1 Aden chiash 6tedec ushanec nidquimbi Esusën abëd icquido 3tedtsëqui buampondash. Petedo yec Acobo yec Acobon buchi Uan yec quetsëcnuc buanash macuësh dapa dectatoash mananënquio tabadtuidpac caondash. 2 Tabadtuidshun isquien Esus utsiacbimboec isadpec. Aton dashcutebëdi aton bëtantete ushëbimboec bëchamauanquiec yanac caondash.

3 Esus bëchamauanquiec icnubien dada utsi daëd isadcuenash Esusbëd onquiampac caondash. Abentsëc Moises yampid icnubi utsi Edias Nuquin Papan ambi tantiaid oncamiampid icpac caondash. 4 Adsho isashien Petedo: —Mibi adec tabadsho isash bëdambo iquebi. Mibi nëmbobi tabadmenun abentsëc chotsecnuc shubumpi uatsëcnuna, Icbo. Mitsana natsëcquinc Moisesën na natsëcquinc Ediasën na natsëcquinc canuna. ¿Ada bëda icpec? —quenubi 5 abu ushu bëchamauanquiec icquidën isadenquio icnuc bëtimpac caondash. Adnubien abu ushu nënantanuëshquio Nuquin Papa onquiampac caondash. —Nëid con Madombo nec. Ëmbi tantiaidquio yec ëmbi bëdamboen isaidquio neque. Nëidquio tantiata —quec dacuëdampamboec onquenubien 6 uinte paëdtampamboec dacuëdtanec uebudcuededpac caondash Petedo chedo.

7 Adshobien Esusën camishquin: —Dacuëdenda. Nidto —cac 8 nidtoquin isquien Esus abentsëqui iquec.

9 Adtanec macuësh budequi Esus: —Mimbi isboed nëbi utsibo chienda. Unës uac ëbi uincuenacsho isun chianta —quepac caondash abëd icquido chiec.

10 Adsho tantiash Petedo chedo: —“Nuquin Papan chomiaidquio nec,” quequin nëbi mibi tantiembi. Mibi adquid icnuc ¿mitsipadquid nuquin matses tsusiobon chuiposh? Nuquin Papan chiaid isash: “Nuquin Papan chomiaid choabi icnuc Edias yampidba choendac,” quepequien iccosh —queshobien 11 Esusën: —Abimbo chiosh. “Edias yampid bëyuc choshon: ‘Nuquin Papan chomiac bëdambo icquid choeque. Bëdamboec tabadta,’ quequin chiendac,” quequin abimbo chiosh. 12 Adquid Ediasbimboecquid chondash. Choacsho tantienquio icquin matsesën abi bunacpaden unës uapac caondash. Adembidi Nuquin Papan chomiaid icsho ëbitsen chieshënquin unës uaindac —quesho tantiashien: 13 —“Ediasbimboecquid nec,” quequinshenda chuiposh. Uan pado acten mentoandened caquinshenda Edias capec —quepac caondash Petedo chedo.

14 Bëchamauanquiec ictanec choequi abëd icquido utsibo yacno choquin matses dadpen aido datsidadacsho Esusën istuidpondash. Adec Esus chosho isumbien unësanetsëcquidën papan Esus ismequin danëshën sebudshun chuipondash. 15 —Con mado bëdamboen isquin bëdameta, Icbo. Baded-badedquiec unësanec cuëten pichiquianec. Adecbidi unësanec acten mentoadtsenaccosh. 16 Mibëd icquidon bëdamete danquin bëuidombi. “Në bëdame,” cac bëdamenuen tanuidosh. Bëdamenquio iccoshe. Mimbimbo bëdameta —caquien 17 Esusën ambo icquidotedi chuipondash. —Ëmbi nadatiambo icquin nabanquin ismiaqui mimbi ëbi tantienquio iquec. Adsho isash chieshtoash cuentiadquio icchitebi. Adtiadquio yequi padenquio iquec nebique. Min mado beccho —cac 18 bësho istanquin Esusën podobitsi icsa chushcapondash. —Padi. Daicsa uainda —cac podobitsi icsa cuenubi madompi bëdampondash.

19 Adsho isun abëd icquidon Esus chuipondash utsibo tantiamenquio icquin. —Ëmbi: “Cuemenu,” cac ¿atotsi quiash podobitsi icsa cuenenquio icposh? —caquien: 20 —Nuquin Papa bëdamboen tantiaquin mimbi bëdamboen natsenoc. Mimbi bëdiactsëc tantiatsec. Pete ëshëmpi mostasa caid pistsëcquidi siac nua yec canitsiash. Adecbidi Nuquin Papa tantiatsëcboedi: “Ambi natiapimbo ictequid nibëdec,” quequin abimbo tantiaquidquio yanshun comapenen tantiaquidbimboec mibi ictsiac. Adquidën nëid macuëshquiobi cain: “Uquë manëd,” cac manëdtsiash. Aden mimbi: “Ëbi bëdamboen nameta, Papa,” quequin Nuquin Papa chianiac aidëmbi mimbi: “Ëmbi natiapimbo ictequid nec,” caid mibi bëdamboen nametsiash. 21 Nëbi ëmbi cuemeboed abembi cuentiapimbo icquid nec. Nuquin Papauidi tantianuen buna mëmunquin Nuquin Papa chianeshun adquid cuemequid —quequin Esusën chuipondashi.

22 Adanec aton nidaid Cadidia yacnobi capucuenequimbi Esusën abëd icquido chuipondash. —Ëbëd icquid abentsëcshun ëbi chieshënquido ëbi bedmendac. 23 Bedshun ëbi unës uamendac. Aden unës uamiacsho chococaquini daëdec ushash uincuenendac —quesho tantiatanequien abëd icquido: —Unësquio icnuc chiec —quiash shubiantiadtsëcquio icpondash.

24 Aden chianec nidequi shubu dadpen icquid Capednaun caid yacno Esus chopondash. Adnubien Nuquin Papa tabadte shubu uashunaid nacnemenuequin piucquid bedquidon Petedo chuituidpac caondash. —Nuquin Papa tabadte shubu uashunaid nacnemenuen ¿ada min icbon dos dada uatsaid piucquid shocoshëmpi abentsëc menepatsiash? —cac 25 Petedo: —Ai, menetsiash —quepac caondash. Adanec nidec shubun puduedshobien Esusën ambia Petedo chuipondash. —¿Atotsi mimbi chie, Simon? Aton matsesën na nacnemenuen ¿tsutsi chuiquid dapabon piucquid bedshumpec? ¿Ada aton matses piucquid bedshumpec? Aido bedshunenquio icquin ¿ada ambi bedaido aton yuabo piucquid bedshumpec? —caquien 26 Petedo: —Ma aton yuabo bedshumpaid yoc. Aton matses piucquid bedshunenquio iquec —quesho tantiashien: —Adembidi aton Mado icsho aton shubu nacnemenuen Nuquin Papan ëbi bedshuntiapimbo iquec. 27 Aden tantiaquimbi: “Nëishnushe,” queshun menenun nanuna. Chianën ansemetan. Tauaquin ansemiaidi ancanshun anisquin 4 dada uatsaid piucquid shocoshëmpi abentsëc mimbi istuidendac. Aid bedshun piucquid bedshumënquido menetanta. “Në con icbon nabëdi con na nec,” quequin menetanta —capondash Esusën. Adoac Petedon Esusën chiacpadomboen menetampac caondash.