1 Iehova ena hereva na egu ai e kau, eto: 2 Taunimanima natuna e, oi ese gwau-edeede besena bogaraginai o nohomu. Idia na mai matadia, ḡau bema ita, to ḡau ta asie itaiamu, bona mai taiadia, hereva bema kamonai, to hereva ta asie kamonaimu; 3 badina be idia na gwauedeede besena. Taunabunai, taunimanima natuna e, dauhai bae hanohoa tauna ena laolao kohuna heḡereḡerena ai bavabia heḡaeḡae, bena dina ai dauhai bae hanohoa tauna heḡereḡerena ai ba raka lasi idia vairadiai; dauhai bae hanohoa launa na heto emu gabu amo baola, ela bona ma gabu ta, idia vairadiai. Ena be idia na gwau-edeede besena, to readia lalodia bae parara. 4 Dina ai emu laolao kohuna ba lasilaia idia vairadiai, dauhai bae hanohoa tauna ena laolao kohuna na heto, bona adorahi ai idia vairadiai ba raka lasi, dauhai bae hanohodia taudia na heheto. 5 Idia vairadiai ruma habana ba hamaurua, bona mauruna amo ba rau lasi. 6 Idia vairadiai laolao kohuna na bavabia isi paḡamu ai, bena dibura ai ba huaia lasi; vairamu ba ḡovaia, tano basio itaia helaoreana; badina be lau ese toa ta ai vada na halaomu, Israel besena enai.

7 Bena e haḡanigu heḡereḡerena ai na karaia. Dina ai egu laolao kohuna na lasilaia, dauhai bae hanohoa tauna ena kohu na heto; bona adorahi ai lau sibogu imagu amo ruma habana na hamaurua, dibura ai na rau lasi, egu laolao kohuna na paḡagu ai na huaia lao, idia vairadiai.

8 Daba ai Iehova ena hereva na egu ai e kau, eto: 9 Taunimanima natuna e, Israel besena, gwau-edeede besena, e nanadaimu, eto “Dahaka o karamu?”, ani? 10 Ba hamaorodia, baoto, Ḡaubada Iehova na ini e gwau tomamu: Ina hereva Inetauna na Ierusalem lohiana dainai, bona Israel besena taudia ia lalonai e nohomu iboudiai daidiai. 11 Ma baoto, Lau na toa ta emui ai; lau vada na karaia heḡereḡerena ai, unu bae kara henidia toma; idia na dauhai bae hanohodia mai iḡuidia ida. 12 Bena lohia tauna idia bogaragidiai ese ena laolao kohuna na pagana ai baine abia isi, dibura lalonai, bena baine huaia lao. Ia ese ruma habana baine hamaurua, bena mauruna amo baine rau lasi; ia ese vairana baine ḡovaia, ia matana amo tano basine itaia helaoreana. 13 Egu huo baina otoa ia iabina, bona egu idoa ai baina idoaia; Babulono, Kaldea tanona ai, baina laohaia; ḡau tamona, ia ese basine itaia, ia na unuseni ai baine mase. 14 Ia bamona iboudiai, iduruna taudia bona ena tuari taudia iboudiai, na lau ese baina hakarohodia, lai kahadia iboudiai baela; bona dare na iudalaina ḡauna amo baina veria lasi, idia muridia amo. 15 Bena bese idau-idau bogaragidiai baina luludia lao, bona tano idau-idau lalodiai baina hakarohodia negana ai, idia na bae diba, lau na Iehova. 16 A idia kwabukwabudia haida na dare bona dai-hanai gorerena bona doe amo baina harohodia mauri, bena bae lao heni besedia bogaragidiai edia kara dikarohorohodia iboudiai na bae gwaurai hedinarai, bona bae diba lau na Iehova.

17 Iehova ena hereva na egu ai ma e kau, eto: 18 Taunimanima natuna e, amu bavania mai kudou-hetahamu ida, bona ranu ba inua mai heudeheudemu bona mai garimu ida, 19 bona tano taudia na ba hamaorodia, baoto, Ḡaubada Iehova ese Ierusalem inoholaina taudia Israel tanona lalonai na ini e herevalaidia tomamu: Adia bae ani mai garidia ida, bona ranu bae inu mai kudou-hetahadia ida, badina be edia tano anina idoinai baine heabi oho vaitani, e noholaiamu taudia iboudiai edia daḡedaḡe dainai. 20 E noholaidiamu hanuadia na bae vahu, bona tano na tano ḡaḡaena ai baine hahelao; bena ba diba, lau na Iehova.

21 Bena Iehova ena hereva na egu ai e kau, eto: 22 Taunimanima natuna e, emui hereva lada-isina be dahaka? Israel tanona o herevalaiamu, o tomu “Nega na e daudaumu bona mata-hanai iboudiai anidia asie varamu”, ani? 23 Taunabunai ba hamaorodia, baoto, Ḡaubada Iehova na ini e gwau tomamu: Ina hereva lada-isina na baina hadokoa; basie gwauraia lou Israel ai. A ba hamaorodia, baoto, Nega na vada e kahikahi, mata-hanai iboudiai anidia ihaḡuḡurudia danu vada e kahikahi. 24 Badina be mata-hanai koikoidia bona bagu-haoro koikoidia na bae doko, Israel besena ai. 25 A lau Iehova ese baina gwauraia herevana vada baina gwauraia, bona karana baina karaia. Basine halahe, a oiemu nega ai, gwau-edeede besena e, hereva baina gwauraia bona karana baina karaia. Ḡaubada Iehova na e herevamu.

26 Iehova ena hereva na egu ai ma e kau, eto: 27 Taunimanima natuna e, a itaia, Israel besena taudia na e tomu “Ena mata-hanai na dina momo vairai ḡauna, bona ena peroveta herevadia na nega daudau bainela herevadia”. 28 Taunabunai ba hamaorodia, baoto, Ḡaubada Iehova na ini e gwau tomamu: Egu hereva iboudiai na ta basine halahe, a na gwauraiamu herevana anina do baine vara. Ḡaubada Iehova na e herevamu.