9
Tepad te pegtabang te doma egpemenal
1 Wedad den kekemowan te todà a somolat kenyo tepad te pegtipon niyo te kwarta ibowang diyà te menge sakop te Timanem doton te Judiya, 2 so netegahan ko den te meibeg kaw megtabang kandan. Yan se induyun ko kenyo doton te menge otaw egpemenal ki Cristo doton te Masidonya, so doen ibeg niyo megtabang. Inikagi ko kandan kedengan te monà omay, neketagad kaw den kidoen te Gresya memegay te kwarta. Pegketaga-taga dan te meagka se pedowan niyo megtabang, keditaan dan heman meibeg megtabang. 3 Isogò ko si Tito aw menge doma ko amon tomanen niyo se pegtipon te itabang te eked a pa dateng doton, aw amon metoman se duyun ko tepad kenyo te doen ibeg niyo memegay. 4 Aw doen menge tege Masidonya tomaking kanak te pegpesalo ko doton kenyo te Korinto, simpana kitaen dan te wedà kaw peketagad, siak se meyàyà, meneng sikiyo se labi pa meyàyà so induyun ko sikiyo te neketagad kaw den. 5 Yan se doun te migsogò a kandan ki Tito kidoen te eked a pa doton, amon ipetagad dan se bowang tapay niyo impakang. Mèpiya aw tapay den iyan tiponen te eked a pa dateng doton. Ibeg ko, memegay kaw kenà lekat te leges, meneng lekat te keagka te pedowan niyo.
6 Netegahan niyo man den ini. Aw deitek se benì ipanggas, deitek heman se geniyen. Meneng aw dakel se ipanggas, dakel heman se geniyen. 7 Iling heman kenyan se otaw memegay. Keilangan lekat te ibeg te pedowan din. Medaet aw mebegat se pedowan te otaw memegay. Medaet heman aw meleges te doma otaw, so meluba se Timanem aw memegay se otaw lekat te keagka te pedowan din. 8 Timanem se mekebegay te tabang labi pa dakel diyà te lidò niyo amon doen gayed botong kenyo aw amon doen pa heman lampas ibegay niyo diyà te doma otaw nelimahan. 9 Doen kagi impesolat te Timanem tepad te eg-inangen te otaw metòlid, kagi din,
“Dakel se ipegtabang din diyà te menge otaw sagkep, aw wedad temanan te peg-inang din te metòlid.”
10 Se Timanem, yan se egpemegay te benì ipanggas aw pongo heman kànen. Aw doen kepulukan niyo, togpoan kaw din te labi pa dakel amon labi kaw pa meketabang te doma otaw. 11 So dakel se imbegay te Timanem kenyo, mèpiya aw dakel heman se ibegay niyo diyà te doma otaw. Aw ibingen day se itabang niyo doton te menge doma otaw, ontò dan megpesiontong diyà te Timanem te pegkekinawà dan kenyan, 12 so aw doen ibegay niyo, ketebangan se menge sakop te Timanem nelimahan, aw medita heman se otaw megpesiontong diyà te Timanem. 13 Aw kitaen dan se pegtabang niyo kandan, iduyun dan se Timanem, so lekat te kebowasag niyo se pegtabang niyo kandan aw diyà te kedita te otaw. Iduyun dan heman se Timanem so egtoloen niyo se Mèpiya Indan tepad ki Cristo egseligan niyo. 14 Aw yan se inangen niyo, ontò kaw dan kedekelan te pedowan, aw gayed dan megtawal-tawal tepad kenyo so ontò mèpiya se tabang te Timanem pineokit kenyo. 15 Mèpiya aw ontò kidon megpesiontong diyà te Timanem Amay, so mèpiya se tabang din kenitadon, so insogò din se Batà din si Jesus. Eked a pekebatog meg-indan te kedalem te tabang din, so ontò iyan mèpiya.