1 Ngahan Pablo ne, apóstol tsëhë Jesucristu ngahan ta, tsëhë xi cuatjin camameje rë Nina. Ngahan cojo Timoteo xingueen ne, 2 ningátjin nuju carta vihi ngayun xuta nandya Colosas, ngayujun ni xuta ladu rë Nina xi jercu ndaja titsangunndujun cojo ndiya rë me hacuaha tjin tangun cjuatacun nuju cojo Jesucristu. Nina Nahmi naja ne, catisua nuju me cjuandaja cjuajeya.

3 Jercu tihín nacuechji rë Nina Nahmi rë Nai naja Jesucristu yasen yasen ni, hya xi nihñi oración ngatsë nuju. 4 Tihín nacuechji rë Nina ta camachaya niji hacutjin xi ngayun ne, mangutacún cojo Jesucristu hacuaha nihmutacún yëjë ni xuta ladu rë Nina. 5 Cuatjin tinihñu ta, jercu vetuhun tacún cjuandaja xi Nina tacunxin rë me ngajan ngahnga xi cuma nuju ngayujun ni. Cavetsuhun cavetuhun tacún cuatjin, hatsëë hya xi canuhyun cjuandajyihi xi cjuaquixi, xi chja tsëhë Jesucristu. 6 Cjuandajyihi jan ne, casacu camachaya nuju sacuatjin sa rë yahnga xuta tsëhë jercu cjín sa cahndë́. Hane xi macjain rë xuta cjuandajyihi jan ne, jercu tisahmi me cjuandaja, hacuaha jercu cjín sa xuta tijimacjain rë me. Cuanitjin tivatju ngajñi nuju ngayujun ni, hisca hya xi camachaya nuju cjua jan hacuaha ndaja cavijnercun xi Nina ne, jercu sahmi me cjuandaja. 7 Cuatjin cachja cojo nuju Epafras, me xi jercu vinga niji hacuaha tangun fahacuenda me cojo niji xa xi vitexa Jesucristu. Me vëhë ne, jercu ndaja cjuinduju me tifahacuenda me tsëhë xa jan cojo sa xi tsujun ndaja. 8 Hacuaha casua me camachaya niji xi ngayujun ni ne, tjin nuju cjuahmutacun cojo yëjë ni xuta ladu rë Nina, cojo cjuahmutacun xi sua nuju Hasen rë Nina.

9 Ngatsë rë xi cuatjin camachaya niji tsëhë cjua xi chja tsujun ngayujun ni ne, vëhë xi tinihñi oración tsujun ngayujun ni yasen yasen ni hisca hya xi camachaya niji. Tichjahyin rë Nina xi cuijnercun yëjë hacutjin xi meje rë Nina xi nihñu. Tichjahyin rë me xi ndaja tuxaha cjuatacun nuju hacuaha cuijnercun cojo cjuatacun xi sua nuju Hasen rë Nina. 10 Cuatjin tichjahyin rë me, cojo sa xi ngayujun ni ne, cuangunndujun cojo ngasunhndë nuju sacuatjin meje rë xi sahmi xuta ladu rë Nai naja, cojo sa xi chuya rë me tsëhë yëjë ni xi nihñu. Cuatjin tichjahyin rë me, cojo sa xi ngayujun ni ne, nihñu yëjë ni xcusun cjuandaja, hacuaha ndaja sa chun Nina ngu nixtin ngu nixtin. 11 Nina catisua nuju me ndaja cjín ngahñu, tucu ngahñu xi tjin rë me, cojo sa xi yëjë ni nixtin scaa nuju cojo yëjë ni xcusun xi vatjun má hacuaha nijyun tacún cojo xuta, táha tijimasua nuju. 12 Cuatjin tichjahyin rë Nina, cojo sa xi ngayujun ni ne, tuhun nacuechji rë Nahmi naja ngatsë rë xi me vëhë ne, cavëhëchjine nuju me cojo sa xi cojo ngayun satë nuju cjuandaja xi sua me xuta ladu rë me ngajan ngahnga. 13 Nina Nahmi naja ne, cavaxëtje naja me tsëhë xitsehen xi matitjun tsëhë yëjë ni cjuatsehen, hane cavejña naja me tsja Quihndi rë me xi jercu hmucacun me. 14 Cojo xcusun xi casahmi Quihndi rë me jan ne, Nina ne, cavechjitje me yëjë ni jyë́ xi quitjen xuta, hane catsinchataha me ngayaan.

15 Quihndi rë me jan ne, tsingacun naja hacutjin xcusun rë Nina cojo Hasen rë me, handasa maji matsejen Nina. Quihndi rë me jan ne, hatuxa matitjun me tsëhë yëjë ni xi casahmi Nina ta, 16 tsëhë xi cojo me ne, Nina ne, casahmi me yëjë ni xi tjin ngasunhndë xi tsejen, cojo yëjë ni xi tjin ngahnga xi matsijin, sacuaha yëjë ni xcusun hasen xi matitjun sa hasen ndaja sa hasen tsehen. Cojo me vëhë ne, casahmi Nina yëjë ni, cojo sa xi yëjë ni xi cuacun jan ne, sahmi jyë sahmi hnga rë me. 17 Quihndi rë me jan ne, hatuxa matitjun me tsëhë yëjë ni xi casahmi Nina ta, tsëhë xi me vëhë xi tjun sa tacun me xi cuma rë yëjë ni hacuaha ngatsë rë me vëhë ne, siuchihin yëjë ni. 18 Me vëhë ne, vitexa me xuta ladu rë Nina sacuatjin rë rcuun xi vitexa rë yojo naja. Hacuaha sua me cjuahñu xatsë xuta ladu rë Nina ta, tsëhë xi me vëhë tjun tjun me cavuya me cjuahñu tsëhë ngajñi rë yëjë nima, cojo sa xi cumatitjun camahani me. 19 Quihndi rë Nina jan ne, tsingacun naja hacutjin xcusun rë Nina cojo Hasen rë me ta, tsëhë xi cachuya rë Nina xi cuisehentë me cuejñacahndë suvá me cahntsua xahasen rë Quihndi rë me. 20 Nina Nahmi naja ne, cavejña naja me tsja Quihndi rë me, tsëhë xi cavejñangucacun me xi cojo Quihndi rë me ne, tsicuya me ladu rë me ngayëjë ngarca ni, sa ngahnga sa ngasunhndë, cojo sa xi cumajyë cumahnga Quihndi rë me jan. Hane ngatsë rë jni rë Quihndi rë me xi cavanga xcun cru ne, hindë tsajin mé cjuachan.

21 Ngayujun ni ne, handasa hatsëë ne, jemu cjin nechun tsëhë Nina hacuaha condra nuju me ngatsë rë xi jemu tsehen cjuatacun nuju hacuaha jemu tsehen xcusun xi canihñu, 22 peru quihndë ne, casahmi Nina xi cavuya nga camandaja yun cojo rë me. Cuatjin casahmi me cojo cjuaveya tsëhë yojo rë Quihndi rë me, cojo sa xi ngayujun ni ne, tsëhë me yun hacuaha tsajin camahani jyë́ nuju, hya xi squindaya nuju me xi cuangun xcun me. 23 Cuatjin cuma sa xi cjuenduju xi siu cahndë́ cjuatacun nuju xi macjain nuju cjuandajyihi xi chja tsëhë Cristu, hacuaha cjuenduju xi vetuhun tacún cjuandajyihi xi canuhyun jan. Hane cjuandajyihi jan ne, casacu camachaya rë xuta tsëhë jercu cjín cahndë́. Hane ngahan Pablo ne, casatëxa ná xi suá machaya rë xuta cjuandajyihi jan.

24 Quihndë ne, ma sua ná xi tivátju cjuañihi cojo sa xi tsujun ndaja. Tisahmechehen tsëhë yëjë ni cjuañihi xi cachja Cristu xi cuátju cuma cojo yojo naha, cojo sa xi tsëhë xuta ladu rë me ndaja, hane ngayejen ni xi ladu rë me ne, sacuaha yojo rë me ngayaan. 25 Ngahan ne, camá ngahan ngu xuta xi visécoo rë xuta ladu rë Cristu, tsëhë xi Nina casuaxa ná me xi cuisécoo nuju ngayun xutaxín, cojo sa xi suá cumachaya nuju tsëhë yëjë ni cjuandajyihi xi cachja me. 26 Cjuandajyihi jan xi cachja me ne, hacui cjuatahahma. Cjua vëhë ne, cavetjo Nina tsëhë yëjë ni xuta xi caviyuju me yëjë ni nixtin xi cavatju, peru quihndë ne, casua me camachaya rë yëjë ni xuta ladu rë me. 27 Nina ne, cavejñangucacun me xi sua me cumachaya rë xuta xi cuacun jan xi cjuatahahma vihi ne, chja xi jercu tsinchacuntihin Nina xutaxín jan. Cuma cuinújan ne, Cristu ne, cuejñacahndë me cahntsua xahasen nuju ngayun xutaxín. Hane cuetuhun tacún xi sehe cuaxëndaja me yun. 28 Ngayin ne, tihín cumachaya rë xuta tsëhë cjua xi chja tsëhë Cristu. Yëjë ni xcusun xuta ne, viyijin me cuidadu hacuaha vicuyin rë me cojo yëjë ni cjuahasen xi tjin niji. Cuatjin nihñi, cojo sa xi yëjë ni xuta xi cuacun jan ne, tyjahi camahani me xi tjin tangun cjuatacun rë me cojo Cristu, hya xi ningacuin me xcun Nina. 29 Ngatsë rë vëhë ne, ngahan ne, hacuaha hñu tisahme xa, hacuaha tisahme ngahñu cojo yëjë ni ngahñu xi tisua ná Cristu.