3
Le'ec ada' u t'an aj Juan aj tz'aj ocja' ich p'atal lu'um.
1 Pues te'i. Quince jaab tun ococ aj Tiberio ti reyil. Ti'i ilic a q'uin abe'e, que'en aj Poncio Pilato ti gobernadoril tu cuenta Judea. Que'en aj Herodes ti gobernadoril tu cuenta Galilea. Que'en u yitz'in le'ec aj Felipe ti gobernadoril tu cuenta Iturea cuenta Traconite. Que'en aj Lisanias ti gobernadoril tu cuenta Abilinia. 2 Le'ecoo' a mas nooch u wichil u meyaj tu yaamoo' u yaj mansaj t'an a cristiano ti'i a Dioso, le'ec aj Anas etel aj Caifasa. Ti'i ilic a q'uin abe'e, udi u pectzil a Dios etel aj Juana, le'ec u mejen aj Zacariasa. Que'en aj Juan ich p'atal lu'um.* Jn 11:49; Jn 18:13; Hch 4:6 3 Joq'ui te'i. Bini ti t'an tulacal tuba tu chi' a noja' Jordana. U yadaj ti'ijoo' a cristiano ca' u c'ümoo' a ocja'a. Le'ec abe' u p'is ca' u jelajoo' u tucul, y sa'tesaboo' u sip'il u men a Dioso.* Mal 4:6; Mt 3:1; Mr 1:4; Hch 13:24; Hch 19:4; Lc 1:77 4 Baala' ti tz'iiba'an yoc'ol aj Juan u men aj Isaiasa, le'ec jun tuul u yadaj u t'an a Dios uchi:
—Le'ec ada' u t'an jun tuul mac ich p'atal lu'um. “Tojquinte'ex a na'at ca' a c'üm-oolte'ex a Noochtzili, jabix cuchi tane'ex a tojquintic a beje,” cu t'an.* Is 40:3; Mt 3:3; Mr 1:3; Jn 1:23 5 “Yan u buut'bul a jooco. Yan u paanbül a witzi. Yan u tojquinbil tuba ma' toj. Quetcunte a bej a ma' quet u wichi,” cu t'an. 6 “Tulacaloo' a cristiano yoc'olcaba, beloo' u cu yeelte biqui ca' sa'albücoo' u men a Dioso,” cu t'an a jun tuul mac ich p'atal lu'umu,—
cu t'an a t'an a tz'iiba'an u men aj Isaias yoc'ol aj Juana.* Sal 98:2; Is 52:10
7 Pues te'i. Yaaboo' a cristiano a c'ochoo' etel aj Juana. U c'atoo' u c'ümoo' a ocja'a. —Inche'exe, top c'ase'ex jabixe'ex u yal can. ¿Mac u yadaj te'ex ca' talaque'ex ti'i ma' a c'ümique'ex u tz'iiquil a Dioso?— cu t'an aj Juan ti'ijoo'o.* Mt 3:7 8 —Bete'ex a qui'i, ti'i ca' chiclac ti jela'ane'ex a tucul. Ma' a wadique'ex ta bajil wa c'üma'ane'ex chen u men u mame'ex aj quimen Abraham. Tan in wadic te'ex. Le'ec a Dioso, jede'ec u paatal u su'tesic ca'ax le'ec boon a tunich ada' ca' p'aatüc ti'i u mamoo' aj Abraham,— cu t'an ti'ijoo'.* Is 1:16; Ez 18:27; Hch 26:20; 2 Co 7:10; He 6:7 9 —Inche'exe, jabixe'ex a che'e. Paac' u ca'a a baat ti'i u ch'ücbeeb. Tulacal boon a che' a ma' quich'pan u wichi, bel u ca'a ch'ücbül. Bel u ca'a pulbul ich c'aac',— cu t'an aj Juana.* Mt 1:19; Jn 15:2,6 10 —Ti baalo'o, ¿c'u' a ca' ti bete'e?— cu t'anoo' a cristiano ti'i aj Juana.* Hch 2:37 11 —Le'ec mac a yan ti'i ca' tziil u noc'o, yan u tz'eec jun tziilac ti'i mac a ma'ax jun tziil a yan ti'iji. Baalo' ilic ti yan u jützic u janal a mac a yan ti'iji,— cu t'an aj Juan ti uchi u nuuc.* 2 Co 8:14; 1 Ti 6:18; Stg 2:15; 1 Jn 3:17 12 C'ochoo' aj mol taq'uin ti'i a gobiernojo. U c'atoo' cuchi ca' tz'abücoo' u yocja' u men aj Juan. U c'aatajoo' ti'i aj Juan. —Maestro, ¿c'u' a yan ti betic ino'ono?— cu t'anoo' ti'i.* Mt 21:32 13 —Ma' a molique'ex a taq'uin ti manal tuwich boon a tz'aja'an a molique'exe,— cu t'an aj Juan ti'ijoo'o.* Mi 6:8; Lc 19:8 14 —Uxtun ino'ono, ¿c'u' a yan ti betic ino'ono?— cu t'anoo' a soldado ti'iji. —Ma' a toquique'ex c'u' a yan ti'i ulaac'a, ma'ax etel muc' ma'ax etel tus. Jetz'a'anaque'ex a wool etel a naal,— cu t'an ti'ijoo' a soldadojo.* Ex 23:1; Lv 19:11
15 Pues te'i. Le'ecoo' a cristianojo, tanoo' u paac'tic u chictal a Cristo ti jomol. —Uchac aj Juan a Cristojo,— cu t'anoo' a cristianojo. 16 Uchi u nuuc aj Juana. —Inene, walac in tz'eeque'ex ti ocja' chen etel ja',— cu t'an. —Watac jun tuul a mas nooch u meyaj tin wichi. Ma' chucul in yanil ma'ax ti'i ca' in joq'ues u cayte. Bel u cu tz'a'e'ex ti ocja', pero chen etel u Püsüc'al a Dioso, y etel jabix c'aac',— cu t'an.* Mt 3:11; 1 Co 12:13 17 —Ala'aji, jabix mac a que'en a pala tu c'ü' ti'i u pulical u semilla a harina* trigo wa wheat ti ca'nal. Baalo' tu yuusbul u men a iq'ui, ca' joc'oc u c'asil. Bel u cu taac'te u semilla harina a quich'pana, pero le'ec u pacha, bel u ca'a chuwbul ichil a c'aac' a ma' yan q'uin u tupulu,— cu t'an aj Juan ti'ijoo'o.* Mi 4:12
18 Pues te'i. Ma' jadi' abe' u yadaji. Chawac u pach u tzicbal aj Juana. U yadaj u qui'il u t'an a Dios ti'ijoo' a cristianojo. 19 C'u' betiqui, u tze'ectaj aj gobernador Herodese, u men u ch'a'aj u mu', le'ec ix Herodiasa. Ala'aji, u yütan u yitz'in. U tze'ectaj ilic yoc'ol boon ulaac' a c'as u betaja.* Pr 28:15,16; Mt 11:2; Mt 14:3; Mr 6:17 20 U betaj ulaac' a c'as aj Herodese, le'ec ca' u tz'aj aj Juan ti presojil.
Tz'abi a Jesus ti ocja'.
21 Pues te'i. Le'ec ti ma'ax to tz'abüc aj Juan ti presojili, tan u tz'eec ti ocja' tulacaloo' a cristianojo. Ti a q'uin abe'e, u tz'aj ilic a Jesus ti ocja'. Le'ec ti jobi ti ocja' a Jesusu, tan to u t'an ala'i etel a Dios le'ec ti jeebi a ca'ana.* Mt 3:13; Jn 1:32 22 Te'i chiclaji jabix paloma u Püsüc'al a Dioso. Emi yoc'ol a Jesusu. Uchi a t'an ti ca'ana. —Inchech in Mejenech. Yaj in wu'yeech. Qui' in wool ta wetel,— cu t'an a t'an ti ca'ana.* 2 P 1:17
Le'ec ada' u c'aba'oo' u uchben mamaa' a Jesusu.
23 Pues te'i. Jabix wal treinta jaab yan ti'i a Jesus ti caji ti manül u yadü' u pectzil a Dioso.
—A Jesusu, u mejen aj Jose,— cu t'anoo' a cristianojo, pero chen u tuclajoo' ti baalo'.
Le'ec u tat aj Joseje, aj Eli u c'aba'.* Nm 4:3,35,39,47; Mt 13:55; Jn 6:42
24 U tat aj Eliji, aj Matat u c'aba'.
U tat aj Matata, aj Levi u c'aba'.
U tat aj Leviji, aj Melqui u c'aba'.
U tat aj Melquiji, aj Jana u c'aba'.
U tat aj Janaja, aj Jose u c'aba'.
25 U tat aj Joseje, aj Matatias u c'aba'.
U tat aj Matatiasa, aj Amos u c'aba'.
U tat aj Amoso, aj Nahum u c'aba'.
U tat aj Nahumu, aj Esli u c'aba'.
U tat aj Esliji, aj Nagai u c'aba'.
26 U tat aj Nagaiji, aj Maat u c'aba'.
U tat aj Maata, aj Matatias u c'aba'.
U tat aj Matatiasa, aj Semei u c'aba'.
U tat aj Semeiji, aj Jose u c'aba'.
U tat aj Joseje, aj Juda u c'aba'.
27 U tat aj Judaja, aj Joana u c'aba'.
U tat aj Joanaja, aj Resa u c'aba'.
U tat aj Resaja, aj Zorobabel u c'aba'.
U tat aj Zorobabele, aj Salatiel u c'aba'.
U tat aj Salatiele, aj Neri u c'aba'.
28 U tat aj Neriji, aj Melqui u c'aba'.
U tat aj Melquiji, aj Adi u c'aba'.
U tat aj Adiji, aj Cosam u c'aba'.
U tat aj Cosama, aj Elmodam u c'aba'.
U tat aj Elmodama, aj Er u c'aba'.
29 U tat aj Ere, aj Josue u c'aba'.
U tat aj Josueje, aj Eliezer u c'aba'.
U tat aj Eliezere, aj Jorim u c'aba'.
U tat aj Jorimi, aj Matat u c'aba'.
30 U tat aj Matata, aj Levi u c'aba'.
U tat aj Leviji, aj Simeon u c'aba'.
U tat aj Simeono, aj Juda u c'aba'.
U tat aj Judaja, aj Jose u c'aba'.
U tat aj Joseje, aj Jonan u c'aba'.
U tat aj Jonana, aj Eliaquim u c'aba'.
31 U tat aj Eliaquimi, aj Melea u c'aba'.
U tat aj Meleaja, aj Mainan u c'aba'.
U tat aj Mainana, aj Matata u c'aba'.
U tat aj Matataja, aj Natan u c'aba'.* Zac 12:12; 2 S 5:14; 1 Cr 3:5
32 U tat aj Natana, aj David u c'aba'.
U tat aj Davidi, aj Isai u c'aba'.
U tat aj Isaiji, aj Obed u c'aba'.
U tat aj Obede, aj Booz u c'aba'.
U tat aj Boozo, aj Salmon u c'aba'.
U tat aj Salmono, aj Naason u c'aba'.* Rt 4:18; 1 S 17:58; 1 Cr 2:10; Sal 72:20; Is 11:1,2; Mt 1:3-6; Hch 13:22,23
33 U tat aj Naasono, aj Aminadab u c'aba'.
U tat aj Aminadaba, aj Aram u c'aba'.
U tat aj Arama, aj Esrom u c'aba'.
U tat aj Esromo, aj Fares u c'aba'.
U tat aj Farese, aj Juda u c'aba'.
34 U tat aj Judaja, aj Jacob u c'aba'.
U tat aj Jacobo, aj Isaac u c'aba'.
U tat aj Isaaca, aj Abraham u c'aba'.
U tat aj Abrahama, aj Tare u c'aba'.
U tat aj Tareje, aj Nacor u c'aba'.* Gn 11:24,26
35 U tat aj Nacoro, aj Serug u c'aba'.
U tat aj Serugu, aj Ragau u c'aba'.
U tat aj Ragauju, aj Peleg u c'aba'.
U tat aj Pelegue, aj Heber u c'aba'.
U tat aj Hebere, aj Sala u c'aba'.
36 U tat aj Salaja, aj Cainan u c'aba'.
U tat aj Cainana, aj Arfaxad u c'aba'.
U tat aj Arfaxada, aj Sem u c'aba'.
U tat aj Seme, aj Noe u c'aba'.
U tat aj Noeje, aj Lamec u c'aba'.* Gn 11:12; Gn 5:6; Gn 11:10
37 U tat aj Lameque, aj Matusalen u c'aba'.
U tat aj Matusalene, aj Enoc u c'aba'.
U tat aj Enoco, aj Jared u c'aba'.
U tat aj Jarede, aj Mahalaleel u c'aba'.
U tat aj Mahalaleele, aj Cainan u c'aba'.
38 U tat aj Cainana, aj Enos u c'aba'.
U tat aj Enoso, aj Set u c'aba'.
U tat aj Sete, aj Adan u c'aba'.
U tat aj Adana, le'ec a Dioso.* Gn 1:26,27; Gn 2:7; Gn 5:1,2; Is 64:8
*3:2 Jn 11:49; Jn 18:13; Hch 4:6
*3:3 Mal 4:6; Mt 3:1; Mr 1:4; Hch 13:24; Hch 19:4; Lc 1:77
*3:4 Is 40:3; Mt 3:3; Mr 1:3; Jn 1:23
*3:6 Sal 98:2; Is 52:10
*3:7 Mt 3:7
*3:8 Is 1:16; Ez 18:27; Hch 26:20; 2 Co 7:10; He 6:7
*3:9 Mt 1:19; Jn 15:2,6
*3:10 Hch 2:37
*3:11 2 Co 8:14; 1 Ti 6:18; Stg 2:15; 1 Jn 3:17
*3:12 Mt 21:32
*3:13 Mi 6:8; Lc 19:8
*3:14 Ex 23:1; Lv 19:11
*3:16 Mt 3:11; 1 Co 12:13
*3:17 trigo wa wheat
*3:17 Mi 4:12
*3:19 Pr 28:15,16; Mt 11:2; Mt 14:3; Mr 6:17
*3:21 Mt 3:13; Jn 1:32
*3:22 2 P 1:17
*3:23 Nm 4:3,35,39,47; Mt 13:55; Jn 6:42
*3:31 Zac 12:12; 2 S 5:14; 1 Cr 3:5
*3:32 Rt 4:18; 1 S 17:58; 1 Cr 2:10; Sal 72:20; Is 11:1,2; Mt 1:3-6; Hch 13:22,23
*3:34 Gn 11:24,26
*3:36 Gn 11:12; Gn 5:6; Gn 11:10
*3:38 Gn 1:26,27; Gn 2:7; Gn 5:1,2; Is 64:8