Mejəwey-mey Mawiya Rawma hay 9

Mey da ray Israyel hay, ndəhay masa Gazlavay ma walata

1 Mey masa yah ma daa guzlda keɗe na, ara mey fara fara, ya mbərzley ba, maja yah na, ndaw ŋga *Kəriste. Asaya, *Mesəfney ŋga Gazlavay fa wa mewulkey aɗaw, mewulkey aɗaw a fa wuzda, mey masa yah ma kada keɗe na, ara mey fara fara. 2 Ya wuɗey ŋga ləvey na, mewulkey fa da kəɗya, mevel fa caya mandaw mandaw 3 da ray səkway aɗaw hay *Jəwif hay. Ala na, ŋga way ala pal. Da Gazlavay a səra na, ŋga nəsya, ŋga wunkandar ta Kəriste amba məlma aɗaw hay Jəwif a ɗiyam. 4 Ata daa səkway ŋga *Israyel hay. Gazlavay ta walata sem ŋga təram bəz aŋga hay, ta wuzdatara gədaŋ aŋga la, ta jəwam mey la ta ata, ta wuzdatara kwakwas aŋga la, ta wuztar cəveɗ la amba a dərmar daŋgay, ta wuzdatara cek maaya masa aa ma ləvey a da vəldatara heyey la. 5 Ata na, ndəhay daa səkway ŋga papaŋ ŋga papa aləkwa hay zleezle *. Yesu Kəriste may, daa masa aŋga ndaw-magədaŋ na, aŋga ndaw daa səkway a. Ama ta ŋgene he cəpa na, ta təɓmara mey aŋga daa ba. Kəriste he na, ara ndaw ma wata cek hay tabiya. Anja ndəhay ŋga həlmamara Gazlavay ŋga sərmataw. Amen.

6 Ya wuɗey ŋga ləvey mey masa Gazlavay maa guzlda na, ta key anda aa ma ləvey daa ba na, kəne ba. Mey a ta key la. Ama ya wuɗey ŋga ləvey, Israyel hay na, ara ndəhay ŋga Gazlavay cəpa ba. 7 *Abəraham ta yey bəza hay la. Ama bəza hay a cəpa na, ara bəz aŋga hay fara fara anda Gazlavay ma ləvey ba, maja Gazlavay taa guzlar la zleezle a Abəraham a, a ləvar: «Ara ta fa bəza hay ŋga bəz akah *Izak, sləmay akah ma da zəley.» 8 Anda meləvey, bəza hay masa Abəraham ma yatərwa na, ata tabiya bəza hay ŋga Gazlavay ba. Ama bəza hay ŋga Gazlavay fara fara na, ara bəza hay masa Abəraham ma yatərwa maja Gazlavay ma ləvar a da vəlar bəza hay ga heyey. 9 Mey masa Gazlavay ma ləvar a Abəraham a zleezle a da vəlar cek heyey na, mey a, a ləvey: «Haa kasl səfeɗ anda keɗe na, ya vəhwa la. Daa ŋgene, Sara ta yawa bəzey mezəle cay.»

10 Yaw, ara ŋgene daada ba. Rebeka may, ta yawa la, a yawa bəza hay cew. Ata ŋga papa ata pal. Papa ata ha na, ara dede aləkwa Izak zleezle. 11-12 Gazlavay a ləvar a Rebeka: «Bəzey mahura na, a da kar sləra ŋgada mecəhe.» Gazlavay maa guzlar anda keɗe na, daa masa bəza hay a, a sərmara ma key cek masa maaya ta maaya ba, ba araŋ, ara daa masa ata da hwaɗ mama ata ɗagay. Gazlavay ma ləvey anda keɗe na, ŋga wuzda aŋga na, fa key cek mandaw mandaw anda aa ma wuɗey. A weley ndaw masa aa ma wuɗey. A walata na, maja sləra masa ndaw a ma ka ba. 13 Anda mawuzlalakaya daa ɗerewel ŋga Gazlavay ma ləvey:

«Ya weley na, Jakwap. Ezayu na, ya wuɗa ba.»

14 Da kəne na, ya da ləvkwa kwara dəɓa wura? Gazlavay a na, ara ndaw ma key cek ta cəveɗ e ba dəɓa daw? Kay, kəne ba! 15 Gazlavay ta ləvar la a *Mawiz zleezle: «Da ya wuɗey ŋga key maaya a ndaw na, ya ka. Asaya, da ya wuɗey ŋga sərey dey-ceceh fa ndaw na, ya sərfar.» 16 Anda keɗe, da Gazlavay a kar maaya a ndaw na, ara maja ndaw a ma wuɗey ba, asaya, maja sləra ŋga ndaw a ma ka ba, ama ara maja Gazlavay ma sərfar dey-ceceh. 17 Daa ɗerewel ŋga Gazlavay na, Gazlavay a ləvar a *Farawaŋ, bay ŋga *Ejip: «Yah ma paka aa bay na, amba ya wuzdərwa gədaŋ aɗaw ta fa kah, asaya, amba ndəhay da bəla cəpa a zəldamaya sləmay.» 18 Anda keɗe, Gazlavay a gwa ŋga sərfar dey-ceceh a ndaw masa aa ma wuɗey, asaya, a gwa ŋga tərda ndaw ŋga macarakaya anda aa ma wuɗey.

Gazlavay a gwa ŋga key cek anda aa ma wuɗey

19 Da kwa ndaw a da ləvya: «Da anda keɗe na, Gazlavay a mbəɗtar ray a ndəhay na, fa me dəɓa me? Ndəhay a gwamara ŋga təkmara cek masa aa ma wuɗey ŋga ka daw?» 20 Kah ndaw-magədaŋ ŋga tede, kah na, wa may wa, amba ka kada yawa ta Gazlavay na! Maŋgayak maləmkaya na, a gwa ŋga ləvar a ndaw ma ləma: «Ka ləmya anda keɗe na, maja me daw?» Kay, a gwa ba! 21 Ndaw ma ləma maŋgayak a gwa ŋga key cek ta hahay ŋga meləmey anda aa ma wuɗey. A gwa ŋga wunka hahay a cew, pal a ləmda maŋgayak wal membey kalah, laŋgar may, a ləmda maŋgayak masa saw kəne.

22 Yaw, da Gazlavay a ka anda ndaw ma ləma maŋgayak na, mey akah da hwaɗ a me? Gazlavay a wuɗey ŋga wuzdərwa na, aŋga fa cey mevel da ray ndəhay, asaya, a wuɗey ŋga wuzdərwa gədaŋ aŋga a ndəhay. Ama ndəhay masa anja aŋga ma da cey mevel da ray ata ta masa aŋga ma da katar sariya ŋgaa zəɗdata na, fa ɓəsta kwa ara mey ba cəŋga. 23 Gazlavay fa ɓəsta na, amba a wuzdatara gədaŋ aŋga a ndəhay. A wuɗey ŋga pa gədaŋ aŋga ha a ray ndəhay masa aŋga ma sərfatar dey-ceceh. Ta ɗiyta la dəga zleezle amba a hətam gədaŋ aŋga ha. 24 Ndəhay a na, ara aləkwa. Gazlavay a zəlndakwar na, da wuzlah ndəhay *Jəwif hay daada ba, ama da wuzlah ndəhay daa səkway mekele hay may. 25 Ara anda Gazlavay maa guzley ta mey Awze, *ndaw ma təla mey aŋga, ma ləvey:

«Ndəhay masa ata ndəhay aɗaw hay zleezle ba na,

ya da zəlta ndəhay aɗaw hay.

Ndəhay masa ya wuɗta ba zleezle na,

ya da zəlta ndəhay aɗaw hay mawuɗtakaya kalah.

26 Daa slam masa yah ma ləvtar la a ndəhay:

“Akwar ndəhay aɗaw hay ba” na,

yah, Gazlavay masa ta dey,

ya da zəlta “bəz aɗaw hay”.»

27 *Izay, ndaw ma təla mey ŋga Gazlavay may, taa guzley la da ray *Israyel hay, a ləvey: «Anja kwa Israyel hay ata ga a sləfam ba anda mawurɓay da wayam na, Gazlavay a da ləhey daa mebərey na, ndəhay nekəɗey da wuzlah ata gway. 28 Fara fara Bay Gazlavay a da ka sləra aŋga cəpa fiyaw fiyaw da bəla anda aa ma ləvey.» 29 Yaw, anda Izay a maa guzley dəga zleezle saya, a ləvey:

«Da Bay Gazlavay ma wa slam da vaɗ tabiya

ta mbəkndakwar ndəhay nekəɗey

daa səkway aləkwa daa ba na,

anja ŋgene, ya ta paslakwa sem sle’

anda ndəhay daa berney ŋga Sadawm ta ŋga Gwamar.»

Mey da ray mepey Yesu ŋga ndaw fara fara

30 Kaa wure keɗe, ya da ləvkwa na, kwara? Ya ləvkwa ndəhay *Jəwif hay ba na, fa səpam cəveɗ amba Gazlavay a pata ŋga ndəhay maaya fa mey aŋga na, daa ba. Ama Gazlavay a pata ŋga ndəhay maaya fa mey aŋga na, maja ata ma pamara *Kəriste ŋga ndaw ata fara fara. 31 *Israyel hay na, fa səpam *kwakwas ŋga Mawiz amba Gazlavay a pata ŋga ndəhay maaya fa mey aŋga. Ama ta hətam amba a pata ŋga ndəhay maaya fa mey aŋga ha anda kwakwas a ma wuɗey na, daa ba. 32 Ta hətam daa ba maja me? Maja a wulkam Gazlavay a da pata ŋga ndəhay maaya fa mey aŋga na, ta fa cek masa ata ma kamara gway. Fa pamara Gazlavay ŋga ndaw ata fara fara na, daa ba. Anda keɗe, salay ata ta kəɗey sem fa aŋgwa mekey mecembeɗey a ndəhay, 33 anda mawuzlalakaya daa ɗerewel ŋga Gazlavay ma ləvey:

«Nəka, daa berney ŋga Siyaŋw na,

ya da pey aŋgwa mekey mecembeɗey a ndəhay,

ara aŋgwa ma təɗdata ndəhay.

Ama kwa waawa ma zlembey ta aŋgwa † ha na,

a zəley marava daa ba səlak.»

9:2 9.2-3 Mab 32.32

9:4 9.4 səkway ŋga Israyel hay: Mab 4.22; Aw 11.1; gədaŋ ŋga Gazlavay: Mab 16.10; 24.16-17; 40.34-35; mejəwey-mey: MC 17.7; Mab 24.7-8; kwakwas aŋga: Mab 20-24; Gazlavay a da ka cek anda aŋga ma ləvey: 3.2, 4; 4.13, 17; Gal 3.6, 14

*9:5 9.5 papaŋ ŋga papa aləkwa hay: Anda meləvey, Abəraham, Izak, leŋ Jakwap ta bəz aŋga hay kuraw a ray a cew.

9:5 9.5 15.8; Mab 3.6, 15; Kəriste: Mt 1.1; Rm 1.3-4

9:6 9.6 3.3-4; 2.28-29

9:7 9.7 MC 21.12; Mt 3.9

9:8 9.8 Gal 3.7; 4.23

9:9 9.9 MC 18.10, 14

9:10 9.10-12 MC 25.21-23; Rm 11.6

9:13 9.13 Mal 1.2-3

9:14 9.14 3.5; Mew 32.4

9:15 9.15 Mab 33.19; Mt 20.1-15

9:16 9.16 Ef 2.8

9:17 9.17 Mab 9.16

9:18 9.18 Mab 4.21; 7.3; 9.12; 14.4; 1Pi 2.8

9:20 9.20 Iz 29.16; 45.9

9:21 9.21 Jer 18.6; 2Tm 2.20

9:22 9.22 2.4, 8

9:23 9.23 5.2

9:24 9.24 1.16; 10.12

9:25 9.25 Aw 2.25; 1Pi 2.10

9:26 9.26 Aw 1.10

9:27 9.27-28 Iz 10.22-23

9:29 9.29 Iz 1.9

9:30 9.30 10.20

9:31 9.31 10.2-3

9:32 9.32 4.4-5

†9:33 9.33 aŋgwa: A wuɗey ŋga ləvey Yesu. Kwa waawa ma zlembey ta aŋgwa ha na, anda meləvey, kwa waawa ma təɓa mey ŋga Yesu a.

9:33 9.33 Iz 8.14; 28.16; 1Pi 2.6-8