1 Yisu kpa pa fœ endje adœke: «Lɔsu 'e tɔtɔ nene. 'E sœ dœ kœyindœrœ ga ndœ Ndjaba, yé œ sœ ndje dœ kœyindœrœ ga ndœ mœ. 2 Ɓa lœ anda nœ Aba mœ, osho kœsœ sœ ndjoro. Œ kœdœ́dœ́ má adjapu nene, mœ pa má ndœ nœ fœ 'e nene. Kashe mœ sœ kœna ɓa zœ kœguma osho á 'e kœsœ bala tœnœ. 3 Yé manda kœna mœ ndœ kœguma oshonœ fœ 'e, mœ kwa bala tœ mœ ndœ kœko 'e adœke osho á mœ sœ tœnœ; 'e sœ ndje bala tœnœ. 4 'E wusœ awa á sœ kœna ga tœ osho á mœ sœ kœna ga tœnœ ye.» 5 Toma kœpa fœ she adœke: «Gbozu, 'a wuwusœ osho á ɓœ sœ kœna ga tœnœ bale nene. Ataa 'a wu má sœ nœ kotoo?» 6 Yisu kœgi fœ she adœke: «Œmœ kœdœ awa, œmœ kœdœ adja o'o, œmœ kœdœ ndje soro. Uzu bale lili kœwuta ɓa ndœ Aba, œdœ tshe kœwuwuta ɓa ndœ mœ nene. 7 Œdœ 'e kœwu má sœ mœ, 'e wu má ndje sœ Aba mœ ye. Ngɔngɔ asœke, 'e wusœ ye, yé 'e wu ndje she ye.»

8 Á Filipo kœpa fœ she adœke: «Gbozu, yisœ Aba fœ 'a yé 'a kpa gbe dœ anga œrœ nene.» 9 Yisu kœgi fœ she adœke: «Filipo, ɓalima a sœ dœ 'e œrrr asœke, ɓœ wuwusœ mœ nene a? Uzu á tshe wu mœ, wu ndje Aba. Mbœrœ gaɗe á ɓœ pa adœke: “Yisœ Aba fœ 'a?” 10 Ɓœ yiyindœ nœ adœke mœ sœ lœ Aba yé Aba sœ lœ mœ nene a? O'o á mœ sœ kœpa fœ 'e toto lœ mœ dœ tœ mœ nene. Kashe Aba á tshe sœ lœ mœ dá sœ kœmbœrœ adja akwa nœ ye. 11 'E yindœ o'o ama mœ: Aba sœ lœ mœ yé mœ sœ lœ Aba. Œdœ 'e kœyiyindœ o'o ama mœ nene, 'e yindœ nœ kolœ mbœrœ akwanœ asœke. 12 Mœ sœ kœpa dœ adjapu fœ 'e adœke: Uzu á tshe kœsœ dœ kœyindœrœ ga ndœ mœ, tshe mbœrœ ndje akwa á mœ sœ tœ kœmbœrœ tœnœ. Tshe mbœrœ bala ndje ogboro akwa kœropa œneke, mbœrœ mœ sœ kœgu ga ndœ Aba. 13 Yé œrœ kɔ á 'e eshondœ nœ dœ ɨ'ɨrɨ mœ, mœ mbœrœ bala œtœnœ dœ mara adœke mokɔ nœ Aba matœ ye lœ Gbolo. 14 Œdœ 'e kœ'eshondœ œrœ dœ ɨ'ɨrɨ mœ, mœ mbœrœ bala œtœnœ.»

15 Œdœ 'e kœyindœ mœ, 'e mbœrœtœ 'e liaka awa o'o nœ mœ, 16 œmœ, mœ kɨ fœ Aba adœke tshe vwa anga ayi kœtɨ kane manda mœ fœ 'e, á tshe kœsœ dœ 'e awa bale waa dœ waa. 17 Œshe kœdœ Ɨshirɨ nœ adja o'o, tsheneke á tshapashɔ œ li kœza osho kœsœ fœ she nene; gbambanœ nene, tshe sœsœ kœwu she yé œ wu ndje sœ ye nene. Kashe e'e, 'e wusœ ye yé mbœrœ tshe sœ awa bale dœ 'e yé tshe sœ lœ 'e. 18 Mœ ka bala tœ 'e tɨ tœ ayasuru nene, kashe mœ sœ kœkwatœ mœ ndœ 'e. 19 Manda olo teasho, tshapashɔ œ kpa wu mœ nene. Kashe e'e, 'e wu bala mœ mbœrœ á mœ sœ dœ soro yé 'e sœ ndje bala dœ soro. 20 Dœ lɔkɔnœ asœmœ, 'e wu bala sœ nœ adœke mœ sœ lœ Aba, 'e sœ lœ mœ yé mœ sœ lœ 'e.

21 «Uzu á tshe sœ kœdji awa o'o nœ mœ á sœ kœza ga tœ akwa, sœ kœyindœ mœ. Aba mœ œ yindœ uzu á tshe sœ kœyindœ mœ. Œmœ, mœ yi bala ndœ ye yé mœ ma bala tœ mœ fœ she.» 22 Yuda (œ dœ́dœ́ Yuda Isikariote nene) kœyu she adœke: «Gbozu, mbœrœ gaɗe á ɓœ matœ zœ kolœ fœ 'a kashe fœ tshapashɔ nene a?» 23 Yisu kœgi fœ she adœke: «Œdœ uzu kœyindœ mœ, tshe lɨ bala sœ o'o ama mœ. Aba mœ œ yindœ ye yé œmœ dœ pe Aba 'a na ga ndœ ye, œ guma osho kœsœ nœ 'a ɓa ndœ ye. 24 Uzu á tshe kœyiyindœ mœ nene, tshe lɨsœ o'o ama mœ nene. O'o á 'e sœ kœdji mœ kœpa tœnœ toto lœ mœ nene kashe œ to ɓa ndœ Aba á tshe vwa mœ. 25 Mœ pa o'o asœ fœ 'e damba á mœ sœpe lima awa bale dœ 'e 26 Kashe Ayi kœtɨ kane 'e á tshe dœ́ Ɔtshɔ Ɨshirɨ á Aba œ vwa bala she dœ ɨ'ɨrɨ mœ, tshe yi bala sœ œrœ kɔ yé œ kpa pa bala ndœ œneke kɔ á mœ pa fœ 'e.

27 «Mœ sœ kœkatœ kœsœ gee fœ 'e, œtœnœ kœdœ kœsœ gee nœ mœ á mœ sœ kœza fœ 'e. Mœ zaza kœsœ geenœ fœ 'e liaka œneke á tshapashɔ œ za nene. Adja lɔsu 'e tɔtɔ nene yé awa mbœmbœrœ ndje 'e nene. 28 'E dji mœ lima kœpa fœ 'e adœke: “Mœ ro da ye, yé mœ kpa kwatœ mœ ga ndœ 'e.” Œdœ 'e kœyi má ndœ mœ, 'e sœ má dœ yanga kœwu adœke mœ sœ kœna ga ndœ Aba, gbambanœ nene Aba gerœ kœropa mœ. 29 Mœ pandœ o'onœ asœ fœ 'e ngɔngɔ asœke, utshunœ adœke œrœnœ wuta; mbœrœ lɔkɔ á kœwuta yekane á 'e kœyindœ nœ. 30 Kœto kpesheke, mœ kpa pa tshama mœ dœ 'e nene, gbambanœ nene, gbozu tshapashɔ asœ sœ kœna tœnœ. Tshe dœ́dœ́ gbozu tshapa mœ nene. 31 Kashe tshe na mbœrœ á tshapashɔ kœwusœ nœ adœke mœ yindœ Aba yé mœ sœ kœmbœrœ kolœ œneke á Aba za fœ mœ adœke mœ mbœrœ. 'E aafo dœ́ a gitœ azœ kpœke ye.»