1 Nayan, te aldaw sìyan, limowà si Jesus lekat te balay, aw dimoton te kilid te lanaw, aw nenenoo kidoen. 2 Ontò medita se otaw netipon diyà kandin, aw yan se doun te minalin sikandin doton te belangay pinondohan. Nenenoo sikandin, meneng mig-ogpà se kedita te otaw tinoledaan din doton te kilid te lanaw. 3 Penga niyan, medita se kebenalan intoladà din kandan pineokit te tegdeyanan.

Minikagi si Jesus, “Doen otaw dimoton te pawà amon menabog te benì, so yan se ketanem te pegpenanem din. 4 Pegsabog din, doen benì nesabog diyà te dalan, aw kinaen iyan te menge manok te kebenesan. 5 Doen heman benì nesabog diyà te tanà kebeto-betowan, aw wedad nael tanà kidoen. Timobò iyan te wedà kenamay, so kenà medalem se tanà. 6 Meneng pegkelangkaw te aldaw, nelanes aw nematay so wedad nael dalid. 7 Doen heman benì nesabog diyà te pinonoan te sagbet doen tigis. Timilles heman se sagbet doen tigis, aw kinelep se menge tobò aw nematay. 8 Meneng doen benì nesabog diyà te melambò tanà. Yan se timilles aw minongo. Doen minongo te ginatos, aw doen minongo te keneman aw ketlowan.”

9 Minikagi heman si Jesus, “Keilangan menenalan se kedita niyo doen telinga.”

10 Penga niyan, dimoton se menge tinoledaan i Jesus kandin, aw mig-insà dan, “Nengà lay pineokit te tegdeyanan se pegtoladà no te menge doma otaw?”

11 Timaba si Jesus, “Sikiyo se pinetega-tegahan te Timanem te kebenalan tepad te peglowan din. Meneng wedà din petega-tegahi se doma otaw te kebenalan tepad te peglowan din. 12 Se otaw kominawà te kebenalan, yan se dogangan te kebenalan amon labi pa dakel diyà te keilangan din. Meneng se otaw eked kinawà te kebenalan, yan se pegwedadan te kebenalan. 13 Yan olò pineokit te tegdeyanan se pegtoladà ko te doma otaw amon pengkey tomengteng dan, meneng eked dan kità te kedegdagan niyan. Pengkey domineg dan, meneng eked dan ketaga-taga te kebenalan. 14 Pineokit kandan, netoman se inikagi te telekeliwat te kagi te Timanem gebii si Isaias,

16 “Meneng doen den keluba niyo, so kimità kaw den aw dimineg kaw den te kebenalan. 17 Eneng-enengi niyo se kagi ko seini. Pengkey medita se telekeliwat te kagi te Timanem aw doma otaw eg-inang te metòlid gebii ibeg komità te inang ko kinità niyo, meneng wedà dan kità kenyan. Pengkey ibeg dan domineg te kagi ko dinineg niyo, meneng wedà dan dineg kenyan.”

18 “Penenalan kaw den te kedegdagan te tegdeyanan tepad te otaw nenabog te benì. 19 Se benì nesabog diyà te dalan, yan se iling te otaw domineg tepad te peglowan te Timanem meneng eked sikandin pekelabet. Penga niyan, doen inangen i Satanas amon kelibelan din se kagi te Timanem dinineg din. 20 Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba sikandin, aw tomolò sikandin kenyan te eked kenamay. 21 Meneng aw domateng se kelimahan aw pemilangen sikandin tandà te pegpemenal din te kagi te Timanem, tenanan din se pinemenalan din, so iling sikandin te tinanem wedad nael dalid. 22 Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. Meneng penga niyan, wedad ontong din so dàgen sikandin te ibeg din tomaking te ketanem te keneyonan, aw ibeg din megkeyaman amon meluba sikandin. Yan se doun te wedad ontong din diyà te kagi te Timanem dinineg din. 23 Meneng se benì nesabog diyà te melambò tanà, yan se iling te otaw domineg te kagi te Timanem, aw mekelabet kenyan. Doen ontong din iling te intanem mongo te ginatos, aw keneman aw ketlowan.”

24 Migtoladà si Jesus te doma tegdeyanan, kagi din, “Iling kani se peglowan te Timanem. Doen otaw nenanem te mèpiya kemolò te omay trigo doton te pawà din. 25 Meneng pegkedelem niyan, doen medaet otaw dimoton te pawà sìyan, aw nenanem heman te benì te sagbet onawa se bawa diyà te trigo intanem te tig-apò. Penga niyan, nesayo se otaw nenanem te medaet benì. 26 Eleg timilles se trigo aw sagbet. Meneng pegpemagting te trigo, kinità se sagbet so wedad pongo niyan. 27 Dimoton se menge sineligan te amo dan, aw mig-insà dan, ‘Ontò mèpiya se benì intanem tadon doton te pawà nikaw. Meneng kenan lekat se sagbet?’ 28 Timaba se tig-apò, ‘Yan se intanem te otaw neopal kanak.’ Penga niyan, mig-insà dan, ‘Meibeg ka lay aw pispisen day se sagbet?’ 29 Meneng minikagi sikandin, ‘Ikà niyo pa egpemispis te sagbet so mepispis heman se trigo intanem tadon. 30 Pebeyai niyo iyan tomilles. Aw domateng se aldaw te peglegani, isogò ko se menge otaw meglegani te onà dan pispisen se sagbet aw begkesen dan iyan amon sonogen. Meneng geniyen dan se trigo, aw isawol dan iyan doton te pol.’ ”

31 Migtoladà si Jesus te doma tegdeyanan, kagi din, “Iling kani se peglowan te Timanem. Doen benì ontò deitek intanem te otaw doton te pawà din. 32 Pengkey wedad ekon palos benì labi pa deitek kenyan, meneng aw tomilles iyan, labi pa iyan dakel diyà te kedita te doma intanem din. Megkedakel iyan iling te kayo, aw megsalag se menge manok kidoen.”

33 Migtoladà si Jesus te doma tegdeyanan, kagi din, “Iling heman kani se peglowan te Timanem. Aw isanged se yist diyà te dakel arina, lomebag se kedakel niyan.”

34 Gayed migtoladà si Jesus te otaw netipon pineokit te tegdeyanan tepad te peglowan te Timanem, so impeokit din te tegdeyanan se kedita te intoladà din kandan. 35 Pineokit kenyan, tinoman din se kagi te telekeliwat te kagi te Timanem gebii,

36 Penga niyan, nesayo si Jesus lekat kidoen te otaw netipon, aw minawop diyà te balay. Timaking se menge tinoledaan din aw nemoyò dan, “Indani kay aw eden se kedegdagan te tegdeyanan tepad te sagbet timilles kidoen te pawà.”

37 Minikagi si Jesus, “Se tig-apò te pawà nenanem te mèpiya benì, siaken iyan Timanem Migpekeotaw. 38 Se pawà, yan se keneyonan. Se mèpiya benì, yan se menge otaw migpesakop diyà te peglowan te Timanem. Meneng se sagbet, yan se menge sakop i Satanas. 39 Se medaet otaw nenanem te sagbet, yan si Satanas. Se kedegdagan te peglegani, yan se temanan te keneyonan, aw se otaw meglegani, yan se menge anghil. 40 Tinipon dan se sagbet aw sinonog dan. Iling heman kenyan se meinang aw domateng se temanan te keneyonan. 41 Siak Timanem Migpekeotaw se somogò te menge anghil amon melobos se peglowan ko. Tiponen dan se kedita te otaw eg-inang te salà aw egboyo te doma otaw. 42 Penga niyan, iagbel se kedita dan kidoen te apoy doton te kilot. Ontò dan megkelag doton, aw megyangget-yangget se ngipen dan tandà te kegemakan dan. 43 Meneng iling te pegsenang te aldaw, somenang heman se otaw eg-inang te metòlid aw domateng dan doton te peglowan te Amay dan Timanem. Keilangan menenalan se kedita niyo doen telinga.”

44 “Iling kani se peglowan te Timanem. Doen bolawan nenamay inlebeng doton te tanà. Nayan, doen otaw neketalà kenyan. Neluba se pedowan din, meneng todà din inlebeng, aw minolì. Penga niyan, imbeligyà din se kedita te kededònan din aw bineyadan din se tanà sìyan.”

45 “Iling heman kani se peglowan te Timanem. Doen tindiro egbayad te mèpiya kemolò te pirlas iling te peninga te bayi. 46 Nayan, doen pirlas kinità din ontò meelagà so ontò mèpiya se bawa niyan. Penga niyan, minolì sikandin, aw imbeligyà din se kedita te kededònan din aw bineyadan din se pirlas sìyan.”

47 “Iling heman kani se peglowan te Timanem. Doen pokot indagdag doton te lanaw, aw medita se kemolò te ikan nekeawop. 48 Pegkedita te ikan, inanggin iyan te otaw egpemokot diyà te kilid te lanaw amon ebaten dan se ikan. Insawol dan se mèpiya kemolò diyà te alat, meneng in-agbel dan se mededaet. 49 Iling heman kenyan se meinang aw domateng se temanan te keneyonan. Teniyen te menge anghil se otaw eg-inang te medaet aw otaw eg-inang te metòlid. 50 Penga niyan, iagbel dan se otaw mededaet kidoen te apoy doton te kilot. Ontò dan megkelag doton, aw megyangget-yangget se ngipen dan tandà te kegemakan dan.”

51 Nayan, mig-insà si Jesus diyà te menge tinoledaan din, “Nelebetan niyo lay se kedita te intoladà ko?”

Timaba dan, “Ee. Nelebetan day.”

52 Minikagi si Jesus, “Aw doen otaw biyasa te kagi te Timanem tapay insolat, aw meg-iling heman sikandin te kaling itoladà ko tepad te peglowan te Timanem, iling sikandin te otaw doen dakel kedònan gayed din eggemiten, pengkey tapay aw kaling.”

53 Nayan, penga te pegtoladà i Jesus te kedita te tegdeyanan sìyan, nesayo sikandin 54 aw minolì doton te kandin lonsod. Migtoladà sikandin doton te simbahan te Judiyo. Ontò nepela se menge otaw kidoen, aw minikagi dan, “Sebad den ini, so ontò sikandin biyasa, aw mèpiya heman se kepelahan eg-inangen din. 55 Meneng netegahan tadon te sikandin se batà te karpintiro, aw si Maria se inay din. Netegahan tadon heman se menge kedowa din si Santiago, si Jose, si Simon, aw si Judas. 56 Eg-ogpà heman se menge etebay din dini kenitadon. Ontò kidon nepela so dakel den se nebatog din.”

57 Yan nebensi dan kandin. Meneng minikagi si Jesus, “Gayed egsegmanen te doma otaw se telekeliwat te kagi te Timanem, meneng kenà sikandin egsegmanen te otaw te kandin lonsod aw menge kedowa din.”

58 Yan se doun te pilabok se kepelahan ininang i Jesus kidoen, so wedà dan pemenal kandin.