2
An Mas Mahalaga Na Pagkasalbar
1 Kaya dapat gayod na isabuot naton an katukduan na nabati ta agod dili kita matalang sani. 2 Kay nagkamatuod an tanan na ginpasabi sa mga anghel, an tanan na nagsupak sani ginkastigo susog sa angay sa inda. 3 Kaya ngani dili gayod kita naman makadulag sa kastigo san Dios kun dili naton pasiguruhon ini na mas mahalaga na pagkasalbar na ginsabi mismo san Ginoo, pakatapos ginpamatuudan sa aton san mga nakabati sa iya. 4 Pwera pa sani ginpamatuudan man san Dios na matuod ini paagi san mga tanda, makangangalas na mga pangyayari kag manlain-lain na mga milagro. Naghatag pa siya susog sa iya mismo na pagbuot sin mga abilidad hali sa Espirito Santo.
An Paratuman San Pagkasalbar
5 Niyan, dili ginpaniwala san Dios sa mga anghel an pagpasakop san kinab-an na maabot na ginasabi namon. 6 Kundi amo ini an nasurat sa Banal Na Kasuratan,
“O Dios, nano man lang an katawuhan para pagpahalagahan mo? Nano man lang ini para pagmalasakitan mo?
7 Ginhimo mo ini na menos lang sa mga anghel kag ada na an kamutangan ninda sa halip-ot na panahon.
Ginpataas mo man sinda kag ginpagalangan.
8 Ginpasakop mo an tanan na ginlalang sa inda.”* Kitaa sa Salmo 8:4-6.
San ginpasakop san Dios sa tawo an tanan, wara siyaʼn ginpaligadan bisan nano. Ugaling sa yana dili pa naton nakikita na nasasakop san tawo an tanan, 9 pero naaaraman naton na si Jesus nagin menos lang sa mga anghel para sa halip-ot na panahon agod mamatay para sa tanan paagi sa pagbulig san Dios. Kaya, dahilan sani ginpataas siya kag ginpagalangan.
10 Kun sugad, angay lang na an Dios na naglalang kag nagaataman sa tanan, ginpaperpekto si Jesus paagi sa iya mga ginpasakit agod makabahin siya san iya gloryoso na buhay sa kalangitan sa damo na mga anak san Dios. Nangyari ini kay si Jesus an paratuman san inda pagkasalbar. 11 Kaya, siya na nagalinis san kasal-an kag sinda na mga nalinisan san kasal-an igwa lang sin pareho na Ama, kaya dili niya kinakaalo na tawagon sindaʼn mga kamaranghod. 12 Sabi niya,
“O Dios, itukdo ko sa akon mga kamaranghod an manungod sa imo.
Pagaumawon ko ikaw sa mga pagtiriripon.Ӡ Kitaa sa Salmo 22:22.
13 Ginsabi pa niya na,
“Magsasarig ako sa iya,”‡ Kitaa sa Isaias 8:7.
kag usad pa na,
“Adi ako kaurupod an mga kaanakan na ginhatag sa akon san Dios.”§ Kitaa sa Isaias 8:18.
14 Niyan, pareho sani na mga kaanakan na may lawas kag dugo, si Jesus nagin tawo man pareho ninda agod paagi san iya pagkamatay, daugon niya an Dyablo na may gahom sa kamatayon, 15 kag sana na paagi malibre niya an mga tawo na sa bilog san inda pagkabuhay nagin biktima san pagkahadlok sa kamatayon.
16 Hayag gayod na dili an mga anghel an iya ginabuligan kundi an mga lahi ni Abraham. 17 Dahilan sani kinahanglan na nagin pareho siya sa iya mga kapwa sa tanan na paagi agod siya an aton magin maluluy-on kag matinumanon na labaw sa tanan na padi sa atubangan san Dios para magpahali san mga kasal-an san mga tawo. 18 Kaya ngani, tungod na nagtios siya san gintintaran, makabulig na siya sa mga ginatintaran.