MANGHAI CABU
A Pabae Nah
(The Second Book of the Kings)
Manghai Cabu A Pabae Kawng
Manghai Cabu (I neh II) he a cuek vaengah pakhat lamni rhen a om. Israel kah khokhuen kawng te David tue lamloh Jerusalem poci tih Babylon la pilnam a poeng hil kah a kawng te a tael. He cabu tonghma Elijah kah a hnukhueng kawng, Elijah vaan la a pomnah kawng neh a tong. Te phoeiah Pathen loh Elijah yuengla a tuek Elisha kawng a tael. 722 b.c. Israel neh Judah mawtkung rhoek kawng boeih a tael. Te vaengah tlangpuei kah Israel ram te Assyrian loh a loh coeng. Assyria he Hebru ol lamtah Aram a ti. Tlangpuei ram a cungku vaengah pilnam te tamna la a khuen. Tuithum kah Judah ram bueng ni Israel namtu kah ram la dawk a om coeng. Cabu he 722 b.c. lam loh 586 b.c. hil kah Judah khokhuen cilka neh a bawt sa. He cabu dongah Judah manghai rhoi Hezekiah neh Josiah kawng a nah la a tael. A boei rhoek he uepom la om dae pilnam loh boe a koek. A bawtnah ah Judah te Babylon a tloek tih Jerusalem a loh pah, bawkim khaw a hoeh pah, pilnam te tamta la a khuen.
Sawt Yoeinah
Tonghma Elisha kawng 1.1—8.15
Judah neh Israel manghai rhoek 8.16—17.41
Judah ram 18.1—25.30
1
Ahaziah kah Duekhlong Tloh
1 Ahab a dueknah hnukah Moab loh Israel taengah boe a koek. 2 Ahaziah tah a tloh neh Samaria ah amah imhman kah sahamlong taengah yalh. Te dongah puencawn a tueih tih amih te, “Cet uh lamtah, Ekron pathen Baalzebub te dawt uh lah, he tlohtat lamloh ka hing khaming,” a ti nah.
3 Tedae BOEIPA kah puencawn loh Tishbi Elijah te, “Thoo, Samaria manghai kah puencawn rhoek doe hamla cet laeh. Amih te, ‘Israel khuiah Pathen om pawt tih nim Ekron pathen Baalzebub te toem hamla na caeh uh?’ 4 ‘Te dongah BOEIPA loh he ni a thui. Baiphaih na paan bangla te lamloh na suntla mahpawh, na duek rhoe na duek ni,’ ti nah,” a ti nah tih Elijah te cet.
5 Puencawn rhoek a taengla a mael uh vaengah tah amih te, “Balae tih na mael uh?” a ti nah.
6 Te dongah amah te, “Kaimih doe ham hlang ha pawk tih kaimih taengah, ‘Cet uh, nangmih aka tueih manghai taengla mael uh lamtah BOEIPA loh a thui he anih taengah thui pah. Israel ah Pathen om pawt tih nim, Ekron pathen Baalzebub te dawt ham nang n'tueih. Te dongah baiphaih na paan vanbangla te lamloh na suntla mahpawh, na duek rhoe na duek ni,’ a ti,” a ti nah.
7 Te vaengah amih te, “Nangmih doe ham ha pawk tih nangmih taengah he ol aka thui hlang kah laitloeknah tah metlam a om?” a ti nah.
8 Mat 3.4; Mrk 1.6Manghai taengah, “Hlang te a mul thah tih, a cinghen ah maehpho hailaem a vaep,” a ti nah.
Te vaengah, “Tishbi Elijah ni te,” a ti nah.
9 Te phoeiah Elijah taengla sawmnga kah mangpa neh a hlang sawmnga te a tueih. Elijah te a paan vaengah tah tlang lu ah tarha ana ngol pah tih, “Pathen kah hlang aw manghai loh, ‘Ha suntla laeh,’ a ti,” a ti nah.
10 Luk 9.54Elijah loh sawmnga mangpa te a doo tih, “Kai he Pathen kah hlang coeng atah vaan lamkah hmai ha suntla saeh lamtah nang neh nang kah hlang sawmnga te n'hlawp saeh,” a ti nah. Te vaengah vaan lamkah hmai ha suntla tih anih neh a hlang sawmnga te a hlawp.
11 Te phoeiah mael tih a tloe sawmnga mangpa neh a hlang sawmnga te Elijah taengla a tueih. A doo vaengah Elijah te, “Pathen kah hlang aw, manghai loh he ni a thui, hat suntla laeh,” a ti nah.
12 Elijah loh a doo tih amih te, “Kai he Pathen kah hlang atah vaan lamkah hmai ha suntla saeh lamtah namah neh na hlang sawmnga te n'hlawp saeh,” a ti nah. Te dongah Pathen kah hmai te vaan lamkah suntla tih anih neh a hlang sawmnga te a hlawp. 13 Mael tih a pathum ah sawmnga kah mangpa te a hlang sawmnga neh a tueih tih cet. A pathum kah sawmnga mangpa tah a pha neh Elijah hmai ah a khuklu a cungkueng pah. Te phoeiah anih te a hloep tih a taengah, “Pathen kah hlang aw ka hinglu neh na mikhmuh kah na sal sawmnga kah hinglu he kueinah mai. 14 Vaan lamkah hmai suntla tih lamhma kah sawmnga mangpa rhoi neh a hlang sawmnga te a hlawp coeng ne. Tedae na mikhmuh ah ka hinglu he kueinah mai,” a ti nah.
15 Te vaengah BOEIPA kah puencawn loh Elijah te, “A taengah suntla lamtah a mikhmuh ah rhih boeh,” a ti nah. Te dongah thoo tih anih neh manghai taengla cet. 16 Te phoeiah manghai te, “BOEIPA loh he ni a thui. Amah ol te dawt hamla Israel ah Pathen om voel pawt tih nim Ekron pathen Baalzebub dawt hamla puencawn na tueih? Te dongah baiphaih na paan bangla te lamloh na suntla mahpawh, na duek rhoe na duek ni,” a ti nah. 17 Te dongah Elijah loh a thui BOEIPA ol bangla duek tih Jehoram te anih yueng la manghai. Anih te capa a khueh pawt dongah Judah manghai Jehoshaphat kah a kum bae dongah manghai coeng. 18 Ahaziah kah ol noi neh a saii te Israel manghai rhoek kah khokhuen olka cabu dongah a daek uh moenih a?