1 Hahelaḡa taumui e, harihari ina haheḡani na umui latamui ai. 2 Iehova Sabaota ini e gwau tomamu: Basioma kamonai, bona lau ladagu i'imodaina basioma laloa bada, bena lau ese heuduguirai na latamui ai baina siaia, bona emui hahenamo herevadia na baina uduguiraidia; momokani, vada na uduguiraidia vaitani, badina be umui na asio laloa badamu. 3 A itaia, lau ese natumui baina gwau henidia, bona boromakau bona mamoe taḡedia na vairamui baina dahulaidia, hari emui boubou ḡaudia taḡedia; bena lau vairagu amo baina atomui lasi murimuri ai. 4 Iehova Sabaota na e tomu, Unu amo ba diba, ina haheḡani na lau ese vada na siaia vasi, egu gwauhamata Levi enai baine momokani helaoreana. 5 Egu gwauhamata ienai na mauri bona maino gwauhamatana, bena unu na na henia, baine gari helaoreana. Bena e gari henigu, bona ladagu e matauraia. 6 Hahediba herevadia momokanidia na ia uduna ai e miava, bona ia bibinana ai kerere ta se miava. Ia na lau ida a raka hebouva, maino ai bona kara maoromaoro ai, bona hutuma na ia ese kara havara amo e hakaudia siri. 7 A hahelaḡa tauna bibinana ese aonega baine gimaia, bona taunimanima ese hahediba herevadia na ia uduna amo bae tahua, una na namo; badina be ia na Iehova Sabaota ena gwaukau tauna. 8 Iehova Sabaota na e tomu, A umui na dala amo vada o raka siri, bona emu hahediba herevadia amo hutuma vada o hahekwakwanaidia; umui ese Levi ena gwauhamata vada o hadikaia. 9 Taunabunai, lau ese baina hahemaraimui bona baina ha-igomui diho, taunimanima iboudiai vairadiai, egu dala asio badinadia bona emui hahediba ai kaha ta enai o tao dainai.

10 Ita iboudai tamada na tamona, ani? Dirava tamona ese vada e karada, ani? Benaini, dahaka dainai ita na ta hekoi hehenimu, bena seneda edia gwauhamata ta hadikaiamu? 11 Iuda vada e koikoi; bona Israel ai bona Ierusalem ai kara dika-rohorohodia vada e kara; badina be Iuda ese Iehova ena gabu helaḡana, e lalokau heniamu gabuna, vada e hadikaia; bona dirava idauna natuna kekenina vada e adavaia. 12 Ini e kara tomamu tauna iduruna lotona bema hereva eiava bema haere eiava boubou ḡauna Iehova Sabaota enai bema mailaia tauna na Iehova ese Iakob ena kalaga amo baine negea daure, una be namo.

13 Ina danu o karaiamu. Iehova ena ihaboulaina patana na iruru-matamui amo o hada'ania ḡuḡurumu, mai taitaimui bona mai ḡanaḡanamui ida, badina be ia ese boubou ḡauna ihaḡerena vada e hadokoa, bona imamui amo asie abia daemu mai lalo-namona ida. 14 Umui na o henanadaimu, o tomu, Dahaka dainai se abia daemu? Badina korikori be Iehova na mai dibana oi bona adavamu na eregabemui ai o hegwau hamata heheni, a, ena be ia na oi bamomu bona adavamu, gwauhamata dainai, to ienai so tao. 15 Dirava tamona ese mauri laumana vada e karaia bona vada e hahesiriua ita eda, ani? Bona iena ura be dahaka? Ena ura be ita ese ia bae matauraia memerodia na baita havaradia. Taunabunai, sibomui ba henahua toho, bona ta ese eregabena ai e adavaia hahinena na basine rakatania. 16 Iehova, Israel Diravana, na e tomu, Badina be hahekoho na na inai heniamu, bona daḡedaḡe karadia ai dabuana e hamiroamu tauna danu na inai heniamu. Iehova Sabaota na e herevamu. Taunabunai, sibomui ba henahua toho, bona adavamui basio hadihodia.

17 Emui hereva amo Iehova vada o hahekwarahia ema bona vada e hesiku. Ḡau tamona, umui na o tomu, Ede a hahekwarahia toma? Iniheto: umui oto, Kara dika taudia iboudiai nanamo, Iehova vairanai, bona ia ese e moalelaidiamu. Eiava o henanadai, oto, Hahemaoro ḡoevaḡoeva Diravana be edeseni ai?