2
Deo Gauga Kapaꞌina Epalogoniꞌa Auga Aꞌo Falogo Felo
1 Deo ega iifa pukagai Gauga fouga ega eifa oma puo, Deo ega iifa aꞌoꞌi alogoniꞌi efua auꞌi aloꞌa koꞌagai faisa feloꞌi kaiꞌiai fapakaiꞌi. Ega koa epoꞌaisai kai agaꞌo Deo Gauga faemunia ke faepeagea. 2 Gome ufainagai Deo ega iifa agelo akeꞌiai eifafoua, ke Moses eafiia papiau maaꞌiai eifafoua. Egaꞌina iifaꞌi koꞌaꞌi ipaumaꞌi kekapula kekae akelao akemai. Ega kainai kaisau egaꞌina iifaꞌi laaꞌiai eaopagai ke kaiꞌiai aepea auga, ega laomai apala afa feafia auga mo eafiia efua. 3-4 Ke egaꞌina afegai, Lopia Iesu papiau kaniaꞌi ageagamauga auga fouga eifania. Ke aꞌo kelogo papiauꞌi egaꞌina iifaga koꞌa ipauma auga kepakoꞌania iꞌa maaꞌaisai keifafoua. Egaꞌina mo laaꞌi kai, Deo ifo isafa kaniaꞌa ageagamauga auga gouꞌi ekapaiꞌi, ke isapu akaikiꞌagai mirakulo iꞌoiꞌi iꞌoiꞌi ekapaiꞌi ke ifo logogai ega ipeni Spirituga efakeopua epeniiꞌa. Deo ega koa ekapaisa puo, kaniaꞌa isagamauga auga kapa akaikiꞌa ipauma epamia. Kai iꞌa egaꞌina iifaga kapula auga kainai afalapea koa aisama, Iesu amunia auga afa apala faafia auga eegai ala agapiau koko oma? Afaekaina. Ega kainai Deo ega iifa aꞌoꞌi alogoniꞌi efua auꞌi faisa feloꞌi kaiꞌiai mo fapakaiꞌi.
Iesu Au Akaikiꞌa Paisa
5 Deo ega iifa pukagai ega agofaꞌa agemai fouga pau aifania auga agelo aepaꞌimaꞌi. 6 Kai Deo au iꞌoina agaꞌo fepaꞌima eoma. Egaꞌina iifaga koꞌa ipauma auga Deo ega iifa puka alogai, afu agaꞌogai aufalao agaꞌo iina eifa oma:
“Kapa puo Oi papiau aumauni auga kapa akaikiꞌa lopamia loopolaga,
ke gauga isafa loꞌima felo.
7 Ufainagai Oi papiau aumauni gauga,
afaꞌagamo lopaake agelo papaꞌiai lopamia epo aemaefa.
Ega mo ganinagai, isa auga Oi iisamu iꞌopoga mo lopagama puo
Oi koa iꞌopomu au akaikiꞌa lopamia lopalopiania, emu isapu akaikiꞌa lopeniia.
8 Ke kapa maꞌoai isa lopaꞌima ife papagai lopamiaꞌi.” Sam 8:4-6
Deo ega eifa oma koa iꞌopoga, kapa maꞌoai papiau aumauni ife papagai eogeiꞌi, ke kapa agaꞌo aepuaꞌafuga isa aina faeafia aeoma. Ega mo ganinagai, pau Deo kapa maꞌoai papiau aumauni papagai fepamiaꞌi feꞌimaiꞌi auga emia alaisa koa. 9 Kai Deo ega gafegafe akaikiꞌagai Iesu iꞌa maꞌoai fauꞌaisai fekiekie femae, ega koa mae gamuga ala koa auga feopo eoma. Ega puo epaake agelo papaꞌiai epamia kai isa egae mo aeagu epo aemaefa. Iesu iꞌa fauꞌaisai emae afegai, eꞌagaukae Deo kaina kainai eague Isa koa iꞌopoga epalopiania, ke ega isapu akaikiꞌa epeniia auga aisa.
10 Deo kapa maꞌoai epagamaꞌi, ke faugai kapa maꞌoai kegama auga iꞌa maꞌoai Isa maagai au akaikiꞌa famia eoma. Ega puo Iesu epakiekie. Egaꞌina kiekiegai, Deo iꞌa kaniaꞌa feagamauga auga eifania koa iꞌopoga mo ekapaisa, Iesu papiau kaniaꞌi Isagamauga Lopiaga epamia. Deo iꞌa fauꞌaisai ega ekapa oma Iesu epakiekie auga Deo eegai ekai felo alogaina. 11 Gome Iesu papiau Deo maagai aloꞌi epalolofania auꞌi, ke Deo maagai kaisau aloꞌi lolofaga emia auꞌi, Amaꞌi Deo fou famili agaꞌomogai kemai. Ega kainai Iesu aemeagai egaꞌina papiauꞌi eifaniꞌi aaga akina eomaꞌi. 12 Iesu egaꞌina papiauꞌi aaga akina eomaꞌi auga fouga, Deo ega iifa pukagai iina kepapua oma ekae:
“Amau, lau Oi Akamu aau akiu maaꞌiai alaifafoua.
Ke Oi keau afagainio auꞌi eꞌi laꞌafou alogai au afagai iifiꞌiai alaau afagainio.” Sam 22:22
13 Ke Deo ega iifa pukagai Iesu Deo epainia kapa eoma auga fouga iina kepapua oma:
“Lau eꞌu pakoꞌa akaikiꞌa Oi eemuai alaoge,”
eoma. Aisaea 8:17
Ke Iesu eifa pugu einaka,
“Amoisa, lau Deo ega papiau epeniiau auꞌi fou inamoꞌe,”
eoma. Aisaea 8:18
Deo ega iifa pukagai Iesu iina eifa oma kainai, iꞌa maꞌoai Iesu aaga akina.
14-15 Iꞌa papiau aumauni ifai agago puo agamae. Agamae aisama, apakoꞌania kapa maꞌoai egae akefua aoma. Ega kainai aagoai aague alogai papiau mae kemaniꞌiai alogaina. Satani papiau mae kemaniꞌiaina auga isapuga epapinauga papiau epamaeꞌi. Ega koa papiau maꞌoai kalaꞌafi koa iꞌopoga, Satani papagai keagu. Kai Iesu Satani ega pinauga gaauoka, ke Satani papagai kekalaꞌafi auꞌi gapapealaiꞌi eoma. Ega puo isa ifo isafa papiau aumauni emia ifai egago, ke papiau fauꞌiai emae ke emaunimue. Ega kainai mae papiau eꞌi agu ageꞌima afaekaina auga Iesu iꞌa epakinaiꞌa. 16 Isa ega koa ekapaisa auga, iifa gome agelo fepalagainiꞌi kainai aekapaisa. Kai isa Abraham ufuga apa koꞌaꞌi isa kepakoꞌania auꞌi fepalagainiꞌi eoma. 17 Ega kainai Iesu papiau aumauni emia aagoai eagu alogai, papiau aumauni kapaꞌina kekapa auga iꞌopoga mo ekapaiꞌi. Ega koa Deo faugai alo koꞌagai sakedote lopia faꞌa pinaugaga fekapa, papiau laomai apalaꞌi kekapaꞌi auꞌi guaꞌi feania, eꞌi laomai apalaꞌi feaꞌiniꞌi ke Deo fou epoꞌiai gagao femia eoma. 18 Ke tiapolo Iesu eꞌopoisa aisama ekiekie alogaina. Ega puo papiau kapaꞌi tiapolo eꞌopoꞌi auꞌi, Iesu isa agepalagainiꞌi agekaina.