1 Matses dadpenshun tsibananac macuësh dapa cuëte nibëdpamboecquid pudundoec poctsebi Esus tsadtuidpondash. Abi tsibananash matses dadpen abi datsidadnubien abëd icquido Esusën dayunquio tabadpondash. 2 Adshobien Nuquin Papan matses bëdamboen isquin bëdambo icmete Esusën matses abitedi chuibampondash.

3 —¿Mitsipadquid Nuquin Papan bëdambo icmepec? Nadquid caimbique. Tantia. Mibitedi chuinu. “Ëbembi bëdamboec tabadtiapimbo iquebi. Bëdapenquio iquebi. Nuquin Papan bëdamboen tabadmiaquini bëdamboec tabadtsiac,” quequid Nuquin Papan: “Ëbëd tabadtequid nec,” quequin bëdambo icmendac.

4 “Matses abitedi icsamboec tabadnuc ëbitsen icsamboec tabadquid nebi,” quec shubiquimbi abi tantiasho Nuquin Papan bëdamboen isquin bëdambo icmendac.

5 Aton nauidi tantienquio icquin Nuquin Papa tantiaquin utsibotsen tantiaquid Nuquin Papan bëdambo icmendac. Yuecshun ambi nidaid chuca uaidën tabadmendac.

6 Pete bunacbimboec ambi chiacpadec bëdamboec tabadte bunquid Nuquin Papan bëdamboen tabadmendac.

7 Abi chieshënquidi chieshënenquio icquin bëdamboen isquid Nuquin Papan bëdamboen isendac.

8 Ambi chiacpadomboenuidi nate bunquid Nuquin Papan bëdambo icmequin abibi bëismendac.

9 Aton matses chieshënansho isash: “Padi. Chën. Bëdamboequien tabadtiad,” quequid Nuquin Papan bëdambo icmequin con mado caindac. Adquidbidi adembidi con champi caindac.

10 Nuquin Papa tantiec bëdamboec tabadsho utsin chieshënaid Nuquin Papan bëdambo icmequin unësacsho abëdi tabadmendac. 11 “Esus tantiaquid nec,” queshun utsin mibi chieshënquin chiacsho Nuquin Papan abëd tabadmenuen mibi bëdambo icmendac. Mibi cueso adembidi mibi bëdambo icmendac. Adembidi mibi muauasho Nuquin Papan mibi bëdambo icmendac. 12 Aden utsibon: “Esus tantiaquid nec,” queshun chieshënaqui cuishonqueta. “Ënden tsusedpabon Nuquin Papan chiaid chuisho chieshënquin cuesunepampic. Adoacsho Nuquin Papan bëdamboen isquin abëdi tabadmec. Adembidi utsibon chieshënacsho ëbi bëdamboen isquin unësacsho abëdi tabadmendac,” quiash cuishonqueta —quequin chuipondash Esusën.

13 Abi macuësh dapa poctse tsadquin Esusën chuibampondash. —“Ma utsibontsen Nuquin Papa tantianu,” quec sa pambid casecac batambo yec petiadquio yacbimboec icta. Aden Nuquin Papan chiacpadec bëdamboec tabadquin mimbi utsibo bëdamboec tabadte bumetsiac. Sa batambo icquid bëdambo iquec. Sa batambo icboedi batapenquio yec icsasho ¿mitsipadentsi batambo icmeoapec? Adotiapimbo iquec. Sa icsambo yanacsho penquio icquin secatequid nec. Adembidi matses bëdamboec tabadenquio yec icsambo icsho Nuquin Papan chian anëdënquiacno nësecatequid nendac —quepondash Esus.

14 Adashic padpidec onquec: —Nuquin Papan chiacpadec bëdamboec tabadte utsibo tantiamequido mibi neque. Aden tantiamenuec bëdamboec tabadta. ¿Nuntanshunda ëapadic? Padenquio. Umanucshumbien ma tantianueshun ëaquid. Adembidi: “Ma Nuquin Papan chiacpadec tabadte tantianu,” quiash ënëdenquio yec bëdamboec tabadquin ismeta. Adsho isash: “Nuquin Papa tantiec bëdamboec tabadquid nec,” quetsiash utsibo. 15 ¿Utsibo chuinuecta abentsëqui uano icpadic? Padenquio. “Ma nëidën tantianu,” quec aidbëdi bëdamboec tabadquin chuibanquid. 16 Adembidi ëbi tantiesabobëd tabadquin: “Ma Nuquin Papa tantianu,” quequin ënenquio icquin Nuquin Papan chiacpadomboen nata. “ ‘Nuquin Papa bëdambo iquec,’ ma utsibotsen quenu,” queshun adota —quequin Esusën chuipondash.

17 Nadentsen Esusën chuipondash. —Ëmbi chuibansho tantiashun: “Nuquin Papan chiaidquio chienquio iquec,” quequin tantienda. “Nuquin Papan Moises dada uamiampidbëdta con tsusedpabo utsibo dada uamiampid chienquio icquin utsi uapec,” mimbi ëbi capec. Mambi utsi uainquio yoc. Nuquin Papan chiaid utsi uainquio icquin ambi chiactedimbo namenuec nebique. 18 Abimbo chuinu. Tantia. Abubëdta nidaid nibëdamiabi icnuc Nuquin Papan chiaid bënudtiapimbo iquendac. Ambi chiactedimbo naquin Nuquin Papan nainendac.

19 Padnubic Nuquin Papan: “Nadomboen nata,” quequin chiaid abentsëqui niacquin aid chiaidbidi adomboembidi niacmequid Nuquin Papan: “Bëdambo icquid nec,” catiapimbo iquec. Utsibic Nuquin Papan chiacpadec tabadec: “Nuquitsen bëdamboec tabadnuna,” quequid abi yacno nidacsho Nuquin Papan: “Bëdamboshë icquid nec,” caindac. 20 Moisesën dada uampid chuibanquido padiseyobobëd Nuquin Papa yacno puduedtequidoen mimbi dampec. Aido bëdambo icquid damianashi ompodash icsaic. Adashic Nuquin Papa yacno puduedtiapimbo iquendac. Adembidi Nuquin Papan chiaid niac-niaquec adecbidi Nuquin Papa yacno mibi puduedtiapimbo iquendac. Nuquin Papa tantiec bëdamboec tabadquidien puduedtsiash —quequin chuipondash Esusën.

21 Adshumbic Esusën padpiden chuioapondash. —Nuquin Papan chiaid chuiquin isadaidbo tsusedpabon: “Cuesunenda. Cuesunianquid Nuquin Papan chiacpadomboen matses cuidte chuiquidën cuesunemequin cuidquid,” quequin chuipampid mimbi tantiec. 22 “Nadquidotsen cuidtequido nec,” quequin chuinu. Tantia. Aton matses nëishënash aton nëish bëdanenquio icsho Nuquin Papan cuidtequido nendac. Utsibic chieshëmënec icsamboec cuëmënquido isadaidbo tsusiobon cuidacsho isun: “Bëdamboen naic,” catsiambi. Nëidic aton matses chieshënquin shëpiaquid Nuquin Papan icsano nësecaquin cuidtequido nendac. 23 “Chieshëmënquid Nuquin Papan cuidtequid nendac,” quequin ëmbi chuisho tantiashun bëdamboen nata. Nuquin Papa tabadte shubu uashunaidën puduedash: “Ambi chiacpadomboen musuc menenu,” mibi quepec. Aden musuc menenumbi mimbi naid tantiata. “¿Ada ëbi chieshënquid icpec? ¿Ëmbi chieshëmeboedta icpec?” quequin tantiata. 24 Adshun: “Ai, ëmbi chieshëmeboed iquec,” queshun Nuquin Papa tantiaquin mimbi bëboed meniabi mibëd chieshënamboed yacno nidash aidbëd bëdamboec onqueta. Adec bëdamboec onquiash padpidec choashun Nuquin Papa tantiaquin meneta. Adec mibëd chieshënamboedbëdi bëdamboec onqueta.

25 Mibëd chieshënamboed utsimbic: “Nëid cuidmenuen cuidte chuiquid yacno buanchitembimbi iquec,” queshun: “Baded nid,” cac podquedën nidec aidbëd bëdamboec onquenidta: “Ma nëish bëdanu,” quiash. “Matses cuidte chuiquidën cuidchitoshe,” quiash badedquio mibëd chieshënamboedbëd bëdamboec isnanta. Abi yacno buanacsho cuidte chuiquidën: “Icsambo iqueque. Quënën nauedta. Ëmbi chiacted piucquid ëmbi bedabi icnuc ma tsadpanu,” mibi catsiash. Quënën nauedshun 26 ambi chiacted piucquid nibëdnuc mibi cuemenquio ictsiashe. Mibëd chieshënamboedbëdi bëdamboec onqueta. “Nuquin Papan adembidi cuidnushe,” quiash adta —quequin Esusën chuipondash.

27 Adshumbic naden Esusën chuipondash. —Chiaid utsitsen mimbi tantiec. “Min chidopenquio chudenda. Min bënëpenquio chudmenda. Aben uequid chudenda. Aben uequidën dada chudmenda,” quequin Nuquin Papan chiaid nuquin tsusedpan dada uapampic. 28 Aden chiaid niac-niaquec icsambo icquid icnubi nadquid icsambo icoaic. Aton chidopenquio isec: “Aidquio chudtiadquio icchitebi,” quequin otacquio tantiequi matses icsapec. 29 Ëshën isec mibi min chidopenquio bunec icsaic. Ëshë chicshuniacbimboec icsainquio yec ënëdash mibi bëdambo ictsiac. Icsaid ënenquio icquid Nuquin Papan chian anëdënquiacno nësecaquin cuidendac. 30 Min chidopenquio chudte bunquin mëismec mibi icsaic. Mëteshuniac bedtiapimbo yacbimboen mibi icsaid ënta. Ënenquio icquid Nuquin Papan cuidendac —quequin Esusën chuipondash.

31 Nadentsen Esusën chuipondash. —Nuquin Papan Moises chuimiaid utsitsen mimbi tantiec. “Aton chido bunenquio icquin naden dada uashun menequid. ‘Mibi intiapimbo yanobi,’ quequin dada uashun aton chidobi menequin nidmequid,” quequin Moisesën dada uapampic. 32 Utsitsen chuinu. Aton chidon bënëpenquio chudmesho istuidshun Moisesën chiacpadomboen nac bëdambo ictsiash. Aton chido dada utsi chudmesa icshobi dadan ambembi dada uaid menequin nidmiac icsambo ictsiash. Aden nidmequin chido icsametsiash. Chido nidmiacsho bedquidtsen icsatsiash —quepondash Esus.

33 Adshumbic Esusën padpiden chuipondash. —Naden Nuquin Papan ambi chiaid nuquin tsusedpa Moises dada uamepampic. “ ‘Nuquin Papa utsi uatiapimbo yacbimboen abimbo caimbi,’ quequin chiaid niactemaid nec. Niacsho Nuquin Papan cuidendac,” quequin Moisesën chuipampic. 34-36 Aidën chiacpadec muainquio ictiadquidi mimbi abimbo chiacbimboen utsi uain icsamboen chiec. “Abi cuëmëdquid cuënec muasho ëbi cuidtsiash. Nuquin Papa cuëmëdquid cuënenquio yec muasho Nuquin Papan ëbi cuidenquio ictsiash,” queshun mimbi utsi chiec. “Abu utsi uatiapimbo yacbimboen ëmbi chiacpadomboen naimbi. Muainquio iquebi,” mibi quepec. Adecbidi: “Nidaid utsi uatiapimbo yacbimboen ëmbi chiacpadomboen naimbi,” mibi queoapec. Adembidi chiec mibi Edusaden queoapec. Adembidi con mapi quequin mimbi chieque. Aden abimbo chiacbimboen chienda. “Nuquin Papa cuëmëdquid cuënenquio iccombi,” mibi quenubi abu abi tabadaid icnuc ashunquio Nuquin Papan abitedi namendac. Nidaidic Nuquin Papan tincate nec. Edusaden yacnoshombic Nuquin Papan chomiaidën bëdamboen namendac yuecshun. ¿Min mapin icboda mibi nedi? Padenquio. ¿Mimbida min mapi masedcamedi? Padenquio. Aton Icbombien Nuquin Papan naique. Abimbo chiacbimboen icsamboen chienda. 37 Adec muainquio icquin abimbo chuita. “Ai, adembi naimbi,” quequin mimbi chiacpadomboen nata muainquio icquin. Adembidi: “Padi. Natiapimbo iquebi,” queshun mimbi chiacpadomboen nainda. Utsi uaic matses icsamequidën Satanasën tantiamiacpadec mibi muapeque. Adenda —quepondash Esus.

38 Adashic padpidec Esus onquec: —Nuquin Papan Moises chuiquin dada uamiampid mimbi tantiaboed nad iquec. “Chieshënquin ëshë ansiac adecbidi cuidnanec ëshë ansenanquid. Chieshënquin sëcsiac adecbidi cuidnanec sëcsenanquid,” quequin chiaid icnuc 39 utsitsen chuinu. Tantia. Mibi cuesquid cuidenda. Chieshënaqui cuidnanenquio icquin adembi bëdamboen ista. 40 Min matses: “Ëbi cuidquin mimbi ëbi meniambo iqueque. Min dashcute beccho,” quesho mimbi menenquio icsho isun: “Cuidte chuiquid yacno buanshun dashcute dachicmechitomane,” quesho aid dashcute meneshumbic min dashcute utsitsen chicshun meneta. Adec bëdamboec tabadta. 41 Utsibic: “Nëbi nidtuidquin con na buanec nid,” quequin ancabudac nëbi nidtuidenquio icquin udimbo buanshunta. 42 Aton na nibëdquid: “Mitsana beccho,” quesho meneta. Utsibic: “Mitsana buanshun bëuaindambi,” quesho: “Padi,” cainda. Meneta. Aden bëdamboen nata —quepondash Esus.

43 Adshumbic abi macuësh dapa poctse tsadquin bëdamboec tabadte Esusën chuipondash. Nuquin Papan Moises chuiquin dada uamiampid mimbi tantiaboed nad iquec. “Mibi tantiaquidombo tantiaquin mibi chieshënquido chieshënta,” quequin chuipampic. 44 Utsi mibi chuinu. Tantia. Mibi chieshënquidobi bëdamboen isquin tantiata. Chieshënaqui: “Ëbi chieshënquid bëdamboen ista, Papa,” quequin Nuquin Papa chianeta. 45 Aden chianec Nuquin Papabimboec mibi ictsiac. Mibi utsibo bëdamboen nashunquid ictsiac. ¿Bëdambo icquido yacnouidida Nuquin Papan ushë chëncamepadic? Padenquio. Icsaido yacnotsen ushë chëncamec. ¿Bëdambo icquido yacnouidida ue chomepadic? Padenquio. Icsaido yacnotsen ue chomec. Bëdambo icquidobëdtabi icsambo icquido Nuquin Papan bëdamboen nashunec. 46 ¿Mibëd tantiananquido min shubun icquidouidi mimbi bëdamboen nashunsho isunda Nuquin Papan mibi: “Bëdambo iquec,” capec? Padenquio. Mimbi icsambo iquec caidontsen ambi tantiaido nashuntsiash. Aidombien piucquid bedshumënquido icquimbi aton shubun icquidouidi nashuntsiashe. Aden nainda. Utsibotsen bëdamboen nashunta. 47 ¿Min shubun icquidobëduidida mibi onquec tabadpe? Nuquin Papa tantiesaboen adpec. Utsibotsen bëdamboen ista. 48 Nuquin Papabimboec icta. Bëdambo icquid icta. Bëdambo icquidobëdta icsambo icquidobi Nuquin Papan bëdamboen tantiacpadomboen utsibotsen bëdamboen tantiata —quepondash Esus.