlé, kinə tò aa yə́rə́rə́ al ɓəy rəmə, to dow-je kɨ́ dꞌisɨ dꞌɔw kɨ ta koy-tɨ ɓá aa yə́rə́rə́ rɔ-dé-tɨ al tin; 4 adɨ to njémḛḛnga̰-je kɨ́ Sú kɨ́ to lubə kɨ́ dɔkaglo-tɨ kɨ́ nè kin ra-dé adɨ dɔ-dé oy mburukɨ, adɨ dꞌoo ndógɨ lə Poyta kɨ́ Majɨ lə Kristɨ, njèriɓa kɨ́ to takəm Lubə kin al. 5 Jḛ jꞌilə mbḛ ta kɨ́ sɔbɨ dɔ-ji jḛ al; Jeju Kristɨ kɨ́ to ꞌƁaɓe ɓá jꞌilə mbḛ ta liə, ə ta liə ɓá jḛ jꞌpa-né jꞌpanè: Jꞌto ngannjékulə-je lə-si. 6 Kdɔtalə Lubə kɨ́ panè: Kadɨ lo ndógɨ lo kɨ́ ndul-tɨ lé, ɓá ndógɨ mḛḛ-ji-tɨ kdɔ kadɨ jꞌgə-né riɓa liə kɨ́ ndógɨ takəm Kristɨ-tɨ.

7 Né kɨ́ majɨ kɨ́ tokɨ kində ngàngəm kinlé, jḛ jꞌotɨ rɔ-ji-tɨ kɨ́ to jo anjɨ kin, kdɔ kadɨ tò ndaa-tɨ rəsɨ kɨ́ tɔ́gɨ kɨ́ n̰a̰ kinlé ḭ rɔ Lubə-tɨ ɓɨ ḭ rɔ-ji jḛ-tɨ al. 8 Kɔ̰̀-je kɨ́ gay-gay tḛḛ dɔ-ji-tɨ ya, ngà taa tɔ́gɨ-ji al; jꞌində mḛḛ-ji dɔ rɔ-ji-tɨ al ya, ngà mḛḛ-ji gangɨ man al; 9 dꞌulə kəm-ji ndoo ya, ngà Lubə in̰ə-ji kɔgɨ al; dꞌɔtɨ-ji nangɨ rum ya, ngà ꞌtɔl-ji al. 10 Koy kɨ́ kadɨ jꞌoy kdɔ ta lə Jeju lé, jḛ jꞌotɨ rɔ-ji-tɨ kɨ̀ ndɔ-je lay kdɔ kadɨ kiskəm liə tɔjɨ-né rɔ-é ndaa-tɨ rəsɨ rɔ-ji-tɨ. 11 Kdɔtalə jḛ kɨ́ jꞌisɨ kəm lé, jꞌisɨ ta koy-tɨ kɨ̀ ndɔ-je lay kdɔ ta lə Jeju, kdɔ kadɨ kiskəm lə Jeju kàrè tɔjɨ-né rɔ-é ndaa-tɨ rəsɨ dajɨ rɔ-ji-tɨ kɨ́ njèkoy kin tɔ. 12 Adɨ koy ra kullə rɔ-ji-tɨ, ngà kiskəm ra kullə rɔ-si-tɨ tɔ.

13 ꞌNdàngɨ ꞌpanè: Mꞌadɨ mḛḛ-m, gin-é kin ɓá mꞌpa-né ta* 4:13 Pa 116:10! Kadmḛḛ kɨ́ káre-rè kin ya ra kullə mḛḛ-ji-tɨ. Jḛ kàrè jꞌadɨ mḛḛ-ji tɔ, gin-é kin ɓá jꞌisɨ jꞌpa-né ta tɔ. 14 Ə jꞌgə kɨ́ Lubə kɨ́ adɨ ꞌƁaɓe Jeju tɔsɨ ndəl lé, à kadɨ jḛ kàrè jꞌtɔsɨ ndəl natɨ kɨ̀ Jeju rəm, ɓá à kadɨ jə̰i sə-si-je jꞌa̰i natɨ takəm-é-tɨ rəm tɔ.

15 Kdɔ né-je lay kɨ́ tḛḛ dɔ-ji-tɨ kinlé, tḛḛ kdɔ majɨ lə-si, bè kdɔ kadɨ ramajɨ lə Lubə kɨ́ isɨ ree dɔ dow-je-tɨ dɔ madɨ-é-tɨ kɨ kete-kete kinlé ra adɨ dow-je n̰a̰ ya ꞌra-é-né oiyo gitɨ-gitɨ dꞌɔsɨ-né gajɨ-é. 16 Gin-é kin ɓá tɔ́gɨ-ji goto-né al. Ə kinə lé, dajɨ rɔ-ji kɨ́ ndaa-tɨ nè kin tujɨ kàrè, mḛḛ-ji kɨ́ kəy təl kɨ́ sigɨ kɨ̀ ndɔ-je lay. 17 Kdɔtalə kɔ̰̀-je kɨ́ à tḛḛ rangɨ ngày al kɨ́ dɔkaglo-tɨ kɨ́ sḛ bè kinlé, isɨ ɔw sə-ji kɨ lo riɓa-tɨ kɨ́ al dɔ lo, kɨ́ à tò sartagangɨ. 18 Beɓa jḛ lé, kəm-ji tò go né-je-tɨ kɨ́ dow oo kɨ̀ kəm-é kin al, ngà tò go né-je-tɨ kɨ́ dow oo kɨ̀ kəm-é al; kdɔtalə né-je kɨ́ dow oo kɨ̀ kəm-é lé, to né-je kɨ́ à dəə, ngà né-je kɨ́ dow oo kɨ̀ kəm-é al ɓá to né-je kɨ́ tò sartagangɨ.