1 Bidzujṉtireni stelaad ro' nisga, lo yuj xten Gadara. 2 Si'ctis ni birii Jesús neṉ canuu, biädgajc te niguii lojni ni birii neṉ rebiliää cadro rga'tz beṉgut. Yu' beṉdxab neṉ lastoo niguiiga. 3 Rbäjzni neṉ rebiliääga luxh rut rajcdi rucuaduuni, nicla con cadeṉguiib. 4 Xhidajl huält agacbacuaduureni ni', ṉaa niguiiga con cadeṉguiib, luxh litis batiuugni recadeṉguiibga, rut rajcdi rusiacdxini. 5 Si'ctis canzajni, dxej, yääl. Rbedxa'ni neṉ redajn, neṉ rebiliää, luxh cagutiuugni tiejxhni con reguij. 6 Che bahuiini loj Jesús zijtru, baxuṉni huichaglojni Jesús, bazuxhijbni lojni. 7 Dxejcti rbedxaduxhni, räjpni:

―¿Xhicuent siäädlu loä, Jesús, Xi'n Dios ni yu' jiaro? Rniabä lojlu nez loj Dios na'c gusacsílu narä.

8 Sa'csi agac cayäjb Jesús lojni:

―Luj, beṉdxab, birii neṉ lastoo niguiiga.

9 Dxejcti gunabdiidx Jesús räjpni:

―¿Chu laalu?

Dxejc räjpni:

―Narä laä Legión, nani säloj xhidalro, sa'csi xhidajl najcnu.

10 Sanuutis canabni lo Jesús na'c guxhaḻni rebeṉdxabga ste'ca guejdx. 11 Ro'c tre' xhidalduxh cuch cuä' dane'ga, cayajwreni. 12 Dxejc gunab rebeṉdxabga loj Jesús, räjpreni:

―Baxhaḻ nuure loj recuchre te jiu'nu neṉ lastooreni.

13 Dxejcti basaan Jesúsreni. Biriiti rebeṉdxabga neṉ niguiiga, dxejc biu'reni neṉ lastoo recuchga. Yu' si'cti tiop miḻ cuch ro'c. Baxuṉ recuchga, dxejc biroḻreni ro' guilaj, bitejbreni neṉ nis, gujttireni neṉ nisga.

14 Renani cayajp recuchga baxuṉreni, huiyeiireni diidxga neṉ guejdx, näjza loniaa. Dxejc biääd bejṉ biädhuii nani gujc ro'c. 15 Che bidzujṉreni cadro suga' Jesús, bahuiireni loj niguii nani guyu' rebeṉdxabga neṉ lastooni. Sobga'ni ro'c, najcwni xhajbni luxh nasa'c yejcni. Niguiire najc nani guyu' beṉdxab ni laa Legión neṉ lastooni. Bidxejbti rebejṉ nani bahuii lojni. 16 Dxejcru rebejṉ ni bahuii xhi gujc ro', huiyeiireni diidx xho guzajc niguiire nani guyu' beṉdxab neṉni galoo, näjza nani guzajc recuch. 17 Dxejc gusloj canabreni loj Jesús jiunejzni.

18 Che biu' Jesús neṉ canuu, niguii nani guyu' beṉdxab neṉ lastooni gunabni loj Jesús, räjpni:

―Huinä narä.

19 Per di Jesús nusaan nijni. Räjp Jesús lojni:

―Huij rolijzlu, lo resa'lu. Huiyeii diidx lojreni xho bennäj Dadlu, näjza xho balaslajzni luj.

20 Sä'ti niguiiga, gusloj cayujyni diidx neṉ reguejdx xten Decápolis xho bennäj Jesúsni. Guiraa rebejṉ bidxeloj.

21 Che bidzuṉsac Jesús stelaad ro' nisga neṉ canuu, bidzujṉ xhidalduxh bejṉ cadro suga'ni. Bia'nti Jesús ro' nisga. 22 Dxejcru biääd te niguii nani laa Jairo, ni rnibee neṉ xquidobäz rexpeṉ Israel. Che bahuiini loj Jesús, bazuxhijbni lojni. 23 Canabpacni lojni, räjpni:

―Xindxapä'ä acayejt. Gudaa, guzujlu ṉaalu yejcni, te jiajcni, te guibajṉni.

24 Sanäti Jesús bejṉga. Xhidajl bejṉ sanajlni, luxh cagutäärenini. 25 Loj rebeṉxhidaalga yu' te gunaa ni agujc tzubitio'p ijz racxhuuni yäḻguidxbäii. 26 Agudedduxhni trabajw, abahuii xhidajl doctoorni. Xlia'si abanijtni guiraa nani rajpni, luxh xhet racnäjdini, alga rxuuruni. 27 Sa'csi biejn diajgni xhini'c canii rebejṉ xcuent Jesús, gubig gunaaga nez dejtz Jesús, guideb neṉ rebejṉ, bahuaḻni xhajb Jesús. 28 Cayujnni xhigab, naani: “Palga narä faḻä xhajbtisni, siacä.” 29 Lagajc dxejc guläjz caxe' xtiejnni, gucbeeza tiejxhni abirii xcäḻracxhuuni. 30 Gucbegajc Jesús yu' chu abasiajcni. Gubiregajcni neṉ rebeṉxhidaalga, räjpni:

―¿Chuni'c bahuaḻ xhabä?

31 Dxejcru räjp rexpejṉpacni lojni:

―Rhuiilu beṉxhidaal cagutäälu, luxh naalu: “¿Chuni'c bahuaḻ xhabä?”

32 Sas cahuii Jesús nez ree, nez rec, te fiini loj nani bahuaḻni. 33 Dxejc bidxejb gunaare, racsejsni, sa'csi gucbeeni xhini'c gujcni. Dxejc biäädni, bazuxhijbni loj Jesús, räbliini loj Jesús guira'ti ni bejnni. 34 Dxejc räjp Jesús lojni:

―Xindxa'pä, abiajclu sa'csi huililajzlu. Gulecdxi lajzlu, huij rolijzlu, abiajc xcäḻracxhuulu.

35 Canisijc Jesús si'c che bidzujṉ renani birii rolijz dade' ni rnibee neṉ xquidobäz rexpejṉ Israel. Räjpreni:

―Agujt xindxape'lu. ¿Xhicuent rusieedrulu Dad mastr?

36 Dxejc che biejn diajg Jesús nani caniireni, räjpni lo dade'ga:

―Na'c guidxejblu. Bililajztis.

37 Luxh dini nusaanru nij chu ninäni, Pedrtis näj Jacoob näjza Juan bejtzni. 38 Che bidzujṉni rolijz dade'ga, bahuii Jesús biejy ni cayujn rebejṉ ni rbedxa' roon. 39 Biu'tini räjpni:

―¿Xhicuent rujntu si'c? Gajd dxape're guet. Nagayejssini.

40 Alga baxhiznäjrenini. Dxejc gunibee Jesús birii guiraa rebejṉga. Dxejcti huinäni xcuzajn dxape'ga con renani sanäni. Biu'reni cadro naga' dxape're. 41 Gunaazni ṉaa dxape'ga, dxejc räjpni:

―Talita cumi ―nani säloj con xtiidxnu: Dxape', lojlu rniä, huistie.

42 Dxejcti huistiegajc dxape'. Tzubitio'p ijz yu' dxape'ga. Bidxeloduxh rebejṉ ni bahuii guläs Jesús dxape'ga. 43 Dxejc balijdx Jesús reni te rut lojdi chaye'tzreni xhini'c gujc. Gunibegajcni gudeedreni xhi gauu dxape'ga.