1 Yudaba ibo sino Gode wengo mo tekein keim blim blib dimo Gode wengo omdibiha bianiba kukub misiamo nabinibbuo ibo makob kaanabibi ulab binibbiobe. 2 Ina binibbuo dimo ibo dabalimo kukub misiam osa eka hob misiami komoke kukub osa wafu binibbiobe. Memalo hob misiami komok ele nakaia unangai Gode wengo omdibihabibi kima biebe. 3 Sino nibsa alukum makob naka eli nabib inanoba Gode wengo omdibiha binobbiobe. Yuda nisa sino nini bobol tem funin misiamo wafu bianoba kukub misiamo nabinobbiobe. Nibo inanoba ninib kukub misiamo mo deibueim blim amitie nabinob mole Gode yang kenea makob naka maki kukub misiamo nabiba enino omyamabe inanea nibsa enino omyamabebe.

4-5 Sino nibo e wengo omdibiha bianoba makob kaanabibi ulab binobbiobe. Sino nibo hengmino temo biob dimo Gode kla gobenea kla dohalilanea nibo hengmino temo biobo dotlanebiobe. Nibo inanoba makob kaain kenobbu otane Gode inanea Klaiste dabanea daakenea kaanea nibo hengmino temo biobo dotlanea Gode imin dofaana bianea nibsa dohaanea Klaiste tenanoba hananobbiobe. Gode ele bobol tem funin ota wafu bianea nibo daabenea hengmino temo biobo dotlanebiobe. 6 Gode Klaiste dofaanea imin hananea baabanea Kobo utneba abilim ut bianeba inamin namino alukum kimanale ge baabanebu olo nibsa baabenebiobe. Nibo Klaiste tena biob kesoa olo makob nibte Klaiste tenanoba abilim ut bianoba inamin namino kima biobobe. 7 Gode fatnaneta nibo inabenebue? E Yesus Klaiste dabanea daakenea nibo hengmino temo biobo dotlanebio kesoa nakaia unangai memalo blib isa eka sinanoa walo unomabib isa e kukub olo wateniba funaniba Gode kla gobe bianeta daabenebiobo ge funomabiobe. 8 Nibo Yesus Klaiste bainobo genobbuo Gode e bobol ayamo nibo omyenea daabenea nibo hengmino temo biobo dotlanebiobe. Nibo hengmino temo biobo nib malo mo deibueim blimobe. Gode ele bobol tem funanea nibo bobol ayamo omyenea hengmino temo biobo dotlanebiobe. 9 Gode nib kukub ayamo nabobo mo yateneta nibo hengmino temo biobo dotlaim blim kesoa nibo naka maki mo baabenobta Ni kukub ayam olo nabob ota Gode ni hengmino temo biobo dotlanebiobo ge baabenomobe! Gode emaye ele bobol tem funanea bobol tem ayamo nibo omyenea dotlanebiobe. 10 Sinanggwano Gode nib bobolo funanea baanea Sinanomo nakaia unanga eli Yesus Klaiste bainobo geniba i Klaist ete naniba kukub ayamo ne baabenia Ibo kukub olo naine genimio namomabiobo ge funanea dlakanebiobe.

11 Ibo Yudababe. Yudai alukum aalo waketoubib kesoa i ibo oye bianiba Naka eli i aalo mo waketoubibbabo ge oyebib ibo sino ibo Yesuse bainobo geim blim bianiba ib kukubo nabinibbuo funaine! 12 Ibo Yesus Klaiste mo bainobo geim blim binibbio dimo ibo Gode meletanbabe. Ibo Gode meletani makaa binibbiobe. Gode moton wengo Yuda nakaia unangai baabenea Ne inamin namino doyamabibo ge baabenebio wengo ibo mo wentemin blimobe. Ibo dabalim olo kukub ota wafu bianiba ibo Gode mo tekein keim blim binibbiobe. Ibo mo funanibta Sinanomo Gode ni daabenea ni hengmino temo biobo dotlanamabebo ge funin blimobe. Ibo inaibbio kesoa ibo makob bib mak naka unangobe. 13 Ina otane Yesus Klaiste kaanea e ilemo singanea ib hengmino walubenebua ibo e bainobo gabib kesoa memalo ibo Gode meletanobe. Memalo ibtem Yuda nitem Klaist etem nanoba alukum bibo olokiemo tem ota mibiobobe. 14 Sino Yuda isa Yudaba isa makaa bianiba makob daam ge afetain keibbu otane Yesuse kaanea nib hengmino walubenea daam ele belanea ibsa nisa dleb tetenanea dolminea bobol tem fiab omyenea nib bobol temo makob anobbiobe. 15 Yesuse inanea kaanea Mosese hekmel wengo ni kimabuo blimanobiobe. E inanea Yuda nisa Yudaba ibsa nibo alukum dolminea afin anobbiobe. 16 E atdimo kaanebuo Yuda isa Yudaba isa wasi kukubo watanea dleb tetenanea dolminea dleb tenea God esu ele danebiobe. 17 Sino Yuda ni God esu meb bioba eka Yudaba ibole Gode skeim binibbiobe. Otane Yesuse tenea Yudai God esu meb blib isa eka Yudaba ibo skeim blib ibsa Gode dowan wengo ibo omyebiobe. E inanebuo ibo God esa eka Yuda nakaia unanga isa makaa blibo hanea dleb tetenanea afin aibbiobe. 18 Yuda nisa eka Yudaba ibsa nibo hengmino temo biobo Yesus Klaiste dotlanea Gode e Hobe nibo dobyebio kesoa nibo monoba nib Aye Gode motemnoba etem nibtem nabianoba weng obuobe.

19 Yesuse inanea ibo hanea dleb tetenanebio kesoa ibo sino Yudai makaa otane memalo ibo mit mak nakababe. Ibo naka makobobe. Memalo ib sinwalo Gode meme kesoa ibo alukum Gode meletanobe. 20 Gode meletan nibo makob Gode amo genebio inaminobe. Yesuse okok dlasanin naka nisa eka e weng omkeimalin naka isa ni makob ilam amuno ulabobe. Eka Yesus Klaist ele makob isak amunobe. Eka ibole makob taliba tlakala o ulabobe. 21 Klaiste isak amunobe. E nekek genea amo alukum omakibila bie kesoa o mo dobo blelanomobabe. E nekek genea omakibila bie kesoa Gode am olo tem tam biebe. 22 Yesus Klaiste bainobo galin naka unang ibsa eka bainobo galin naka mak unang mak isa ibo makob am olo tlakala taliba amana o ulab kesoa ibo makob nakai amo genabib inaminobe. Gode Hobe am olo tem tam biebe.