2
1 Baing ina naga, Urana tongtongia sabaluna xaung titi masup, xaung axamang longgalo duwa maluxu manadi. 2 Xaidap 7 Urana bagu oxatandi tuxudi ba disup, baing yagua mana xaidapka 7 mana oxatandi.✡ Hibru 4:4,10; Xapdi Muli (Kisim Bek) 20:11 3 Binabu Urana sina guxama mana xaidapka 7, mogu maina, namua na xaidapka yagua mana oxatang longgalo tuxudi bungina tongtongia axamandi.
Urana Tongtongia Lup Haing
4 Naxuyanga li baxanga bungina sabaluna xaung titi disok, bungina Toxoratamona* Mana Hibru xuana dibung Urana yanoa bila li: YHWH. Ne hatata lipu tela xabia yaya ba waxungtuanoa te. Lipu teladi duxu yaya ba Yawe. Ne mugamugau ma, Hibrudi diti yaya ba sibuna, binabu dibili lipudi ba duxu. Dibung xailongia, ne suxungudingdi duxu yaya tela namuxinoa Toxoratamona. Kimuya, Yesu lipuxindi dinaxu mana ba disu mana kubolua ba, duxugia Urana yanoa bila ba. Binabu hatata tabung haruanga Toxoratamonabuninga sabangia bu tahatanga ba haruangua taxugia ba Urana yanoa mana Hibru xuana. Urana tongtongia titia xaung sabaluna.
5 Muga bing xai xaung tatubang disok teguyu, namua na Toxoratamona Urana sina kuya mari titia teguyu saing lipu tela wa teguyu bu tuxu oxatua titia. 6 Ning uxua haing titia bu titi longgalo langiding. 7 Baing Toxoratamona Urana tongtongia lipua mana titi gagabinoa. Yubua yang walingama maluxu yungxang gininginia, saing lipua sok lipu walingama.✡ 1 Korin 15:45
8 Baing Toxoratamona Urana tongtongia umanga tela sanga karagia, mana long tela yanoa Iden. La ba ta lipua tongtongia ba. 9 Baing Toxoratamona Urana libu xai xangxana disok titia, bagungadinga (da)xai sibuna xaung daxai mana xangingua. Maluxu mana umanga baguba xai luwa duwa: xaiya sina walinga✡ Hatanga Masok 2:7, 22:2,14 xaung xaiya sina xabianga mana xai xaung diana.
10 Lang tela luki masok sangua titia Iden ba sina langa na umangua. La ba maxania hata gatung luwa luwa. 11 Gatung mugamugangama yanoa Pison. Hokhogia maluxu titia Habila, titia gol wa mana ba. 12 Baing gol ba xai sibuna. Delium xaung oniks† Lipu xabiangamdi daxabia xai mana delium te. Teladi dahatum ba xai susunam tela samingang xai. Baing oniks siang giminak sabanggam tela, mugixing xangxana bila moxa babuna. duwa la ba xauna. 13 Gatung luwa yanoa Gihon. Hokhogia maluxu titia Kus. 14 Gatung tuwa yanoa Taigris, luki maluxu Asiria rubinia sanga karagia. Baing gatung luwa luwa yanoa Yupretis.
15 Toxoratamona Urana xap lipua saing ta umangia Iden bu tuxu oxatua titia saing wasa mana. 16 Baing Toxoratamona Urana bili lipua ba, “Ung sanga ba oxong xai marang longgalo umangia li, 17 ning labu oxong xai marandi mana xaiya sina xabianga mana xai xaung dianau tai. Namua na bungina oxong, maxuna bagula umati.”
18 Baing Toxoratamona Urana harua ba, “Xai te mana lipua ing ganina wa. Bagula ngatongtongia rianoa bu sok haulinganoa.” 19 Muga Toxoratamona Urana xap titia saing tongtongia asaxa xaung mang xangxana masup. Tauna, xapdi ma rangua lipua bu lungu yaya baru bagula uxudi. Baing baru yanta lipua uxudi bing ding yadingdi. 20 Lipua sina yayadi na moru longgalo, mang sabalunam longgalo xaung asaxa abunging longgalo. Ne riang tela ba hauli lipua te.
21 Binabu Toxoratamona Urana libu lipua kinu hadali. Kinuyu, baing xap rubing tela saing usiti yabanoa muli sanggia. 22 Baing Toxoratamona Urana tongtongia haing tela mana rubina xap sangua luba, saing xap ma rangua lipua.
23 Baing lipua harua ba, “Ina naga! Alaing riagu sibuna.
Tuanoa tuaguamdi,
xaung sangganoa sanggaguama.
Bagula ngauxu ba, ‘Haing’,
namua na Urana xap sangua Lup.”‡ Mana Hibru xuana, haruanga ‘lup’ bibinganoa bila haruanga ‘haing’.
24 Mana namua baguli lup tela yunga baungtibundi saing taga rangua haininoa, baing tang disok lipu taininau.✡ Matyu 19:5; Mak 10:7-8; 1 Korin 6:16; Epasas 5:31
25 Baing lipua haininoa tang duwa mulang, ne tang memeyading te.
✡2:2 Hibru 4:4,10; Xapdi Muli (Kisim Bek) 20:11
*2:4 Mana Hibru xuana dibung Urana yanoa bila li: YHWH. Ne hatata lipu tela xabia yaya ba waxungtuanoa te. Lipu teladi duxu yaya ba Yawe. Ne mugamugau ma, Hibrudi diti yaya ba sibuna, binabu dibili lipudi ba duxu. Dibung xailongia, ne suxungudingdi duxu yaya tela namuxinoa Toxoratamona. Kimuya, Yesu lipuxindi dinaxu mana ba disu mana kubolua ba, duxugia Urana yanoa bila ba. Binabu hatata tabung haruanga Toxoratamonabuninga sabangia bu tahatanga ba haruangua taxugia ba Urana yanoa mana Hibru xuana.
✡2:9 Hatanga Masok 2:7, 22:2,14
†2:12 Lipu xabiangamdi daxabia xai mana delium te. Teladi dahatum ba xai susunam tela samingang xai. Baing oniks siang giminak sabanggam tela, mugixing xangxana bila moxa babuna.
‡2:23 Mana Hibru xuana, haruanga ‘lup’ bibinganoa bila haruanga ‘haing’.
✡2:24 Matyu 19:5; Mak 10:7-8; 1 Korin 6:16; Epasas 5:31