3
Ndaw masa manjar mebərey na, daha daw?
1 Da anda keɗe na, *Jəwif hay a fənmata ndəhay mekele fa mey ŋga Gazlavay na, ta me? *Mesley mandawal na, ara cek ma jəney ndaw daw? 2 Ahaw, Jəwif hay a fənmata ndəhay mekele na, ta cek hay ga. Teeseɗ na, Gazlavay a vəldatara mey aŋga na, ŋgada Jəwif hay a. 3.2 9.4; Ps 147.19-20 3 Fara fara, ndəhay ga da wuzlah ata fa təɓmara mey ŋga Gazlavay daa ba. Kaa Gazlavay na, a mbəɗda mewulkey aŋga, a ka cek anda aa ma ləvey saba maja ata daw? 3.3-4 9.6; 11.29; Mesl 23.19; 2Tm 2.13 4 Kay, fa da mbəɗda daa ba. Kwa ndəhay tabiya fa mbərzlam na, Gazlavay a da ka cek anda aŋga ma ləvey cəŋga. Ara anda mawuzlalakaya daa ɗerewel ŋga Gazlavay ma ləvey:
«Kah, Bay Gazlavay, mey akah tabiya
ara mey fara fara ta cəveɗ e.
Da ndaw aa dəɗfaka mey na,
ka gwa ŋga wuzda ara mebərey akah ba.» 3.4 Ps 51.6
5 Da kwa ndəhay siya a da ləvam mebərey masa aləkwa ma kakwa fa wuzdərwa maaya ŋga Gazlavay na, ya da ləvkwa kwara? Yaa guzley kaa na, anda ndəhay magədaŋ maa guzlam may. Kaa da Gazlavay a sərdandakwar banay maja mebərey aləkwa na, ya gwakwa ŋga ləvey Gazlavay a na, fa key cek ta cəveɗ e daa saba daw? 3.5 9.14 6 Kay, kəne ba! Gazlavay na, ara ndaw ma key cek ta cəveɗ e. Da Gazlavay fa key cek ta cəveɗ e daa ba na, kaa a da katar sariya a ndəhay ta cəveɗ e na, kwara?
7 Da kwa ndaw a ləvey, mekey cek ta cəveɗ e ba na, fa wuzdatara ŋgada ndəhay Gazlavay ara ndaw maa guzley mey fara fara, ŋga wuzdərwa gədaŋ aŋga. Da kəne na, Gazlavay a daa zəɗdata ndəhay maja mebərey ata na, fa me dəɓa me? 8 Ndəhay siya fa ləvam: «Kakwa cek hay maaya ba amba ndəhay a sərmara Gazlavay na, ara ndaw maaya kalah.» Ahaw, a ləvam anda keɗe ba, kwara? Kwa ndəhay siya na, faa guzlam maaya ba da ray aɗaw, a ləvam ya faa guzley anda keɗe may. Sariya a təɗdata ndəhay a la, təɗe fa mewulkey ata maaya ba ha ŋgene. 3.8 6.1
Ndaw ma key cek anda Gazlavay ma wuɗey na, daha daw?
9 Kaa wure keɗe na, kwara? Aləkwa *Jəwif hay na, ya fənmatakwa ndəhay siya hay daw? Kay, ya fənmatakwa ba səlak! Ya ta wuzdakwara cay, ndəhay Jəwif hay ta ndəhay masa Jəwif hay ba cəpa na, mebərey fa fəntar ray. 3.9 1.18–2.24; 3.23 10 Ara anda mawuzlalakaya daa ɗerewel ŋga Gazlavay ma ləvey:
«Kwa ndaw masa maaya fa mey ŋga Gazlavay na, daa ba,
kwa ndaw pal daa ba səlak. 3.10-12 Ps 14.1-3
11 Kwa ndaw masa ta leŋgesl ma səra cek na, daa ba,
kwa ndaw pal ma wuɗey ŋga səpa
cəveɗ ŋga Gazlavay na, daa ba.
12 Ata cəpa ta mbəkdamara cəveɗ ŋga Gazlavay sem.
Ata cəpa daa slam a ta mbəɗmar dəɓa sem a Gazlavay.
Kwa ndaw ma key cek maaya na, daa ba.
Kwa ndaw pal daa ba səlak.
13 Mey ma bawa da mey ata na,
maaya ba anda cəvay mawurkaya ma zey.
Neneh ata na, fa təknata ndəhay kalah.
Ndəvez ŋga mey ata na,
a kəɗey ndaw vagay anda mewer ŋga zezekw. 3.13 Ps 5.10; 140.4
14 Mey ma bawa da mey ata na,
ara mey meeɗəwek e, ma nəsa ndaw. 3.14 Ps 10.7
15 Salay ata na, fa həldata ŋga wusey vaw fiyaw fiyaw
ŋga kəɗey ndəhay vagay. 3.15-17 Iz 59.7-8
16 Kwa daa wura daa wura daa mepəkey ata na,
fa nəsam cek hay, fa sərdamata banay ta ndəhay.
17 Asaya, a sərmara ma handawa zazay
a wuzlah ndəhay ba.
18 Ata na, a zluram ta Gazlavay ba səlak.» 3.18 Ps 36.2
19 Ahaw, aləkwa fa sərkwa, cek hay tabiya masa *kwakwas ŋga Mawiz maa sərkada na, ara ŋgada ndəhay masa Gazlavay ma vəldatara kwakwas a. Anda keɗe, kwa ndaw ma gwa ŋga wura mey amba a ɗiya ray aŋga na, daa ba, ndəhay cəpa ta mebərey fa mey ŋga Gazlavay. 20 Maja ŋgene, ndaw masa maaya fa mey ŋga Gazlavay maja aŋga ma səpa kwakwas ŋga Mawiz tabiya na, daa ba. Kwakwas a, a wuzwa na, mebərey ŋga ndəhay gway. 3.20 Jəw 4.17; Ps 130.3; 143.2; Rm 4.15; Gal 2.16; 3.22
Ndəhay a da təram maaya fa mey ŋga Gazlavay na, kwara?
21 Wure keɗe, Gazlavay ta wuztar cəveɗ la a ndəhay amba a pata ŋga ndəhay maaya fa mey aŋga. Cəveɗ e na, kwa mey ŋga *kwakwas ŋga Mawiz da hwaɗ a daa ba səlak. Ama kwakwas a, leŋ ndəhay ma təla mey ŋga Gazlavay taa guzlam la da ray cəveɗ e dəga zleezle, a ləvam Gazlavay a wuzwa cəveɗ la mawiya. 3.21-22 1.2, 17 22 Gazlavay ma pata ŋga ndəhay maaya fa mey aŋga na, maja ata ma pamara Yesu *Kəriste ŋga ndaw ata fara fara. Gazlavay a pey ŋga ndəhay maaya fa mey aŋga na, ndəhay tabiya masa ma təɓmara mey ŋga Yesu, maja Gazlavay a weley ndəhay ta weley ba. 3.22 2.11; 3.9; 10.12; 11.32 23 Ndəhay tabiya ta kam mebərey la. Anda keɗe, ata dəreŋ ta maaya ŋga Gazlavay. 3.23 5.2, 12; 8.18-20; MC 3.19 24 Ama Gazlavay ta sərfatar dey-ceceh la, a tərdata ŋga ndəhay maaya fa mey aŋga ta fa Yesu Kəriste, ndaw masa ma ləhdata daa mebərey. A ka kəne na, ara ŋga maaya, ba na, ta cek ba. 3.24 5.17; Ef 2.8; Tit 3.7 25 Ara Yesu a masa Gazlavay ma vəlda ŋga məcey amba a mbəkdatara mebərey ŋga ndəhay ta fa mambaz aŋga. Ara mambaz a ma mbəɗwa fa hwadam mazlaŋgalakaya ŋgada ndəhay ma pamara ŋga ndaw ata fara fara. Gazlavay a ka anda keɗe na, amba a wuzdatara a ndəhay, aŋga na, ndaw ma ka cek ta cəveɗ e. Ahaw, daa masa aŋga ma sərdata banay ta ndəhay maja mebərey ata masa zleezle daa ba heyey na, Gazlavay ta ka cek ta cəveɗ e la. 3.25 mambaz: Mt 26.28; Ef 2.13; Kwa 1.20; Heb 9.12-14; 1Jŋ 1.7; CWJ 1.5; 5.9; zazay: 5.1; 2Kwr 5.18-21; Ef 2.14-16; Kwa 1.20; ndaw ma ka cek ta cəveɗ e: 1.17; 3.3-4 26 Daa ŋgene, Gazlavay ta ɓəsa mebərey a la. Gazlavay a ka cek ta cəveɗ e wure keɗe may, maja ta fa meməcey ŋga Yesu na, a gwa ŋga key sariya ta cəveɗ e. Asaya, a gwa ŋga pata ndəhay masa ma təɓmara mey ŋga Yesu ŋga ndəhay maaya fa mey aŋga.
27 Da anda keɗe na, aləkwa ta cəveɗ ŋga zlepey maja aləkwa ma kadakwa sləra maaya ta kwakwas ŋga Mawiz daw? Kay! aləkwa ta cəveɗ daa ba. Aləkwa ta cəveɗ daa ba na, maja me? Maja cek mahura fa mey ŋga Gazlavay na, ara mesəpey kwakwas ba, ama ara metəɓey-mey ŋga Yesu. 3.27 3.1, 21, 31; 8.2 28 Ahaw, ya sərmara fara fara Gazlavay a nəka ndaw aŋga maaya fa mey aŋga na, maja ndaw a ma təɓa mey ŋga Yesu, ba na, maja aŋga ma səpa kwakwas ŋga Mawiz tabiya ba. 3.28 Gal 2.16 29 Ka wulkam Gazlavay na, ara Gazlavay ŋga *Jəwif hay daada daw? Ndəhay masa Jəwif hay ba na, ara Gazlavay ata may, ba diya? Ahaw, fara fara aŋga na, ara Gazlavay ŋga ndəhay masa Jəwif hay ba may, 3.29-30 3.22; 4.11-12 30 maja Gazlavay na, aŋga pal. Da Jəwif hay a pamara Yesu ŋga ndaw ata fara fara na, Gazlavay a tərdata ŋga ndəhay maaya la fa mey aŋga. Yaw, da ndəhay daa səkway mekele a pamara Yesu ŋga ndaw ata fara fara na, Gazlavay a tərdata la ŋga ndəhay maaya fa mey aŋga may. 31 Anda keɗe, da ya pakwa Yesu ŋga ndaw aləkwa fara fara na, a wuɗey ŋga ləvey aləkwa fa tərdakwa kwakwas ŋga Mawiz ŋga cek ŋga tede daw? Kay, kəne ba! Sasəkar aləkwa fa kərzakwa kwakwas a maaya maaya ta har cew cew jak. 3.31 6.15; 8.2-4
3:2 3.2 9.4; Ps 147.19-20
3:3 3.3-4 9.6; 11.29; Mesl 23.19; 2Tm 2.13
3:4 3.4 Ps 51.6
3:5 3.5 9.14
3:8 3.8 6.1
3:9 3.9 1.18–2.24; 3.23
3:10 3.10-12 Ps 14.1-3
3:13 3.13 Ps 5.10; 140.4
3:14 3.14 Ps 10.7
3:15 3.15-17 Iz 59.7-8
3:18 3.18 Ps 36.2
3:20 3.20 Jəw 4.17; Ps 130.3; 143.2; Rm 4.15; Gal 2.16; 3.22
3:21 3.21-22 1.2, 17
3:22 3.22 2.11; 3.9; 10.12; 11.32
3:23 3.23 5.2, 12; 8.18-20; MC 3.19
3:24 3.24 5.17; Ef 2.8; Tit 3.7
3:25 3.25 mambaz: Mt 26.28; Ef 2.13; Kwa 1.20; Heb 9.12-14; 1Jŋ 1.7; CWJ 1.5; 5.9; zazay: 5.1; 2Kwr 5.18-21; Ef 2.14-16; Kwa 1.20; ndaw ma ka cek ta cəveɗ e: 1.17; 3.3-4
3:27 3.27 3.1, 21, 31; 8.2
3:28 3.28 Gal 2.16
3:29 3.29-30 3.22; 4.11-12
3:31 3.31 6.15; 8.2-4