48
Manasa Epraim Tang
1 Bunging tela disup, baing dibala Yosep ba, “Tibum busi.” Binabu xap garang Manase Epraim tang mala rangua bu dila dibagu tibuna. 2 Baing lipudi dibala Yekop ba, “Garama Yosep ma ba bagung.” Binabu Isrel haringiaina saing mesa marung uxaingia.
3 Baing Yekop harua na Yosep ba, “Urana Haringing Sibuna owa masok manga mana longga Lus mana titia Kenan. Sina guxama nanga,✡ Unggutinga (Stat) 28:13-14 4 saing harua nanga ba, ‘(Bagu) bagula ngasina gara xumana naung xaung libu bakbagimdi disok xumang sibuna. Bagula ngalibu usok numanuma xumana, saing bagula ngasina titia li na bakbagim(ga)di disok kimuya maung ba wa dingia bungingbunginalo.’
5 “Muga mana ngama la li Isip ranguaung, hainima hayau gara lup luwa naung. Hatata ngamogu tang disok ngayuadi. Epraim Manase tang bagula ngayuadi, bila Ruben Simion tang ngayuadi.* Mana haruanga baguli, Yekop xapkuti Epraim Manase tang. 6 Ne gara baruamtadi disok kimuya mana dingtang bagula unigadi, saing kimuya bungina dituxu sinaga mana titia na bakbak taining tainina disok manga, bagula daxap sinagidingdi hawa mana sabangading tang yadingdi. 7 Namua ngalibu bing ngausinga sibuna baum Retsel. Mati daxangia bungina ngayunga titia Padan ngagoxoya ma titia Kenan, haxek monga mana longga Eprat. Binabu ngakimang daxanga ila Eprat rubinia.”✡ Unggutinga (Stat) 35:16-19 (Hatata duxu Eprat ba Betlehem.)
8 Isrel bagu Yosep garang tang, baing xusunga ba, “Adi li gaxarea iniadi?”
9 Yosep haxuya ba, “Tang garaguadi Urana sinadi nanga la li Isip.”
Baing Isrel harua ba, “Oxop dingtang ma haxek manga bu (sanga ba) ngasina guxama na dingtang.”
10 Ne Isrel maxandi dilaba namua na wa duanga, saing bagu xai te. Binabu Yosep xap garandi ma haxek rangua, saing tibuna libu dingtang saing hibua dingtang.
11 Baing Isrel harua na Yosep ba, “Waleu ngahagaxa ba bagula ngabagu ramramoma muli te, ne hatata Urana libu ngabagu garamdi xauna!”
12 Baing Yosep yungiadi sangua Isrel king tuxundi mari, saing gung tuxundi turu mari titia. 13 Baing Yosep xap dingtang, Epraim wa rimamo mala Isrel rimang xong, saing Manase wa xong mala Isrel rimang rimamo, saing xapdi ma haxek rangua. 14 Ne Isrel raria rimang rimamo saing ta (etua mana) Epraim toxonoa, heku nanunoa, saing bali rimandi, ta rimang xong (etua mana) Manase toxonoa, heku Manase matuaua.
15 Baing sina guxama na Yosep saing xusunga Urana ba,
“Urana ba mugangagua Ebraham tibugu Aisak tang
dahaxa walingadingia sanga mana daxanganoa,
Urana ba wa lipuxigu wasangama
mana hayauxingagua ma laing hatata,
16 Uleginama ba xap nga muli sangua hanggalangianga longgalo—
ngaxusunga ba sina guxama na gara luwadi li.
Ngaxusunga ba yagua taga mana dingtang
xaung mugangagu Ebraham tibugu Aisak tang yadingdi ditaga mana dingtang,
bu lipudi dahatumia yayadi li muli,
xaung ngaxusunga ba tang bakagidingdi disok xumana mana titia.”
17 Yosep bagu tibuna ta rimang rimamoa etua mana Epraim toxonoa, baing hatuminganoa mauxana. Binabu tuxuti tibuna rimanoa bu ta etua mana Manase toxonoa. 18 Baing Yosep harua na tibuna ba, “Tibugu, tegu. Matuaua baguli. Uta rimam rimamoa etua mana toxonoa.”
19 Ne tibuna hauxana saing harua ba, “Garagua, ngaxabiau. Kubolua ngalibu ngaxabiau. Ing xauna bagula sok bakbak, saing ing xauna bagula xap yaya sabanga. Ning kixinging yanoa bagula dali, saing bakbaginoa bagula baxagi sanga mana numanuma xumana.” 20 Binabu mana xaidapka baguba sina guxama na dingtang, harua ba,✡ Hibru 11:21
“Bungina Isreldi disina guxamdi, bagula duxu yaimdi bila li:
‘Urana libu xai maung bila (libu mana) Epraim Manase tang.’ ”
Bila balau ta Epraim muga mana Manase.
21 Baing Isrel harua na Yosep ba, “Ulungu to. Haxek sibuna bagula ngamati, ne Urana bagula wa ranguang saing xapkang muli mala mana mugangaimdi titidinga. 22 Baing hatata ngasina titi hataing tela muli naung dali sinaga ngasina na sabangamdi. Titia ba longga Sekem bimbing rubina ngaxap bungina ngahaunggana Amordi xaung waxangigu sabanga xaung ruangigua.”
✡48:3 Unggutinga (Stat) 28:13-14
*48:5 Mana haruanga baguli, Yekop xapkuti Epraim Manase tang.
✡48:7 Unggutinga (Stat) 35:16-19