8
1 Baing Sol wa la ba, bagu dung mati saing nai mana kuboludinga.
Sabungua Daxap Salaga Saing Dahatibaxaya
Mana xaidapka baguba sabunga wa Yerusalem ungguti ba xap salak sabanga, baing lipu hatuminga haringinam longgalo dahatibaxaya mala mana longgadi duwa titiadi Yudia xaung Samaria. Aposeldi ding ganiding duwauyu Yerusalem. 2 Lipu teladi diti Urana yanoa dikimang Stiben saing ditang haringina mana. 3 Ne Sol ungguti hanggalangia lipu sabungamdi. Ila mana numa taining tainina, sai mana lup haing hatuminga haringinamdi saing xaidi mala, tadi salak yabania.
Pilip Oxatanoa Samaria
4 Lipudi dahatibaxaya ba, dibaxanga Urana Xuanoa mana long taining tainina dila mana ba. 5 Pilip ri mala mana long sabanga tela wa titia Samaria saing baxanga la ba, baladi ba Yesu bing Urana Lipuxing Mogunganama. 6 Lipu burangadi dilungu Pilip haruanganoa saing dibagu axamang haringindi libudi, baing dita tangadingliandi haringina mana haruanganoa. 7 Pilip suka xaunga xumana mala, disok sangua lipudi xaung xabanga haringina. Baing hamaringia lipuadi rimading kiding dahamati xumana xaung lipuadi dahaxa doa xumana. 8 Binabu lipuadi ba diyaha sibuna mana long sabangga baguba.
Saimon Lipu Tingungam
9 Lipu tela wa long sabangia ba, yanoa Saimon. Bunging maxaxaya tingu saing libu lipu Samariam longgalo dihixi mana. Itina, harua ba ina lipu yayam tela, 10 saing lipu longgalo, lipu yayamdi lipu xoliandi, ding dahaxi mana dilungu. Daharua ba, “Lipua li bing Urana haringingana naga duxu ba ‘Haringinga Sabanga’.” 11 Disu mana namua na bunging maxaxaya libudi dihixi mana tingunganoa. 12 Ne bungina Pilip baxanga ulek xaiyua mana Urana Yonggaxinoa xaung mana Yesu Kristo, lup haing dahatum haringina saing daxap langa. 13 Saimon xauna hatum haringina saing xap langa. Baing su mana Pilip mala mana long longgalo, hixi mana axamang haringing xangxana bagu Pilip libudi.
14 Bungina aposeldi duwa Yerusalem dilungu naxuyanga ba Samariadi daxap Urana haruanganoa, disoxi Pita Yon tang mala ranguadi. 15 Tang disok baing tang disabu manadi bu daxap Urana Aningonoa, 16 namua na Urana Aningonoa ri ma manadi teguyu. Ding daxap langa mana Toxoratamona Yesu yanoa ing ganina. 17 Baing ina naga, Pita Yon tang dita rimadingdi manadi, saing daxap Urana Aningonoa.
18 Saimon bagu lipudi daxap Urana Aningonoa bungina aposeldi dita rimadingdi manadi, binabu tuba ba sina sianga na dingtang, 19 saing harua ba, “Tang gasina haringinga ba nanga xauna, bu lipu gaxarea ngata rimagudi manadi bing bagula daxap Urana Aningonoa.”
20 Pita harua ba, “Baruta? Uhagaxa ba sanga ba ugim Urana yahanganoa mana sianga? Siangima tang gasup xauna! 21 Ung sanga ba utuxu oxata li ranguam te, namua na gamoma maring Urana maxania te. 22 Uxugia hatumingama mana kubolum diana li saing usabu na Toxoratamona. Bola yunga kuboluma mana hatuminga diana utuxu hatumingamia. 23 Namua na ngabagu ba uxawa buk, saing kubolu diandi dituxung salak yabania.”
24 Saking Saimon haxuya ba, “Tang gasabu na Toxoratamona manga bu haruangaima sanga xap nga te.”
25 Pita Yon tang dibaxanga Toxoratamona haruanganoa na lipudi, ditubatubadi mana haruanganoa. Dilibu laing sup, baing tang digoxoya mala Yerusalem. Tang dahaxa malauyu, tang dibaxanga ulek xaiyua mana long xumana Samaria.
Pilip Xaung Lipu Itiopiam
26 Mana bungina baguba Toxoratamona uleginam tela bala Pilip ba, “Uri bukang mala mana daxanga mana Yerusalem ila Gasa, daxanga ba kisi long xoliania.” 27 Binabu mesa ilauba. Baing ina naga, daxangia sok mana lipu Itiopiam tela, ina waleu dahasi marandi,* Waleu, lipudi kuboludinga bing nabu lipuxiding oxata olanggam tela wasa mana xaitamoxi xalingindi—numandi, xalingindi, hainindi—bing dahasi marandi. Lipua na bila ba duxu ba yunik mana Inglis xuana. ina lipu yayam tela wasa mana xalaxaladi mana Kandis, xaitamoxi haing mana Itiopiadi. Lipua ba ila Yerusalem bu sabu mana Urana, 28 baing goxoya mala yabania. Rung etua mana wilka inia, titi xailongga Aisaya, Urana lipuxing suxunguxunguama, ina bung ba. 29 Baing Urana Aningonoa bala Pilip ba, “Ula uhaxa haxek mana wilka baguba.”
30 Baing Pilip luki masok wilka saing lungu lipua titi Aisaya, Urana lipuxing suxunguxunguama, haruanganoa. Xusunga ba, “Utiti haruanga ba saing uxabia namuxinoa rangrang, kimbo tegu?”
31 Harua ba, “Nabu lipu tela baxanga nanga te, bing bagula ngaxabia baru?” Binabu xusunga Pilip ba haing saing rung rangua.
32 Lipua ba titi Aisaya haruangana baguli:
“Daxai mala bila sipsip tela bagula dung mati,
baing bila sipsip tutubina duxuxuya buxandi ba xaba te,
ina xaxa suxungunoa te.
33 Ditatua sibuna saing disuxuya xai te.
Gaxarea sanga ba dinaxuya mana garandi?
Namua na walinganoa mana titia li disahi.”✡ Aisaya (Aisaia) 53:7-8
34 Baing lipua ba xusunga Pilip ba, “Sangaʼm ubaxanga nanga ba gaxarea Aisaya harua mana, ing sibuna kimbo lipu tela?” 35 Baing Pilip baxanga na, ungguti mana haruanga baguba ila ila laing bala mana ulek xaiyua mana Yesu.
36-37 Dila laing disok mana lang tela saing lipua ba harua ba, “Ubagu, langga ba. Sanga ba ngaxap langa, kimbo tegu?”† Buninga teladi daharua ba …kimbo tegu? 37 Pilip harua ba, “Nabu uhatum haringina mana hatumingam longgalo, bing ung sanga.” Lipua haxuya ba, “Ngahatum haringina ba Yesu Kristo Urana Garanoa.” 38 Baing tabina lipuxing uingam ba libu wilka li mua. Baing Pilip lipua ba tang diri mala langia saing Pilip sugua. 39 Bungina dahaing ma sangua langa, hata sibuna li Toxoratamona Aningonoa xap Pilip mala. Baing lipua ba bagu muli te, ne ila, gamonoa yaha sibuna. 40 Baing Pilip bagu ina wa longga Asotas. Baing haxa mauli, baxanga ulek xaiyua mana long longgalo ila mana, laing sok mana long sabangga Sisaria.
*8:27 Waleu, lipudi kuboludinga bing nabu lipuxiding oxata olanggam tela wasa mana xaitamoxi xalingindi—numandi, xalingindi, hainindi—bing dahasi marandi. Lipua na bila ba duxu ba yunik mana Inglis xuana.
✡8:33 Aisaya (Aisaia) 53:7-8
†8:36-37 Buninga teladi daharua ba …kimbo tegu? 37 Pilip harua ba, “Nabu uhatum haringina mana hatumingam longgalo, bing ung sanga.” Lipua haxuya ba, “Ngahatum haringina ba Yesu Kristo Urana Garanoa.”