1  BOEIPA loh Moses te a voek tih, 2 “Israel ca rhoek te uen lamtah amih te thui pah. Nangmih Kanaan khohmuen la aka kun rhoek aw, khohmuen he tah nangmih ham Kanaan khohmuen kah rho la a rhibawn neh ha yalh bitni.

3  Tuithim baengki ah Zin khosoek lamloh Edom ngong phai Edom te nangmih ham om bitni. Tuithim khorhi tah lungkaeh li a bawt lamloh khothoeng hil nangmih ham om bitni. 4  Nangmih ham khorhi tah tuithim kah Akrabbim kham ah a hil vetih Zin a poeng duela om ni. Te phoeiah Kadeshbarnea tuithim lamloh a hmoi ah pawk vetih Hazaraddar a pha phoeiah Azmon la pawk ni. 5  Azmon lamkah soklong khorhi te Egypt la a hil vetih a bawtnah tuipuei ah om ni.

6  Khotlak kah khorhi te khaw tuipuei len hil te nangmih ham om vetih khotlak khorhi te nangmih ham khorhi la om ni.

7  Tlangpuei khorhi te tuipuei len lamloh nangmih ham om vetih Hor tlang te namamih ham thuun thiluh. 8  Hor tlang lamloh Lebokhamath te thuun uh lamtah khorhi hmoi te Zedad la pawk saeh. 9 Te phoeiah khorhi te Ziphron la pawk vetih Hazarenan ah a bawt om ni. He tah nangmih ham tlangpuei kah khorhi la om ni.

10  Khothoeng kah khorhi te Hazarenan lamloh Shepham duela nangmih ham thuun sak. 11  Riblah Shepham lamkah khorhi te Ayin khothoeng ah suntla saeh lamtah khorhi aka suntla te khothoeng kah Kinnereth tuipuei kah hlaep la khoe saeh. 12  Khorhi te Jordan la suntla bal saeh lamtah a bawtnah te lungkaeh li ah om saeh. He tah khohmuen kaepvai ah nangmih ham rhilung la om ni,” a ti nah.

13  Lam 26. 52-56. Josh 14. 1-5. Te phoeiah Moses loh Israel ca rhoek te a uen tih, “BOEIPA loh koca pako neh koca rhakthuem taengah paek ham a uen vanbangla khohmuen he hmulung neh tael uh. 14  A napa rhoek kah imsawn tarhing ah Reuben ca rhoek kah koca neh a napa rhoek imsawn tarhing ah Gad ca rhoek koca loh a yo uh. Amih kah rho te Manasseh koca rhakthuem a loh. 15  Koca panit neh koca rhakthuem loh a rho te khothoeng ah khocuk kah Jerikho Jordan kah rhalvangan ah a doe uh coeng, ” a ti nah.

16  BOEIPA loh Moses te a voek tih, 17  He kah ming aka om hlang rhoi, khosoih Eleazar neh Nun capa Joshua loh nangmih ham khohmuen han tael bitni. 18  Khoboei khaw koca pakhat lamloh khoboei pakhat tah khohmuen aka tael la lo. 19  He hlang rhoek a ming tah,

Judah koca lamloh Jephunneh capa Kaleb, 20  Simeon ca rhoek kah koca lamloh Ammihud capa Samuel, 21  Benjamin koca lamloh Khislon capa Elidad, 22  Dan ca rhoek koca kah khoboei Jogli capa Bukki, 23  Joseph capa Manasseh ca rhoek kah koca lamloh Ephod capa khoboei Hanniel, 24  Ephraim ca rhoek kah koca lamloh Shiphtan capa khoboei Kemuel, 25  Zebulun ca rhoek kah koca lamloh Parnach capa khoboei Elizaphan, 26  Issakhar ca rhoek kah koca lamloh Azzan capa khoboei Paltiel, 27  Asher ca rhoek kah koca lamloh Shelomi capa khoboei Ahihud, 28  Naphtali ca rhoek kah koca lamloh Ammihud capa khoboei Pedahel saeh,” a ti nah.

29  Te rhoek te Kanaan khohmuen ah Israel ca rhoek phaeng sak ham BOEIPA loh a uen.