1 Manda nœ, anga angbo nœ Ayuda sœ lima ɓa lœ Yerusaleme, yé Yisu na ga tœnœ. 2 Andaa ɓa lœ ongbonœ, endje dji lima ungu kœdjutɔ kotœ azu á ɨ'ɨrɨnœ dœ o'o ama Ayuda kœdœ Betezata ndoo dœ manda gbagba nœ apata. Awa kœna ga tœ ungunœ sœ lima mindu, 3 yé aayi koɓa ndjoro lo lima lœ ala awanœ asœmœ: Ayibula, azu á tshakala ada endje ndɨ œdœ pe endjeneke á ada endje tshu. [Endje sœ lima kœkate yakpa ungunœ kœturu tœnœ; 4 gbambanœ nene, anganœ andjelu sœ lima kœjerœ tœnœ yé œ sœ lima kœturu tœ ungu. Yekane ali ayi koɓa á tshe kœjerœ ga lœ yakpa ungunœ, tshe she lima lœ koɓa nœ ye. Œdœ koɓanœ kœdœ lima koɓa gaɗe gbaa, œ katœ ye* 5.4 O'o á endje sú ga lœ oporo gbamangɨnœ asœke gugu ala anga ongboro buku nene..] 5 Anga yakoshe bale á tshe lo lima dœ koɓa ngbugu zazu bale dœ ndjokpa dœ mindu dœ amanœ votɔ (38) sœ lima kpœtœmœ. 6 Yisu wu she á tshe lo ga atɨ yé kœdji adœke œndœ ye dɨ dœ koɓa tɔpanœ kpuru, tshe kœpa fœ she adœke: «Ɓœ yindœ kœshe tœnœ ye a?»

7 Ayi koɓanœ kœgi o'o fœ she adœke: «Gbozu, mœ gugu dœ uzu á tshe kœnduru mœ ga la ngunœ lɔkɔ á yakpa ungunœ œ tetœ kœmbœrœ tœnœ nene. Mœ kœgea œrrr adœke mœ wuta ga zœ atake, anga uzu jerœ ga la nœ utshu mœ ye.» 8 Yisu pa fœ she adœke: «Aalafo, œ za kondja nœ zœ œ na ana.» 9 Trale ayi koɓa kœshe ye. Tshe áafo, œ za kondja nœ ye, yé œ tetœ ana. Andaa œrœnœ asœmœ kɔ mbœrœ lima tœ endje dœ lɔkɔ sabata. 10 Ayuda kœpa fœ uzunœ á Yisu she she adœke: «Asœke kœdœ lɔkɔ sabata, œ lili adœke ɓœ za kondja nœ zœ yé œ na ana dœ tœnœ nene.» 11 Kashe tshe gi fœ endje adœke: «Uzunœ á tshe she mœ lœ koɓanœ asœke, œshe dá pa fœ mœ adœke mœ za kondja nœ mœ, yé œ na ana.» 12 Endje kœyu she adœke: «Yakoshenœ á tshe pa fœ ɓœ adœke ɓœ za kondja nœ zœ, yé œ na ana asœmœ kœdœ œɗe e?» 13 Kashe ayikoɓanœ á Yisu she she kpa wuwu lima sœ ye nene mbœrœ tshe wuta lima œnœ ye lœ ukpulu azunœ á endje sœ lima kpœtœmœ ye.

14 Œrrr manda nœ, Yisu kœgbɔ she ɓa lœ anda Tepelo á kœpa fœ she adœke: «Wu, ɓœ she ngɔngɔ asœ ye. Kpa mbœmbœrœ ekperœ nene kparawa adœke ɓœ kpa gbɔ anga ɔgbɔ koɓa kœropa œneke nene.» 15 Yakoshe kœna, œ kœpandœ nœ fœ Ayuda adœke Yisu dá she œne. 16 Kotœ lœ kumunœ, Ayuda para lima awa kœza o'o fœ Yisu mbœrœ á tshe mbœrœ œrœnœ asœmœ dœ lɔkɔ Sabata. 17 Kashe Yisu pa fœ endje adœke: «Aba mœ sœ kœmbœrœ akwa œrrr kpesheke, yé œmœ ndje mœ sœ tœ kœmbœrœ akwa.» 18 Manda o'onœ á tshe pa asœmœ, Ayuda para lima awa adœke œne wo she. Œ dœ́dœ́ kolœ mbœrœ á tshe mbœrœ akwa dœ lɔkɔ sabata nene, kashe mbœrœ á tshe pa ndje adœke Ndjaba kœdœ adja Aba œne, á zatœ ye adœke œne li dœ she.

19 Yisu za o'o yé œ pa fœ endje adœke: «Mœ pa fœ e dœ adjapu adœke, Gbolo nœ Ndjaba lili kœmbœrœ œrœ á to tœ lɔsu ye dœ tœ ye nene, kashe tshe mbœrœ œrœ á tshe wu abanœ kœmbœrœ tœnœ. Gbambanœ nene, œrœ á Aba œ mbœrœ dá Gbolo œ mbœrœ adja tœnœ. 20 Mbœrœ Aba yindœ Gbolo, tshe sœ kœyisœ œneke kɔ á tshe mbœrœ fœ she. Tshe kpa yisœ ogboro œrœ kœropa œneke fœ she adœke 'e kœwu, uvuru 'e kpa lœ nœ. 21 Ɓata Aba œ she akuzu á za soro fœ endje, awa bale Gbolo œ za soro fœ azu neke á tshe yindœ kœza fœ endje. 22 Aba œ wa ngbanga ga tœ uzu bale nene, kashe tshe za Gbolo nœ ye tœ gbozu kœwa ngbanga pa azu, 23 adœke azu kɔ lɨsœ Gbolo ɓata á endje lɨ ndje œsœ Abanœ. Uzu á tshe kœlɨlɨsœ Gbolo nene, tshe lɨlɨ ndje œsœ Abanœ á tshe vwa she nene.

24 «Mœ sœ kœpa fœ 'e dœ adjapu adœke uzu á tshe dji o'o ama mœ, á tshe kœsœ dœ kœyindœrœ ga ndœ tsheneke á tshe vwa mœ asœke, uzunœ sœ dœ soro á ka nene. Mœ wa ɔgbɔ ngbanga ga tœ ye nene, kashe tshe wuta lœ kuzu, yé tshe sœ dœ soro. 25 Mœ pa fœ 'e dœ adjapu adœke, lɔndɔnœ sœ kœna tœnœ, yé œ na ngɔngɔ asœ ye, akuzu œ dji tshama Gbolo nœ Ndjaba. Yé endjeneke á endje dji tshama ye, endje sœ dœ soro. 26 Gbambanœ nene, ɓata Aba kœdœ soro dœ tœ ye, awa bale tshe za fœ Gbolo kœdœ soro dœ tœ ye. 27 Yé tshe za Gbolo tœ gbozu kœwa ngbanga pa azu mbœrœ œshe kœdœ Gbolo nœ uzu.

28 «Adja 'e koko ama 'e tɨ ɔsɔ nene! Gbambanœ nene, anga ɔlɔ sœ kœna tœnœ, á akuzu kɔ á endje sœ lœ koto œ dji tshama ye, 29 yeka endjeneke á endje mbœrœ lima ɔtshɔrœ, Ndjaba œ she endje mbœrœ kœgbɔ soro, kashe endjeneke á endje mbœrœ ekperœ, Ndjaba œ she endje adœke Gbolo nœ uzu wa ɔgbɔ ngbanga pa endje.

30 «Œmœ, mœ lili kœmbœrœ œrœ á to ɓa lɔsu mœ dœ tœ mœ nene. Mœ wa ngbanga kœli dœ œneke á mœ sœ kœdji tœnœ yé kœwa ngbanga nœ mœ sœ ndjii mbœrœ mœ sœsœ kœpara awa kœmbœrœ œrœ á to ɓa lɔsu mœ nene, kashe œneke á lɔsu ayi kœvwa mœ yindœ nœ.»

31 «Œdœ mœ kœpa o'o tœ upu nœ mœ dœ tœ mœ, uzu bale á tshe dji mœ gugu nene. 32 Kashe œdœ anga angbɨ uzu kœpa o'o tœ upu nœ mœ, mœ wusœ nœ adœke o'onœ á tshe pa tœ upu nœ mœ asœmœ dœ́ adja o'o. 33 'E vwa lima azu fœ Yowane, yé tshe pa lima o'o tœ upu nœ adja o'o. 34 Tœ œmœ, mœ sœsœ dœ ogo adœke uzu pa o'o tœ upu nœ mœ nene, kashe mœ sœ kœpa o'o ataa adœke 'e gbɔ kœshe. 35 Yowane sœ lima ɓata miinda á endje ta owo ga tœ nœ yé á tshi. 'E yi lima ndœ kœsœ dœ yanga lœ anga osho tœ ɨshirɨ ye. 36 Andaa, mœ sœ dœ anga œrœ á pa o'o tœ upu nœ mœ á ropa o'o á Yowane pa. Œtœnœ kœdœ akwa á Aba za fœ mœ adœke mœ mbœrœ. Mœ sœ kœmbœrœ tœnœ yé œtœnœ dá sœ kœpa o'o tœ upu nœ mœ adœke Aba vwa mœ.

37 «Aba á tshe vwa mœ pa o'o tœ upu nœ mœ dœ tœ ye. Kashe bale 'e djidji tshama ye yé 'e wuwu tshatshu ye nene, 38 yé 'e sœsœ kœgbɔndœ o'o ama ye ga tœ lɔsu 'e nene mbœrœ á 'e sœsœ dœ kœyindœrœ ga ndœ ayi avwa nœ ye nene. 39 'E sœ kœyamba Buku nœ Ndjaba mbœrœ á 'e gbe kœgbɔ soro á ka nene lœ awanœ: Andaa, œtœnœ dá sœ kœpa o'o tœ upu nœ mœ. 40 Yé 'e yiyindœ kœna ga ndœ mœ yeka á kœgbɔ adja soro nene.

41 «Mœ gbegbe adœke azu donga mœ nene. 42 Kashe mœ wusœ 'e ye. 'E sœsœ dœ kœyindœsho ga ndœ Ndjaba nene. 43 Aba mœ dá vwa mœ yé 'e vwaratœ 'e kœza osho kœsœ fœ mœ. Kashe œdœ anga uzu kœna dœ mara nœ ye dœ tœ ye bale, 'e za osho kœsœ fœ she ye. 44 'E yindœ kœdonga kolœ anga 'e, yé á endje kœdonga ndje 'e. Kashe 'e papara awa adœke kolœ Ndjaba kœdonga 'e nene asœke, ataa 'e sœ má dœ kœyindœrœ ga ndœ mœ koto o? 45 Kashe 'e gbegbe adœke mœ va ɔtɔ 'e fœ Aba mœ nene. Kolœ Moyize á 'e ko lima lɔsu 'e ga tœ ye asœmœ, œshe dá va ɔtɔ 'e. 46 Œdœ 'e kœsœ dœ kœyindœrœ ga ndœ Moyize, 'e sœ má ndje dœ kœyindœrœ ga ndœ mœ mbœrœ tshe sú mbetinœ tœ upu nœ mœ. 47 Kashe ɓata 'e yiyindœ o'o á tshe sú nene, 'e yi má ndœ o'o ama mœ koto o?»