19
Ngawe-ngigac gocnedi hegilecnagucaigaing
Mrk 10:1-12; Luk 16:18
1 Yesu ye yowa yogo miyackeme motome Galili prowins hegilelu Yudeya himongka Yodan misa nebocina hikewec. 2 Hikeme ngic-ngigac habu sugucnebenangti ye balaibebong yedi ngic-ngigac hucnginengkolec iwa bamadicebawec.
3 Aime Farisaio yenge yela kwesilu kwesackeningte yanguc uwacnoibong, “Ngic monic ye ngigacine wiyac kpisicnele hegilenale, yogolec yefe fagac, me?”* Yuda ngic-ngigac gocne yenge ngagebong ngigac ye selo-boic aibaba aiwec, yogo sugu ye nalic ngigac hegiledaicte. Nga Yuda ngic-ngigac gocne yenge ngagebong ngigac ye wiyac kpisicnele aiwec, yogo nalic ngigac hegiledaicte. Ilec ailu Farisaio yenge uuwa yogo lokwesacka loibong.
4 Inguc mibong Yesudi bafaliyelu yanguc edocebawec, “Mime Fike-fike fileinedi molickelu mime
‘Ngic nga ngigac fikeiboc, inguc bafuwacepawec.’ (Fike 1:27; 5:2)
Ngenge yogo wafe-ngagec aicaigaing. 5 Ye bafuwacepalu yanguc miwec,
‘Ilec ailu ngic ye nenggac-mamackecine hegilecepalu ngigacineholec wetackelu yeholec soc moniyang aidabiyecte.’ Efs 5:31 (Fike 2:24)
6 Inguc aidabiyectewa, yeke hatacmac yaeckang mi aigaic, yeke soc moniyang aigaic. Ilec ailu Wapongti wetacepawec, yogo ngicti mi welockedaic.”
7 Inguc mime yanguc miibong, “Aime wenucte Mosesdi ung-yowa yanguc nolewec? Ngic monicti ngigac hegilenogale hibi kwelengkelu ngigac lacnome ngigac ye ngic yogo hegilelu hikedaic.” Yef 24:1-4; Mat 5:31
8 Inguc mibong Yesudi yanguc miwec, “Ngenge ngic kwelengineng fongkeicne. Ilec ailu Mosesdi ngigacfocngineng hegilecebaningte aka mi lowec. Aime molickelu ofeicne iwa yefe ingucne monic mi fawec. 9 Na yanguc edocngebabe, ngic monicti ngigacine selo-boic aibaba mi aiyemewa ye moc hegilelu ngigac monic badaicte, ngic yogo ye selo-boic aibaba aidaicte.” Mat 5:32; 1Kor 7:10-11
10 Inguc mime ngagelu mic-tengtengfocine yengi yanguc miibong, “Ilec ailu ngawe-ngigac mi ailu adu-madechac domalu momoc mi ganoga, yogodibac madickedaicte.”
11 Inguc mibong Yesudi yanguc edocebawec, “Ngengele yowa ngic gocne mi balaibedaingte. Wapongti ngic inguc baficebame yengi sugu ngawe-ngigac mi aidaingte. 12 Ngic gocne yenge nenggac kwelewacni hufing fikeibong. Nga gocne yenge ngicti aibaba aiyelebong hufing aiibong. Nga ngic gocne yenge honocmengte ngani-damongte ailu hufing ingucne gacaigaing. Ngic monic ye yowa yogo ngagelu banogale nalic ye yowa yogo badaic.”
Adu-madec mimi-madic milu edocebawec
Mrk 10:13-16; Luk 18:15-17
13 Aime ngic-ngigac yenge adu-madecfocngineng kpisicne Yesula bacebalu hikebong, yedi moledi adu-madec feinginang lolu milockenale ngageibong. Inguc aibong mic-tengtengfocine yengi ngelengkelu edocebaibong.
14 Aime Yesudi yanguc miwec, “Adu-madec kpisicne yenge nala nalic kwesining. Ngenge aka mi holeyelening. Honocmengte ngani-damong yogo adu-madec kpisicne yangucne yengele.” Mat 18:2-3 15 Inguc milu moleine feinginang lolu mimi-madic milu edocebame motome ye mac-himong yogo hegilelu monicka hikewec.
Ngic moneng-mafatowaineholec
Mrk 10:17-31; Luk 18:18-30
16 Aime ngic monicti Yesula kwesilu miwec, “Wewedu, na aibaba madicne wenuc ailu gaga-sanang badacte?”
17 Inguc mime yedi yanguc miwec, “Ga omale aibaba madicnele uwanelegic? Wapong moniyangti sugu madicne gagac. Aime ga gaga-sanangka fenogale milu Wapongte ung-yowa balaibedamec.” Dep 18:5; Luk 10:28
18 Inguc mime yanguc miwec, “Ung-yowa weni yogo balaibenogale migic?”
Inguc mime Yesudi yanguc miwec,
“ ‘Ga ngic-ngigac mi wehomacebadamec. Ailu selo-boic aibaba mi aidamec. Nga hise mi badamec. Ailu micka lolo mi aidamec. 19 Ga nenggac-mamackecgone alang bayetedamec.’ (Wah 20:12-16; Yef 5:16-20)
‘Ailu gageicne aigelecaigac, silicine ingucnehac ngic-ngigac gale emewa gagaing, yengele kwelegonedi ago aiyelelu angac ngageyelelu gadamec.’ ” (Dep 19:18)
20 Inguc mime soc-gboli madec yedi miwec, “Na yogo sasawa balaibecaigabac. Aime oma wiyacka kpungkegabac?”
21 Mime Yesudi yanguc edowec, “Ga ngic dondonnebenang ganogale ngagegicka ingucne, yanguc ainong, ga hikelu wiyacgone sasawa saleyackelu moneng balu ngic-ngigac waweweine gagaing, yogo yeledamec. Inguc aiyengka wiyac madicne honocmengka fikegeledaicte. Aime welelu na balaibecnudamec.”
22 Inguc mime soc-gboli madec yogo ye moneng nga woc-wiyacine bocyac facnowecte, yowa yogo ngagelu kweleine umaleme hikewec.
Honocmengte ngani-damong nga himongte moneng-mafa
23 Hikeme Yesudi mic-tengtengfocine yanguc edocebawec, “Foinac, monic moneng nga woc-wiyacineholec ye honocmengte ngani-damong kwelina fenogale aidaicte, yogo boleine sugucnehac, yogo noine edocngebagabac. 24 Ailu hatacmac edocngebabe, kameldi bungic yefina fedaicte, yogo boleine sugucne. Nga moneng nga woc-wiyackolec yedi Wapongte ngani-damongka fenogale aidaicte, yogodibac boletowaine sugucnehac.”
25 Inguc mime mic-tengteng yenge yowa yogo ngagelu kwatackelu medecebame yanguc miibong, “Inguc aime madi nalic wasecne aidaicte?”
26 Inguc mibong Yesudi dongeine yengela hilalu yanguc miwec, “Ngic-ngigac yengileng aibabanginengte ailu yogowa aibibiyelu hegiledaingte. Nga Wapongtibac wiyac sasawa yogo nalic aidaicte.” Yop 42:2
27 Inguc mime Pitadi yanguc miwec, “Ngagegic, nonge woc-wiyacnonggeng sasawa hegilelu ga balaibecgulu gagabeleng. Ilec nonge oma wiyac badabelengte?”
28 Inguc mime Yesudi yanguc edocebawec, “Foinac, gacgu wiyac sasawa gbolicne fikedaicte, dameng iwa Ngicte Madec ye honocmengte tapili nga hibi-angocineholecti ngictaule ngiye-ngiyewa ngiyedaicte. Aime ngic balaibecnucaigaing, ngenge inguchac ngictaule ngiye-ngiye 12 iwa ngiyelu Israel yengele ngambofocngineng 12 fagaing, yengele aibabangineng wosaelu mimoctodaingte, yogo noine edocngebagabac. Mat 25:31; Luk 22:30; Miye 3:21 29 Aime ngic-ngigac nale wacte ailu macfocngineng me ngic hae-gbafocngineng me sengfocngineng me nenggac-mamacfocngineng me adu-madecfocngineng me himongngineng hegileibong. Wiyac yogolec ameine ngenge sasawadi 100 hatacmac badaingte. Ailu Sugucnedi gaga-sanang yeledaicte. 30 Ngic molic-molic gacaigaing, yengelacni homacnedi lobeine aidaingte. Nga lobeine gacaigaing, yengelacni homacnedi molic-molic aidaingte.” Mat 20:16; Luk 13:30
*19:3: Yuda ngic-ngigac gocne yenge ngagebong ngigac ye selo-boic aibaba aiwec, yogo sugu ye nalic ngigac hegiledaicte. Nga Yuda ngic-ngigac gocne yenge ngagebong ngigac ye wiyac kpisicnele aiwec, yogo nalic ngigac hegiledaicte. Ilec ailu Farisaio yenge uuwa yogo lokwesacka loibong.
19:26: Yop 42:2
19:28: Mat 25:31; Luk 22:30; Miye 3:21