1 Adnubien Esusën Nuquin Papan: —Nadoendambi —quequin chiaid dada uaid 7tedi bitaccaid tauamboen abentsëc chicposh chicabi icquid 6tedi icnuc. Aid chicnubien Nuquin Papabëd icquid dadanobi ëshëcquidën abentsëcshun abu cuëdacbimboec comapenec cuëdquin: —Cho —caposh. 2 Adoac cabayo ushumbo icquid catsadec dada canti sanampamboec chosho ispombi. Adec chosho isun: —Mibi chieshënquido uesquin cuesun secaquidquio mibi nec —quetanquin chuiquid dapan mauetembo mauemeposh. Adoac adecbidi abi chieshënquido cuesun secanuec nidposh.

3 Adnubien Esusën dada uaid bitaccaid utsi udictsëcquid chicposh chicabi icquid 5tedi icnuc. Aid chicnubien dadanobi ëshëcquid utsin: —Cho —cac 4 cabayo piumbo icquid catsadec dada choposh. —Matses cuesun secananenquio icsho Nuquin Papan tantiacpadomboen aidën nac matses abitedimbo matses utsibobëd cuesun secananendac —queshun chështe dapa matses siante dapa meneposh. Adomboen Nuquin Papan matses cuidte tantiameposhi.

5 Adnubien Esusën dada uaid bitaccaid udictsëcquid chicposh chicabi icquid 4tedi icnuc. Aid chicnubien dadanobi ëshëcquid utsintsen: —Cho —cac cabayo chëshëmbo icquid catsadec dada choposh. —Pete daëdpactsëc icmete chiec —camenuen pete yuë tante sanamposh. 6 Adnubien dadanobi ëshëcquido dacuenadec tabadnuc nënantanshunquio Nuquin Papan cabayo chëshëmbo icquid catsadquid chuiposh. —Piucquid dadpenquio meniac aton yuë daëdpactsëcnuc tambanshun pete utsi-utsien daëdpactsëc menianquid iquendac —quequin pete utsi-utsiec nibëdte chuiposh. Adshumbic: —Pete utsi-utsien nibëdmetanquin tiedën icquid pete utsi-utsien nibëdmenquio icquin nata —quequin chuiposh. —Nuquin Papan cuidac adec pete nibëdnuc matses pete bunquiendac —quequin cuidte utsi aden ismeposhi.

7 Adnubien Esusën dada uaid bitaccaid udictsëcquid chicposh chicabi icquid 3tedi icnuc. Aid chicnubien dadanobi ëshëcquid utsintsen ënquimbi chuiquin: —Cho —cac 8 cabayo bëdiactsëc ushu-ushupactsëcquid catsadec dada choposh. —Aid matses unës uaquid nec —quequin cuënsho tantiombi. Abipadquid utsin chinumposh. —Aidombi Nuquin Papan tantiacpadomboen matses cuidquin matses dadpenquioshë unës uabudnendac. Aidon namiac cuesun secananec dadpen naimëdbudnendac. Bunambi aidtedbidi unësbudnendac. Daicsaidëmbic aidtedbidi. Aben icquid uinsadpambo icquidën aidtedbidi acshun secaindac —quequin Nuquin Papan cuidte utsi ismeposhi.

9 Adnubien Esusën dada uaid bitaccaid utsi chicposh chicabi icquid 2tedtsëqui icnuc. Aid chicnubien Nuquin Papa yacno isombi. Abi tantiate nëish pichicate dapa dayun chieshënquidon cuesun secaido Esus tantiaquido tabadsho ispombi. Aido chieshtoenquio icquin Nuquin Papan chiaidbëdta Esusën naid chuibanec bëdamboec tabadsho aden cuesun secaido niosh. 10 Adoaido icquin comapenec cuëdquin Nuquin Papa chuidoneposh. —Abitedishun Icbombo icquin mimbi tantiacpadomboen namequidquio mibi nec. Icsaisambo yec muesambo mibi neque. En chui, Papa. Nidaidën tabadquido ëbi chieshënquin cuesun secaboedo ¿tedectsicshun mimbi cuidpe? —caquin chuidoneposh. 11 Adoaquien: —Chiata. Yuec-yuecpactsëcshun naindambi. Min utsibobimboecquido ëbi tantiaquido utsibo ëmbi tantiactedi chieshëmënquidon ma cuesun secabono. Adoacsho isun cuesun secanquido cuidendambi —queposh. Adshumbic Nuquin Papan: —Ëbëdi tabadmequin icsaisa mibi icmembi —queshun abitiombi dasiuidbudte ushumbo icquid dasiuimbamposh.

12 Adshumbic Esusën dada uaid bitaccaid utsi chicposh chicabi icquid abentsëc icnuc. Adnubien nidaid abichobi shëc-shëcquemboec comapenec uëdëqueposh. Nidaid uëdëquenubi abucuësh chënquequidtedi dacuëdampambo yamposh. Ushë dashcute chëshën bëpucacbimboec inchëshquio icposh. Inchëshën ushëbic intacbimboec piumboshë isadposh. 13 Uispabic natiambo cunquenuc cuëte bacuë tididiquiacbimboec nidaidën tididieposh. 14 Abubic dashcute bidiquiacbimboec isadposh. Macuësh dapabic abitedi manëdcuededposh. Acte nënantan nidaid icquidic abitedi manëdcuededposh. 15 Adsho isashien Esus tantiesabo abitedimbo: —Ashibi cuidpec —quetanec ompodec cuemposh. Nëidic chuiquid dapabo dadpenquio. Nëidic aidobëdtan chuiquid utsibo. Nëidic sondado chuiquid dapabo. Nëidic aton na dadpen dayun uaquido. Nëidic cuesambo icquido. Nëidic matses yuabo. Nëidic matsesën yuacmaido. Aidtedi matses icsambo icquido abitedimbo sidquetanec ompodec cuemposh. Utsi-utsiec nidaid shëcuë dapan ompodnobi utsi-utsiec macuësh dapa yacno cuënote dapa dayun ompodposh. 16 Ompoduidtsash: —Macuësh dapa cuitiadbudnec sebudnequin mabëspashuni. Nuquin Papan istuidshun cuidnushe —quenubien utsibo: —Cuënote dapa abucuësh paëdbudnequin ompopashuni. Nuquin Papan istuidshun cuidnushe. Adembidi abided cuidadec unësaid Esusëntsen cuidnushe. 17 Aidon ambi tantiacpadënquiobini nëbimbobi cuidchitec. Padtembo. ¿Tsutsi cuidenquio icpatsiashba? —queposh. —Nadomboen Nuquin Papan abi tantiaquido cuesun secaquido cuidendac —quequin aden ismeposhi.