SAMUEL CABU
A Pacuek Nah
(The First Book of Samuel)
Samuel Cabu Pacuek Kawng
Lamhma ah tah Samuel Pacuek neh Pabae he Cabu khat la om. 1080 to 970 b.c. Israel ca rhoek kah khokhuen neh cil te a tueng sak tih tonghma Samuel a cunnah lamloh manghai David a dueknah hill a daek. He cabu dongah Israel ram a moecuek vaengkah thinom Samuel, Saul neh David kawng om. Israel ca rhoek te amah koca rhoek kah mawtnah laitloek nah voevoeh hma tih manghai mawtnah ben la cet.
Lamhma cuek la Samuel kah a thangnah, Pathen loh a khue nah, tonghma neh camtloek boeilu la a omnah kawng a thui. Namtom bangla pilnam loh amih aka mawtkung ham manghai a hoe uh. Te vaengah Pathen loh Samuel la, “Benjamin koca lamkah ,” a ti nah. Saul neh Pathen loh a ngaihaknah hmanah Boeipa ol te Saul loh ngai pawh. Te dongah Saul te manghai lamloh a paa sak tih David a tuek sak. Saul loh David te thunkha rhalcak bangla a khueh vaengah David he Samuel loh a bom. Samuel Cabu a pacuek he Philistin kut ah Saul pacaphung a dueknah neh a bawt sak. Samuel cabu a pabae dongah tah David kawng a tael. Samuel Cabu he b.c 930 tluk vaengah boeih tael coi ni a ti.
Sawt Yoeinah
Samuel 1.1—7.17
Saul 8.1—15.35)
David 16.1—31.13
1
Hannah kah Olhlo
1 Ephraim tlang kah ka om Ramathaim Zophim ah hlang pakhat om. A ming tah, Elihu capa Jeroham kah a ca Elkanah ni. Elihu tah Ephraim Zuph capa Tohu kah a ca ni. 2 Anih te yuu panit tih a yuu cuek te Hannah, a pabae tah Peninnah a ming nah. Penninah te camoe om tih Hannah tah camoe om pawh. 3 Tekah hlang tah thothueng ham neh Caempuei BOEIPA nawn hamla hnin bal hnin bal amah kho lamloh Shiloh la cet. Teah te BOEIPA khosoih Eli ca rhoi Hophni neh Phinekha khaw om.
4 A tue a pha tih Elkanah loh a nawn vaengah tah maehvae te a yuu Peninnah neh a capa rhoek khaw a canu rhoek khaw boeih a paek. 5 BOEIPA loh a bung piim sak cakhaw Hannah tah a lungnah dongah maehvae a paek vaengah Hannah ham tah pakhat neh a rhaep pah thil. 6 BOEIPA loh Hannah bung a piim sak tih a caeng dongah Hannah tah konoinah neh, citcai neh hue a sak. 7 Kum khat phoeiah kum khat BOEIPA im a paan vaengah khaw hue a sak. Te dongah rhap tih buh ca pawh. 8 Te dongah anih te a va Elkanah loh, “Hannah balae tih na rhah, balae tih buh na caak pawh? Balae tih na thinko a phoena? Ca tongpa parha lakah khaw nang taengah ka then moenih a?” a ti nah.
9 Te daengah Shiloh kah Hannah loh caak ok ham thoo. Te vaengah khosoih Eli tah BOEIPA bawkim rhungsut taengkah ngolkhoel dongah ngol. 10 Hannah tah a hinglu khahing tih a rhah doe a rhah doela BOEIPA taengah thangthui. 11 Lmp 6.5Te vaengah olcaeng neh a caeng tih, “Caempuei BOEIPA, na salnu kah phacipphabaem he han so rhoela so lah. Kai he m'poek lamtah na salnu he hnilh boeh. Tedae hlang kah tiingan te na salnu ham m'pae lamtah a hing tue boeih te BOEIPA taengla kam pae eh. A lu dongah thiha loh ben boel saeh,” a ti nah.
12 BOEIPA mikhmuh ah a thangthui te a koe coeng dongah Eli loh a ka te a sawt pah. 13 Hannah te a lungbuei khuiah cal tih a hmui ni dawk a tat coeng. Tedae a ol a yaak pawt dongah Eli loh anih te yurhui la a poek. 14 Te dongah anih te Eli loh, “Me hil nim na rhuihmil ve, namah te na misur dong lamkah loh cue uh saw,” a ti nah.
15 Hannah loh a doo tih, “Moenih, ka boeipa, Kai huta he ka mueihla mangkhak sut tih misur khaw yu khaw ka ok moenih. Tedae ka hinglu he BOEIPA mikhmuh ah ka kingling coeng. 16 Ka kohuet cungkuem neh tahae ah ka konoi nen ni ka thangthui. Na sal nu kah a muen he na kodang ah dueh boel mai,” a ti nah.
17 Eli loha doo tih, “Ngaimong la cet lamtah amah taengah na bih na huithuinah te Israel Pathen loh m'pae saeh,” a ti nah.
18 Te dongah, “Na salnu he na mikhmuh ah mikdaithen khaw dang van saeh,” a ti nah.
Te dongah huta te amah caeh long ah cet tih a caak. Te lamkah long tah Hannah kah maelhmai khaw pumphoe voel pawh.
Samuel Nawnnah
19 Mincang ah thoo uh tih BOEIPA mikhmuh ah tho a thueng uh. Te phoeiah bal uh tih Ramah kah a im te a paan uh. Te vaengah Elkanah loh a yuu Hannah te a ming hatah Hannah te BOEIPA loh a poek. 20 Khohnin a thoknah a pha vaengah Hannah te vawn tih ca a cun. Camoe he, “BOEIPA taengah ka bih,” a ti dongah a ming te Samuel a sak.
21 Elkanah loh BOEIPA taengah khoning hmueih neh a olcaeng nawn ham te a cako ah boeih cet uh. 22 Tedae Hannah tah a caeh kolla a va taengah, “Camoe suk a kan vaengah ka khuen bitni. Te vaengah BOEIPA hmai ah phoe vetih a kum a hal pahoi om bitni,” a ti nah.
23 Te dongah anih te a va Elkanah loh, “Na mikhmuh ah a then la saii, anih te suk na kan sak duela om mai ngawn, a ol te BOEIPA loh thoh nawn saeh,” a ti nah.
Te dongah a yuu te om tih a capa loh a suk a kan duela a khut. 24 Camoe te suk a kan vanneh vaito kum thum, vaidam te cangnoek pakhat, misur te tuitang pakhat a khuen tih Shiloh kah BOEIPA im a paan puei. Te vaengah a capa te camoe pueng. 25 Vaito te a ngawn uh tih camoe te Eli taengla a thak uh.
26 Te phoeiah Hannah loh, “Aw ka Boeipa, Ka boeipa namah kah hingnah hinglu rhangneh kai tah BOEIPA taengah thangthui ham heah he namah taengah aka pai huta ni. 27 Camoe ham he ka thangthui tih amah taeng lamkah ka bih vanbangla ka huithuinah te ka taengah BOEIPA loh m'paek coeng. 28 Te dongah anih he BOEIPA ham ni ka bih tih anih a tue khohnin aka om boeih khaw BOEIPA ham ni ka bih coeng,” a ti nah tih BOEIPA taengah pahoi bakop.