12
Urana Wagi Ebram
1 Tauna, Toxoratamona harua na Ebram ba, “Usauya titima, bakbagimdi xaung tibum sibindi, saing ula mana titi tela bagula ngahatanga naung.✡ Aposel 7:2-3; Hibru 11:8
2 “Bagula ngalibu garamdi disok bakbak sabanga sibuna,
saing bagula ngasina guxama naung.
Bagula ngalibu yama sok sabanga sibuna,
saing bagula uwa guxam na lipudi.
3 Bagula ngasina guxama na lipu gaxarea disina guxama naung,
saing bagula ngasina mauxanganoa na lipu gaxarea dilibu doa naung.
Baing mana ung
bagula numanuma longgalo daxap guxama.”✡ Galesia 3:8
4 Binabu Ebram ila, bila Toxoratamona bala ba, saing Lot ila rangua. Bungina sauya longga Haran, Ebram nianindi 75. 5 Xap haininoa Sarai, sabangang garanoa Lot, xaung xalingidingdi xaung lipuxiding oxatamdi daxapdi Haran, saing dimesa dahaxa mala titia Kenan. Disok Kenan, 6 baing dahaxa maluxu mana titia ba laing disok mana xai sabangga wa More, haxek mana longga Sekem. Mana bungina baguba Kenandi duwa mana titia baguba.
7 Baing Toxoratamona owa masok mana Ebram saing harua ba, “Bagula ngasina titia li na bakbagima* kimbo xuyanoa..”✡ Aposel 7:5; Galesia 3:16 Binabu Ebram tongtongia kabukabu hananiangam tela la ba bu sabu mana Toxoratamona owa masok mana. 8 Sup, baing mesa saing ila bila xaxagandi duwa Betel sanga karagia, saing tongtongia tabalaxainoa la ba. Betel wa yuwaxa xaung Ai wa karagia. La ba tongtongia kabukabu hananiangam tela bu sabu mana Toxoratamona saing uxu yanoa. 9 Sup, baing Ebram mesa ila muli, haxahaxa mala laing sok titia Negep.
Ebram Wa Isip
10 Tauna, gesaga sok mana titia ba. Binabu Ebram ri mala Isip bu wa lobu la ba monga, namua na gesak sabanga sok. 11 Dila disok Isip raguna dibo ba diluxu, baing Ebram harua na haininoa Sarai ba, “Ulungu to. Ngaxabia ba ung haing gumanging sibuna. 12 Bungina Isipdi dibagung bagula daharua ba, ‘Haininoa naga.’ Baing ina naga, bagula dung nga mati bu daxapkung. 13 Ubaladi ba ung hamungagua, bu dilibu xai manga namua na muruding maung, saing mana namua ba walingagua bagula sup te.”✡ Unggutinga (Stat) 20:2, 26:7
14 Baing ina naga, bungina Ebram luxu Isip, Isipdi dibagu ba Sarai gumanging sibuna. 15 Baing bungina xaitamoxidinga Pero† Pero yaya Isipdi duxu xaitamoxidinga. lipuxing yanamindi dibagu, dibaxanga gumanginganoa na Pero. Binabu daxap maluxu xaitamoxi numania. 16 Pero libu xai mana Ebram namua na hatum ba Sarai moxongonoa, saing Ebram xap sipsipdi, bulmakaudi, donki monindi xaung hagaxandi, haing lup oxata olanggamdi, xaung kameldi.
17 Ne Toxoratamona libu businga sabangadi daxap Pero gabu lipu numanamdi, namua na xap Ebram haininoa Sarai. 18 Binabu Pero wagi Ebram ma saing harua ba, “Uria baru manga? Baruta ubaxanga maringina nanga te? Hainima baing! 19 Uharua ba, ‘Hamungagua’! Namua naga ngaxap bila hainigua. Ai, oxop hainima bu tang gala!” 20 Baing Pero tabina lipuxindi, binabu disuka Ebram mala, gabu haininoa xaung xailinging longgalo.
✡12:1 Aposel 7:2-3; Hibru 11:8
*12:7 kimbo xuyanoa.
✡12:7 Aposel 7:5; Galesia 3:16
✡12:13 Unggutinga (Stat) 20:2, 26:7
†12:15 Pero yaya Isipdi duxu xaitamoxidinga.