2
Espíritu Santota yepsakähui
1 Juka Pentecostés pajkota yumáko, sïme jume Jesuristota súaleme náu lópola aaney; nánancha éaka. 2 Huanäi jíahui tehueka bétana jíkkaijtuk, jekata úttea huë bénasi jíaka. Huanäi jü káari bem anéïpo jíahuiy tápunak. 3 Huanäi jume nínnim bénaka éntok taij rupáktiriata bénaka ámeu yeu machíak, huepülaka sïmem bëkatana emo näikimtelataka. 4 Huanäi sïme Espíritu Santoy tapunak, éntokim täbui nokpo noktáitek jum Espíritu Santota am noktúä pámani.
5 Huámechi taáhuarimmet jum buere joära Jerusalémpo judíom aaney, Diosta nésahui joame, sïme ániat bétana áma yáij‑lataka. 6 Huaka jíahuita kusisi jíamta jíkkajaka jü génte nau rúktek. Huanärim büruk eiyai, bueïtukim huëpulaim bem noki am nokái am jíkkajai 7 áachim guómtilataka tahuaka ínel nau jiaka:
—Jachum kaa Galiléapo joome sïme imï nokame, 8 ¿jáchisu júntukim huepülaka itom yoiyöhuam nokpo nooka? 9 Ímim ito násuk aane jume géntem Pártiapo joome, Médiapo, Elampo, Mesopotámiapo, Judea bétana, Capadocia bétana, Ponto bétana, éntok Asia buiära bétana, 10 Frigia bétana, Panfilia bétana, Egipto bétana, éntok África buíaräpo Cirene pueblo chíkola joómem. Romáanom júne im aane im jóakame. Huate tua judíomtaka im aane, huate éntok, kia bem boojóriäpo ámemak kimúlamtaka. 11 Huate ket Creta bétana im aane, éntok buiära Arabia bétana. Të sïmete tua itom nokpo juka kaa jaibu johuamta Diosta yáari bétana nokame jíkkaja.
12 Sïme at guómtilataka kaachin anmáchiakai. Huanärim nau emo nátemaje:
—¿Jítatu báaresa jäni ïri?
13 Huate éntok, am junnériaka ínel jiaahua:
—Bempo kíalim naakolam.
Kësam Perota géntemmeu nokakähui
14 Huanäi jü Peero kíktek, jume once apóstolimmaki. Huanäi kusisi jume géntemmeu ínel jiaahua:
—Eme oóhuim Judéapo joome éntok sïme buere joära Jerusalémpo jóakame, íkärem jüneria, éntokem tüisi ä jíkkaja íka ín enchimmeu nokbárëhui. 15 Ímëi oóhuim katim naakolam enchim am ériä bénasi, bueïtuk kethuéeyo, én jübua jamak bátanim jiaahua. 16 Ï enchim jíkkajäu júnen hua profeta Joelta nokákähui ínel jíame:
17 Jume taahuarim lüteyo, tiahua jü Dios,
juka ín Espíritune sïme yorémemmet chibejtianake.
Huanäi jume enchim üusim éntok enchim mälam juka ín Espíritu am noktúähuim noknake,
jume jübua yoyötume éntok, tenkumta bénasi éaka Diosta bétana huemta bínnake.
Jume öolamm entok tenkunake.
18 Tua lútüriapo huámechi taáhuarimmetne ín sáuhuëhuimmet ohuim entok jamuchimmet ín Espíritu amet chibejtianake,
huanärim juka ín Espírituta am noktúäu noknake.
19 Áman téhuekapone at guómtisi machik yeu machírianake,
imï buíapo éntokne ímëi señaalim ayutuanake:
ójbo, tajji éntok buichía jaahua.
20 Jü täa kaa machisi tahuanake,
jü mecha éntok, ójbota bénasi síkilisi,
kee juka täahuata yúmayo juka Señorta,
buéresi ujyorisi yepsayo.
21 Huanäi sïme huame Señorta téhuam yöreka am tehuame jínëutunake.
22 ’Júntukem ikäy nokta jíkkaja eme oóhuim Israelíitam, Dios juka Jesús Nazarenotat enchim tayatuak, buéresi at guómtisi machik señayáalim yakari áapörik huämi. Bueïtuk ä kókkohuame kara jíbba ä úttiäray bétuk ä jípurey. 23 Júnentaka junne huam Diosta bannaataka áachä jünaktekäpo áman enchim mampo ä tóijhuak, eme ä pereesoteka jujjuëna yóremem mampo ä yétchak, kúrusit ä poponaka bem ä mënakë béchïbo. 24 Të Dios júchi ä jíabitetuak, hua kókkohuamta útteara bétana áma ä yorétuaka, bueïtuk hua kókkohuame kara jíba ä útteara bétuk ä jípurei. 25 Bueïtuk David Jesústa bétana nokaka ínel jiaahua:
Ínapone jíba juka Señorta bitchay ínomak anemta.
Bueïtuk áapo ínomak ín báta bétana ínomak aane,
kayta ára nee tatabnake.
26 Kíalïkune tüisi jiápsipo al‑leaka tahuak ín ninï junne ál‑leaka nooka.
Éntokne kaítat jachin eiya ín takahua muknakey junne át boobíchaka,
27 bueïtuk empo ín jíapsi kaibu huam kókkolam násuk tahuárianake,
éntoke hua em nákëu santosi au nükamta takahua kaybu nasóntunake.
28 Empo nee téjhuak jachin ayuka ín yu jíapsinakëhui,
éntoke buéresi nee al-leetuanake ínomak aneka.
29 ’Eme ínomak huéerim, tua machisi jüneriahua juka itom yoyöhua Davidta mukilatukähui bóoveda ketune ímï buíapo óorek. 30 Të jü David profeetatukay; kíalïku jüneiyai juka Diosta au ä nätuakähui éntok ä lútüria yáakähui senuk áapörikut yeu simriata Cristotunakëhui, ä nésauhuëpo ä nésaunakë béchïbo. 31 Kíalïku jü David profetataka chë bannaataka ä bil-lataka juka Crístota jíabitenake bétana nookak, entok huaka ä jíapsihua kaa kókkolam násuk tahuánake bétana, entok ä takahua júne kaa nasontunake bétana. 32 Júnëli jü Dios íkäi Jesústa jíabitetuak, éntok íäri bétana sïme ítapo testiigom. 33 Dios ä báta bétana ä yétchak yörisi machiku. Huanäi juka Espíritu Santota mabétaka, huaka Dios Áchaita nätuari, áapo itou ä bíttuak. Júntuk ï enchim bíchähui éntok enchim jíkkajähui áa bétana huéiye. 34 Bueïtuk kaa áapo jü David téhuekau jikáu siika; bueïtuk áapo, jü David, ínel jiaahua:
Jü Dios ín Señorbeu ínel jiaahua:
“In báta bétanë yeesa yörisi machiku,
35 jume em béj‑rim em útteara bétuk ín tahuáriäu tajti.”
36 ’Júntuk eme sïme jü pueblo Israel, akem ä jüneria lútula huëpo íkäi Jesústa enchim kúrusit popóntebokäuta jü Dios Señorpo ä tahuáriak éntok Crístopo, bueïtuk áapo yéä púuhuak ä nésaunakë béchïbo.
37 Íkärim jíkkajaka, bem jiápsipo ä jímmaaka, tüisi kaa al‑léaka taahuak. Huanärim Perotau ínel jiaahua éntok jume huate apóstolimmehui:
—Eme itomak huéerim, ¿ensu, jáchisute ayúnake?
38 Huanäi Peero ínel am yómmiak:
—Emóem temajeka jíapsi kúakte Diostau bíchaa, éntokem sïme emo batötebo Jesucrístota téhuampo, enchim kaa tühua yáarimmet enchim jiókorinä béchïbo. Huanäi jü Dios juka Espíritu Santota enchimmet kom jünaktenake. 39 Bueïtuk hua Diosta nätuari enchim béchïbo näikiari, éntok enchim üusim béchïbo, éntok kia sïme huame mekka aneme béchïbo junne; kia jábeta béchïbo juka itom Señor Diosta nunubárëhui.
40 Jü Peero íkäi noksuka, éntok huátek ámeu nokaka, ínel am téjhuak:
—Ime génte én kat‑riame jujuëna násukem yeu kaate, bueïtuk jü noki béttesi machika ámet hüechila.
41 Júnëli huame íkäi tü nokta súalekame batöhuak. Huanäi huáachï taáhuarit baij miltumáchika jume Jesucrístota súalemmeu rúktek. 42 Huanäi sïme jíba huame apóstolim am majtíä páman kaatei, nánancha éaka éntok Diostau buanaka. Éntokim nau rúkteka jume páanim nat nánäikimtei Señorta am sáhuekä bénasi au bem huáatinakë béchïbo.
Jume Jesucrístota bat súalekame jachin emo nükähui
43 Sïme jü génte at guómtilataka taahuak. Jume apóstolim éntok, juebena señáalim kaa jaibu johuame johuai. 44 Sïme jume Jesucrístota súaleme huépülai bénasi nau aaney, éntokim bem áttea nau átteakai. 45 Bem áttea, jita júne bem jípurëhuim nénenkai, huanäi huame jábesu jítasä ámeu bëyë huéeläpom juka tómita ámet nánäikimtei. 46 Chikti táapom jíba bénasi éaka jum tiöpopo nau aaney, éntokim jum bem jóapo nau yájaka al‑léaka nau jïbuäi, kaachin emo ériaka. 47 Diosta bétanam tühuata nookai ä baisáuhueka, éntok sïme jü génte am nakkei. Jü Señor entok, chikti táapo jume ä jínëusimëu huame huate ä súalemmeu rúktiasimey.